പ്രസവാനന്തര ശ്വാസതടസം; പ്രതീക്ഷ കൈവിടാതെ ഡോക്ടർ, കൃത്രിമ ശ്വാസം നൽകി നവജാത ശിശുവിന്റെ ജീവൻ രക്ഷിച്ചു
ലക്നൗ: ശ്വാസ തടസം നേരിട്ട നവജാത ശിശുവിനെ കൃത്രിമ ശ്വാസം നൽകി രക്ഷിച്ച് വനിതാ ഡോക്ടർ. ഉത്തർപ്രദേശിലെ സഹാരൻപൂരിലെ കമ്മ്യൂണിറ്റി ഹെൽത്ത് സെന്ററിലാണ് സംഭവം.
ദാദൻപൂർ സ്വദേശിയായ ആയിഷയെ പ്രസവവേദനയെ തുടർന്ന് ആശുപത്രിയിൽ പ്രവേശിപ്പിച്ചിരുന്നു. പ്രസവം വിജയകരമായിരുന്നെങ്കിലും കുഞ്ഞ് കരയുകയോ ശ്വസിക്കുകയോ ചെയ്തിരുന്നില്ല. ഇതോടെ മെഡിക്കൽ സംഘം അടിയന്തര ചികിത്സ ആരംഭിച്ചു. ഓക്സിജൻ സപ്പോർട്ട് ഉൾപ്പെടെയുള്ള പ്രാഥമിക സഹായങ്ങൾ നൽകിയിട്ടും കുഞ്ഞിന്റെ നിലയിൽ പുരോഗതി ഉണ്ടായില്ല.
സ്ഥിതി ഗുരുതരമാണെന്ന് തിരിച്ചറിഞ്ഞ ഡോ. റുമ കുഞ്ഞിന് കൃത്രിമ ശ്വാസം നൽകാൻ തീരുമാനിക്കുകയായിരുന്നു. കുഞ്ഞിന്റെ നെഞ്ച് മൃദുവായി അമർത്തിയും തുടർച്ചയായ ശ്രമങ്ങളിലൂടെയും നടത്തിയ രക്ഷാപ്രവർത്തനത്തിനൊടുവിൽ കുഞ്ഞ് കരയാൻ തുടങ്ങി. ഇതോടെ ആശുപത്രി ജീവനക്കാരും കുടുംബാംഗങ്ങളും ആശ്വാസം പ്രകടിപ്പിച്ചു.
സംഭവത്തിന്റെ ദൃശ്യങ്ങൾ സാമൂഹികമാധ്യമങ്ങളിൽ വ്യാപകമായി പ്രചരിച്ചതോടെ ഡോ. റുമയുടെ പ്രവർത്തനത്തിന് വലിയ പ്രശംസയാണ് ലഭിക്കുന്നത്.
“വെല്ലുവിളിയേറിയ നിമിഷമായിരുന്നു. മറ്റൊരു ആശുപത്രിയിലേക്ക് മാറ്റിയിരുന്നെങ്കിൽ സമയം നഷ്ടമാകുമായിരുന്നു. അതിനാൽ അവിടെ തന്നെ പരമാവധി ശ്രമിക്കാൻ തീരുമാനിച്ചു,” എന്ന് ഡോ. റുമ പ്രതികരിച്ചു.
പ്രസവാനന്തര ഘട്ടത്തിൽ ശ്വാസമെടുക്കാത്ത നവജാത ശിശുക്കളുടെ അവസ്ഥ അതീവ ഗുരുതരമാണെന്നും, ആദ്യ നിമിഷങ്ങളിലെ ഓക്സിജൻ ലഭ്യത നിർണായകമാണെന്നും ആരോഗ്യ വിദഗ്ധർ ചൂണ്ടിക്കാട്ടുന്നു. ഗ്രാമപ്രദേശങ്ങളിലെ ആരോഗ്യ കേന്ദ്രങ്ങളിൽ ഇത്തരം അടിയന്തര ചികിത്സകൾ ലഭ്യമാകുന്നത് ശിശുമരണ നിരക്ക് കുറയ്ക്കാൻ സഹായിക്കുമെന്നും വിദഗ്ധർ അഭിപ്രായപ്പെടുന്നു.
