മുഖ്യമന്ത്രിയുടെ വിമാനയാത്രാ വിവാദം അടഞ്ഞ അധ്യായമെന്ന് വി.ഡി. സതീശൻ; സ്പോൺസറുടെ പേര് വെളിപ്പെടുത്തില്ല
തിരുവനന്തപുരം: മുഖ്യമന്ത്രിയുടെ സ്വകാര്യ വിമാനയാത്രയുമായി ബന്ധപ്പെട്ട വിവാദം അടഞ്ഞ അധ്യായമാണെന്ന് മുഖ്യമന്ത്രി വി.ഡി. സതീശൻ. യാത്രയുടെ ചെലവ് വഹിച്ച സ്പോൺസർ ആരാണെന്ന മാധ്യമപ്രവർത്തകരുടെ ചോദ്യത്തിന്, “നിങ്ങൾ തന്നെ കണ്ടെത്തിയല്ലോ” എന്നായിരുന്നു മുഖ്യമന്ത്രിയുടെ മറുപടി. എന്നാൽ സ്പോൺസറുടെ പേര് വെളിപ്പെടുത്തില്ലെന്നും അദ്ദേഹം വാർത്താസമ്മേളനത്തിൽ വ്യക്തമാക്കി.
ഇടത് സർക്കാരിന്റെ കാലത്ത് വിവാദമായ വാടക ഹെലികോപ്റ്റർ കരാർ പുതുക്കില്ലെന്നും മുഖ്യമന്ത്രി അറിയിച്ചു. വാടക ഹെലികോപ്റ്റർ കരാറിനെ യുഡിഎഫ് എതിർത്തിരുന്നുവെന്നും അതുകൊണ്ടാണ് കരാർ തുടരേണ്ടെന്ന് സർക്കാർ തീരുമാനിച്ചതെന്നും അദ്ദേഹം പറഞ്ഞു. ഹെലികോപ്റ്റർ സേവനത്തിനായി ചിപ്സനുമായുള്ള കരാർ പുതുക്കാൻ ഉദ്ദേശിക്കുന്നില്ലെന്നും വ്യക്തമാക്കി.
അതേസമയം, മുഖ്യമന്ത്രിയുടെ ചാർട്ടർ വിമാന, ഹെലികോപ്റ്റർ യാത്രകളുടെ ചെലവ് ആരാണ് വഹിച്ചതെന്ന കാര്യത്തിൽ വ്യക്തതയില്ലെന്ന വിമർശനം രാഷ്ട്രീയതലത്തിൽ തുടരുകയാണ്. സ്പോൺസറുടെ പേര് വെളിപ്പെടുത്താത്തതിനെച്ചൊല്ലിയും ചോദ്യങ്ങൾ ഉയരുന്നുണ്ട്.
വാടക ഹെലികോപ്റ്റർ കരാർ അവസാനിപ്പിക്കാനുള്ള സർക്കാർ തീരുമാനത്തോടെ ഒരു വിവാദത്തിന് വിരാമമാകുമ്പോഴും, സ്വകാര്യ വിമാനയാത്രയുടെ ചെലവ് വഹിച്ച വ്യക്തിയെയോ സ്ഥാപനത്തെയോ സംബന്ധിച്ച ചർച്ചകൾ തുടരുകയാണ്.
