പഞ്ചാബിൽ രാഷ്ട്രീയപ്പോര് കടുക്കുന്നു; ഭഗവന്ത് മന്നിനെതിരെ രാഹുൽ ഗാന്ധി, ‘പപ്പു’ പോസ്റ്ററുമായി എഎപി തിരിച്ചടി

പഞ്ചാബ് നിയമസഭാ തിരഞ്ഞെടുപ്പിലേക്ക് മാസങ്ങൾ മാത്രം ബാക്കിനിൽക്കെ ആം ആദ്മി പാർട്ടിയും കോൺഗ്രസും തമ്മിൽ കടുത്ത വ്യക്തിപരമായ അധിക്ഷേപ പോര്. ലോക്‌സഭാ പ്രതിപക്ഷ നേതാവ് രാഹുൽ ഗാന്ധി പഞ്ചാബ് മുഖ്യമന്ത്രി ഭഗവന്ത് മന്നിനെതിരെ നടത്തിയ ലഹരി ആരോപണത്തിന് പിന്നാലെ, രാഹുൽ ഗാന്ധിയെ ‘പപ്പു’ എന്ന് അധിക്ഷേപിക്കുന്ന പോസ്റ്ററുകളും സോഷ്യൽ മീഡിയ ക്യാമ്പയ്നുമായി എഎപി രംഗത്തെത്തി. ഇന്ത്യ സഖ്യത്തിലെ പ്രധാന പങ്കാളികളായ ഇരുപാർട്ടികളും തമ്മിലുള്ള ബന്ധം കൂടുതൽ വഷളാക്കുന്ന തരത്തിലേക്കാണ് ആരോപണ-പ്രത്യാരോപണങ്ങൾ നീളുന്നത്.

നവംബർ 4-ന് സംഗ്രൂരിൽ നടന്ന കോൺഗ്രസിന്റെ ‘ഇൻസാഫ് റാലി’യിലാണ് രാഹുൽ ഗാന്ധി പഞ്ചാബ് മുഖ്യമന്ത്രിയെയും എഎപിയെയും കടന്നാക്രമിച്ചത്. മുൻപ് പാർലമെന്റിൽ ഒരുമിച്ച് പ്രവർത്തിച്ചിരുന്ന കാലത്ത് രാവിലെ 11 മണിക്ക് തന്നെ ഭഗവന്ത് മന്നിൽ നിന്ന് മദ്യത്തിന്റെ മണം വരാറുണ്ടായിരുന്നുവെന്ന് രാഹുൽ കുറ്റപ്പെടുത്തി.

മദ്യപിക്കുന്നത് വ്യക്തിപരമായ കാര്യമാണെങ്കിലും, മയക്കുമരുന്ന് മാഫിയയെ തുടച്ചുനീക്കേണ്ട ഒരു സംസ്ഥാനത്തിന്റെ മുഖ്യമന്ത്രി എല്ലാ ദിവസവും ലഹരിയിലാകരുതെന്ന് രാഹുൽ പറഞ്ഞു. പഞ്ചാബിൽ മയക്കുമരുന്ന് മാഫിയ തടയുന്നതിൽ എഎപി സർക്കാർ പൂർണ്ണമായി പരാജയപ്പെട്ടുവെന്നും ഭഗവന്ത് മൻ കാഴ്ചക്കാരനായി നിൽക്കുകയാണെന്നും സംസ്ഥാന ഭരണത്തിന്റെ നിയന്ത്രണം ഡൽഹിയിലാണെന്നും രാഹുൽ ഗാന്ധി ആരോപിച്ചു.

രാഹുലിന്റെ പരാമർശങ്ങൾക്ക് പിന്നാലെ എഎപി രാഹുൽ ഗാന്ധിയെ ‘പപ്പു’ എന്ന് വിശേഷിപ്പിച്ചുകൊണ്ടുള്ള പോസ്റ്റർ പുറത്തുവിടുകയായിരുന്നു. രാഹുൽ ഇടയ്ക്കിടെ തായ്‌ലൻഡിലേക്ക് പോകുന്നത് എന്തിനാണെന്നും, ജനങ്ങളോട് തങ്ങളുടെ പ്രിയപ്പെട്ട ‘പപ്പു കോട്ടുകൾ’ പങ്കുവെക്കാനും എഎപി തങ്ങളുടെ സോഷ്യൽ മീഡിയ പേജുകളിലൂടെ ആവശ്യപ്പെട്ടു.

രാഹുൽ ഗാന്ധിയുടേത് തികച്ചും തരംതാണതും വ്യക്തിപരവുമായ അധിക്ഷേപമാണെന്ന് എഎപി നേതാക്കൾ കുറ്റപ്പെടുത്തി. ബിജെപി ഭരിക്കുന്ന സംസ്ഥാനങ്ങളെ വിമർശിക്കുന്നതിന് പകരം പ്രതിപക്ഷ പാർട്ടികളുടെ മുഖ്യമന്ത്രിമാരെ തെളിവുകളില്ലാതെ ഇത്തരത്തിൽ വ്യക്തിപരമായി അധിക്ഷേപിക്കുന്നത് കോൺഗ്രസിന്റെ രാഷ്ട്രീയ നിലപാടുകളെയും ഇന്ത്യ സഖ്യത്തിന്റെ ലക്ഷ്യങ്ങളെയും സംശയത്തിലാക്കുന്നുവെന്ന് എഎപി വ്യക്തമാക്കി.