ചാലയിലെ സ്വർണ്ണക്കവർച്ച: വർഷങ്ങൾ നീണ്ട പകയുടെ കണക്കുതീർക്കലോ, കൊട്ടേഷൻ സംഘത്തിന്റെ ആസൂത്രിത നീക്കമോ?

ചാലയിലെ സ്വർണ്ണക്കവർച്ച: പകയും കൊട്ടേഷനും ചുരുളഴിയുമ്പോൾ…
​തിരുവനന്തപുരത്തെ തിരക്കേറിയ ചാല കമ്പോളം. അവിടെ കഴിഞ്ഞ മുപ്പതു വർഷമായി സ്വർണ്ണവ്യാപാരിയായ മഹാരാഷ്ട്ര സ്വദേശി നന്ദകുമാറിന്റെ “വൈഷ്ണവി ജ്വല്ലറി” ഉടമയായ അദ്ദേഹത്തിന്റെ കച്ചവടരീതികൾക്ക് ഒരു പ്രത്യേകതയുണ്ടായിരുന്നു.

പഴയ സ്വർണ്ണം വാങ്ങി ഉരുക്കി വിൽക്കുന്ന നന്ദകുമാർ, മറ്റു വ്യാപാരികളേക്കാൾ കൂടിയ വില ഉപഭോക്താക്കൾക്ക് നൽകുകയും പലപ്പോഴും കണക്കുകൾ തീർക്കാൻ പകരമായി സ്വർണ്ണം നൽകുകയും ചെയ്തിരുന്നു. ഇത് സ്വാഭാവികമായും മറ്റുള്ളവരുടെ കച്ചവടത്തെ ബാധിക്കുകയും വ്യാപാരികൾക്കിടയിൽ വലിയൊരു ബിസിനസ്സ് പകയ്ക്ക് കാരണമാവുകയും ചെയ്തു.

​ഈ പക പതിയെ ഒരു വലിയ ഗൂഢാലോചനയിലേക്ക് വഴിമാറി. ചാലയിൽ തന്നെ സമാനമായ രീതിയിൽ സ്വർണ്ണവ്യാപാരിയായ അമുലും, ദിലീപും ചേർന്നാണ് കവർച്ചാ ആസൂത്രണങ്ങൾക്ക് ചുക്കാൻ പിടിച്ചത്. ശനിയാഴ്ച നന്ദകുമാറും അമുലും തമ്മിൽ പത്തു ലക്ഷം രൂപയുടെ ഒരു സ്വർണ്ണ ഇടപാട് നടന്നിരുന്നു.

മാത്രമല്ല, കായംകുളത്തുള്ള ഒരു സേട്ടിൽ നിന്ന് നന്ദകുമാർ വലിയൊരു അളവ് സ്വർണ്ണം വാങ്ങിയിട്ടുണ്ടെന്നും, അന്ന് വൈകുന്നേരം ആ സ്വർണ്ണം അദ്ദേഹത്തിന്റെ കൈവശമുണ്ടെന്നും ഗൂഢാലോചനക്കാർക്ക് കൃത്യമായി അറിയാമായിരുന്നു. നന്ദകുമാറിനെ സാമ്പത്തികമായി തകർക്കുക എന്നതായിരുന്നു ഇവരുടെ പ്രധാന ലക്ഷ്യം. ഇതിനായി അനൂപ് രാജ് എന്ന വ്യക്തിക്ക് ഇവർ കൊട്ടേഷൻ നൽകി.

ഒരു കാലത്ത് തിരുവനന്തപുരത്തെ മോഷണക്കേസുകളിൽ സജീവമായിരുന്ന, പിന്നീട് എറണാകുളത്തേക്ക് തട്ടകം മാറ്റി ഗുണ്ടാപ്രവർത്തനങ്ങൾ ചെയ്തിരുന്ന ‘ഷാഡോ അനിൽ’ എന്ന അനിൽ പ്രസാദിനെയും സുഹൃത്ത് വിനോദിനെയും അനൂപ് രാജ് ഈ ദൗത്യത്തിനായി കൂട്ടുപിടിച്ചു. പ്രദേശവാസിയായ ശ്രാവൺ എന്ന യുവാവിനായിരുന്നു നന്ദകുമാറിന്റെ നീക്കങ്ങൾ നിരീക്ഷിക്കാനുള്ള ‘സ്പോട്ടർ’ ചുമതല ലഭിച്ചത്.

​രാത്രി പത്തു മണിക്ക് നന്ദകുമാർ കടയടച്ച് പിൻവാതിലിലൂടെ പുറത്തിറങ്ങി. കൂടെ മകനുണ്ടോ എന്ന് പോലും കൃത്യമായി നിരീക്ഷിച്ച ശേഷം ശ്രാവൺ കൊട്ടേഷൻ സംഘത്തിന് വിവരം കൈമാറി. ഷാഡോ അനിലിന്റെ ബൈക്കിലെത്തിയ അനിലും വിനോദും ചേർന്ന് സ്വർണ്ണമടങ്ങിയ ബാഗ് തട്ടിയെടുത്ത് കടന്നുകളഞ്ഞു. ഫ്ലൈഓവർ കടന്ന് ഹൈവേയിൽ എത്തുമ്പോഴേക്കും എക്സ്.യു.വി (XUV) കാറുമായി അനൂപ് രാജ് അവിടെ കാത്തുനിൽപ്പുണ്ടായിരുന്നു. കാറിൽ കയറിയ മൂവർ സംഘത്തിനൊപ്പം പിന്നീട് ശ്രാവണും ചേർന്നു.

പിന്നീട് നടന്നത് ഒരു സിനിമാക്കഥയെ വെല്ലുന്ന സംഭവവികാസങ്ങളാണ്. ഡെപ്യൂട്ടേഷൻ കഴിഞ്ഞ് തിരിച്ചെത്തിയ ഫോർട്ട് സ്റ്റേഷൻ എസ്.എച്ച്.ഒ ശ്രീകാന്തിന് സിറ്റി പോലീസ് കമ്മീഷണർ അരുൾ ബി. കൃഷ്ണ കൃത്യമായ നിർദ്ദേശങ്ങൾ നൽകി. ഗൂഢാലോചനക്കാരായ അമുലിനെയും ദിലീപിനെയും പോലീസ് അപ്പോൾത്തന്നെ വിളിപ്പിച്ചു ചോദ്യം ചെയ്തെങ്കിലും അവർ ഒന്നുമറിയാത്തവരെപ്പോലെ അഭിനയിച്ചു.

എന്നാൽ ഇവരുടെ ഫോൺ വിവരങ്ങൾ പരിശോധിച്ച പോലീസ് സംഘം, കൊട്ടേഷൻ സംഘത്തിന്റെ നീക്കങ്ങൾ നിരീക്ഷിച്ചു തുടങ്ങി. നാഗർകോവിൽ, മധുര, ബാംഗ്ലൂർ, മൈസൂർ, ഗുണ്ടൽപേട്ട് വഴി വയനാട്ടിലേക്കായിരുന്നു സംഘത്തിന്റെ രക്ഷപ്പെടൽ യാത്ര. പോലീസ് സംഘവും മണിക്കൂറുകൾക്കുള്ളിൽ അവർക്ക് പിന്നാലെ പാഞ്ഞു.

​പിറ്റേന്ന് രാവിലെ 10 മണിയോടെ മുത്തങ്ങ ചെക്ക് പോസ്റ്റ് കടന്ന് കൊട്ടേഷൻ സംഘം വയനാട്ടിലെത്തി. വയനാട്ടിലെത്തിയ അവർ തങ്ങളുടെ മുൻപരിചയക്കാരനും അവിടെ ഒരു റിസോർട്ട് ജീവനക്കാരനുമായ രാജീവിനെ വിളിച്ച് താമസസൗകര്യം ആവശ്യപ്പെട്ടു. വിനോദയാത്രയ്ക്ക് വന്നതാണെന്ന് കരുതി രാജീവ് അവരുടെ കാറിൽ കയറി.

എന്നാൽ അപ്പോഴേക്കും തിരുവനന്തപുരത്ത് നിന്നുള്ള വിവരത്തിന്റെ അടിസ്ഥാനത്തിൽ പടിഞ്ഞാറത്തറ പോലീസ് നഗരമധ്യത്തിൽ വെച്ച് അവരുടെ വാഹനം തടഞ്ഞിരുന്നു. പോലീസ് ആണെന്ന് തിരിച്ചറിഞ്ഞതോടെ കാറിലുണ്ടായിരുന്ന മൂന്നുപേർ ഇറങ്ങിയോടി. ഇതിൽ രണ്ടുപേരെ പോലീസ് ഓടിച്ചിട്ട് പിടിച്ചു, എന്നാൽ സ്പോട്ടർ ആയിരുന്ന ശ്രാവൺ അവിടെ നിന്നും ലിഫ്റ്റ് ചോദിച്ച് ഓടി രക്ഷപ്പെട്ടു. കവർച്ചയുമായി നേരിട്ട് ബന്ധമില്ലെന്ന് മനസ്സിലാക്കിയതിനെ തുടർന്ന് രാജീവിനെ പോലീസ് നോട്ടീസ് നൽകി വിട്ടയച്ചു.

​കാറിൽ പോലീസ് നടത്തിയ വിശദമായ പരിശോധനയിൽ 448 ഗ്രാം വരുന്ന ഒരു സ്വർണ്ണക്കട്ടി കണ്ടെടുത്തു. അനൂപ്, അനിൽ, വിനോദ് എന്നിവർ വയനാട്ടിലും, ഗൂഢാലോചനക്കാരായ അമുലും ദിലീപും തിരുവനന്തപുരത്തുമായി അങ്ങനെ അഞ്ചുപേർ അറസ്റ്റിലായി. അർദ്ധരാത്രി വരെ ഫോറൻസിക് പരിശോധനകൾ പൂർത്തിയാക്കിയ ശേഷം, പോലീസ് വയനാട്ടിൽ പിടിയിലായവരെയും കണ്ടെടുത്ത സ്വർണ്ണവും തിരുവനന്തപുരത്തേക്ക് കൊണ്ടുവന്നു. ബിസിനസ്സ് പകയിൽ തുടങ്ങിയ ഒരു കൊട്ടേഷൻ കവർച്ചയുടെ ചുരുളഴിയുമ്പോൾ, ഈ കഥയിൽ ഇനിയുമൊരു വലിയ ‘ട്വിസ്റ്റ്’ ബാക്കിയുണ്ടെന്ന സൂചനയാണ് പോലീസ് നൽകുന്നത്.