പിഎം ശ്രീ തർക്കം കനക്കുന്നു; കേരളത്തിന് ലഭിക്കേണ്ട ഫണ്ട് RTE നിയമപ്രകാരമെന്ന് രേഖകൾ വ്യക്തമാക്കുന്നു
തിരുവനന്തപുരം: പിഎം ശ്രീ പദ്ധതിയെ ചുറ്റിപ്പറ്റിയുള്ള വിവാദങ്ങൾക്കിടെ സംസ്ഥാനത്തിന് ലഭിക്കേണ്ട ഫണ്ടിനെ സംബന്ധിച്ച നിർണ്ണായക രേഖകൾ പുറത്തുവന്നു. കഴിഞ്ഞ എൽഡിഎഫ് സർക്കാരിന്റെ കാലത്ത് ലഭിച്ച തുക പിഎം ശ്രീ പദ്ധതിയുമായി ബന്ധപ്പെട്ടതല്ലെന്നും, അത് വിദ്യാഭ്യാസ അവകാശ നിയമം (RTE) പ്രകാരം കേരളത്തിന് നിയമപരമായി ലഭിക്കേണ്ട റീഇംബേഴ്സ്മെന്റ് തുകയാണെന്നും രേഖകൾ വ്യക്തമാക്കുന്നു.
പിഎം ശ്രീ പദ്ധതിയിൽ ഒപ്പിട്ടാലും ഇല്ലെങ്കിലും ഈ തുക നൽകാൻ കേന്ദ്രത്തിന് ഭരണഘടനാപരമായ ബാധ്യതയുണ്ടെന്ന വാദവും ഇതോടെ ശക്തമാകുന്നു.
മുൻ എൽഡിഎഫ് സർക്കാർ കേന്ദ്രത്തോട് നടത്തിയ ഇടപെടലുകളുടെ ഫലമായി ലഭിക്കേണ്ട കോടിക്കണക്കിന് രൂപ ഇപ്പോഴും കൈമാറിയിട്ടില്ലെന്ന ആരോപണവും ഉയരുന്നു. 2026 മാർച്ചിൽ 99.27 കോടി രൂപയും തുടർന്ന് മെയ് 20-ന് 106 കോടി രൂപയും അനുവദിച്ചതായി രേഖകളിൽ വ്യക്തമാണെങ്കിലും, ഈ തുക സംസ്ഥാനത്തിന് കൈമാറാൻ കേന്ദ്ര ധനമന്ത്രാലയം ഇതുവരെ തയ്യാറായിട്ടില്ലെന്നാണ് വിവരം.
ഈ ഫണ്ട് സംബന്ധിച്ച് നിലവിലെ യുഡിഎഫ് സർക്കാർ ശക്തമായ നിലപാട് എടുക്കുന്നില്ലെന്ന വിമർശനവും ഉയരുന്നുണ്ട്.
അതേസമയം, കേരളം പിഎം ശ്രീ പദ്ധതിയിൽ ഉൾപ്പെട്ടിരുന്നില്ലെന്ന് വ്യക്തമാക്കുന്ന കേന്ദ്ര വിദ്യാഭ്യാസ മന്ത്രാലയത്തിന്റെ കത്ത് പുറത്തുവന്നിട്ടുണ്ട്. യുഡിഎഫ് സർക്കാർ അധികാരമേറ്റതിന് പിന്നാലെ പദ്ധതി നടപ്പാക്കണമെന്ന് ആവശ്യപ്പെട്ട് കേന്ദ്ര വിദ്യാഭ്യാസ സെക്രട്ടറി സഞ്ജയ് കുമാർ കത്ത് നൽകിയതായും, അത് തുടർന്ന് സംസ്ഥാന വിദ്യാഭ്യാസ വകുപ്പിൽ നടപടികൾക്ക് വഴിവെച്ചതായും റിപ്പോർട്ടുകൾ പറയുന്നു.
കേന്ദ്രത്തിന്റെ നിർദ്ദേശത്തെ തുടർന്ന് മന്ത്രിസഭയിൽ വിഷയം ചർച്ച ചെയ്യുകയും പദ്ധതി നടപ്പാക്കാനുള്ള തീരുമാനം സ്വീകരിക്കുകയും ചെയ്തിരുന്നു. കേരളത്തിന് പുറമെ തമിഴ്നാട്, ബംഗാൾ എന്നിവയ്ക്കും സമാന കത്തുകൾ ലഭിച്ചിരുന്നുവെന്നും, ബംഗാൾ ഇതിനകം പദ്ധതിയിൽ ഒപ്പുവച്ചിരുന്നുവെന്നും രേഖകൾ വ്യക്തമാക്കുന്നു.
