ശബരിമല ശ്രീകോവിൽ മേൽക്കൂരയിലെ നിറവ്യത്യാസം; നെയ്യ് വീണതെന്ന് സ്ഥിരീകരണം
പത്തനംതിട്ട: ശബരിമലയിലെ ശ്രീകോവിലിന്റെ സ്വർണം പൊതിഞ്ഞ മേൽക്കൂരയിൽ കണ്ടെത്തിയ നിറവ്യത്യാസത്തിന് കാരണം നെയ്യ് വീണതാണെന്ന് സ്ഥിരീകരിച്ചു. നിറവ്യത്യാസം ശ്രദ്ധയിൽപ്പെട്ട മൂന്ന് ഭാഗങ്ങളും പ്രത്യേക പരിശോധനകൾക്ക് ശേഷം കഴുകി വൃത്തിയാക്കി.
സ്പെഷ്യൽ കമ്മീഷണറുടെ അനുമതിയോടെയാണ് മേൽക്കൂര ശുചീകരണ പ്രവർത്തനങ്ങൾ നടത്തിയത്. പരിശോധനയിൽ, ഇതര സംസ്ഥാനങ്ങളിൽ നിന്നെത്തിയ തീർത്ഥാടകർ മേൽക്കൂരയിലേക്ക് നെയ്യൊഴിച്ചതാണ് നിറവ്യത്യാസത്തിന് കാരണമായതെന്ന് കണ്ടെത്തി.
ഇന്നലെയാണ് ശ്രീകോവിലിന്റെ സ്വർണം പൊതിഞ്ഞ മേൽക്കൂരയിൽ അസാധാരണമായ നിറമാറ്റം ശ്രദ്ധയിൽപ്പെട്ടത്. വിവരം ലഭിച്ചതിനെ തുടർന്ന് തിരുവാഭരണ കമ്മീഷണർ ഉൾപ്പെടെയുള്ള ഉന്നത ഉദ്യോഗസ്ഥർ സ്ഥലത്തെത്തി വിശദമായ പരിശോധന നടത്തി.
പരിശോധനകൾ പൂർത്തിയാക്കിയ ശേഷമാണ് മേൽക്കൂരയിലെ നിറവ്യത്യാസത്തിന് കാരണം നെയ്യാണെന്ന് അധികൃതർ സ്ഥിരീകരിച്ചത്. തുടർന്ന് ഇന്ന് ബന്ധപ്പെട്ട ഭാഗങ്ങൾ പ്രത്യേക രീതിയിൽ കഴുകി വൃത്തിയാക്കുകയും സ്ഥിതി സാധാരണ നിലയിലാക്കുകയും ചെയ്തു.
സംഭവവുമായി ബന്ധപ്പെട്ട കൂടുതൽ ജാഗ്രതാ നടപടികൾ സ്വീകരിക്കുമെന്നും, ക്ഷേത്ര പരിസരത്ത് ഇത്തരം സംഭവങ്ങൾ ആവർത്തിക്കാതിരിക്കാൻ ആവശ്യമായ നിർദേശങ്ങൾ നൽകുമെന്നും അധികൃതർ അറിയിച്ചു.
