ഒക്ടോബർ 15ന് എംഡിആർ ഇല്ല? യുപിഐ ഇടപാടുകാർ ശ്രദ്ധിക്കുക; പുതിയ നിരക്ക് 2027ലേക്ക് നീട്ടിയേക്കും
ന്യൂഡൽഹി: 2,000 രൂപയ്ക്ക് മുകളിലുള്ള ചില യുപിഐ ഇടപാടുകൾക്ക് ഏർപ്പെടുത്താനിരിക്കുന്ന 0.4 ശതമാനം മർച്ചന്റ് ഡിസ്കൗണ്ട് റേറ്റ് (എംഡിആർ) നടപ്പാക്കുന്നത് അടുത്ത വർഷത്തേക്ക് നീട്ടിയേക്കുമെന്ന് സൂചന. ഒക്ടോബർ 15 മുതൽ പുതിയ നിരക്ക് പ്രാബല്യത്തിൽ വരാനിരിക്കെയാണ് ഇത് നീട്ടുന്നതുമായി ബന്ധപ്പെട്ട ചർച്ചകൾ പുരോഗമിക്കുന്നത്. എന്നാൽ വിഷയത്തിൽ ഇതുവരെ അന്തിമ തീരുമാനമായിട്ടില്ല.
വ്യാപാരി സംഘടനകൾ, ഫിൻടെക് കമ്പനികൾ, പേയ്മെന്റ് സ്ഥാപനങ്ങൾ എന്നിവയുടെ ആവശ്യത്തെ തുടർന്നാണ് നാഷണൽ പേയ്മെന്റ്സ് കോർപ്പറേഷൻ ഓഫ് ഇന്ത്യ (എൻപിസിഐ) തീരുമാനം പുനഃപരിശോധിക്കുന്നത്. വിവിധ തരത്തിലുള്ള യുപിഐ ഇടപാടുകൾക്ക് എംഡിആർ എങ്ങനെ ബാധകമാകുമെന്ന കാര്യത്തിൽ വ്യക്തതക്കുറവുണ്ടെന്നും പുതിയ സംവിധാനം നടപ്പാക്കാൻ കൂടുതൽ സമയം വേണമെന്നുമാണ് സ്ഥാപനങ്ങളുടെ ആവശ്യം.
പുതിയ നിരക്ക് സാധാരണ ഉപഭോക്താക്കളെ നേരിട്ട് ബാധിക്കില്ലെന്നാണ് വിലയിരുത്തൽ. എന്നാൽ അധിക ചെലവ് വരുന്നതോടെ വ്യാപാരികൾ യുപിഐ വഴി പണം സ്വീകരിക്കാൻ മടിക്കുമോയെന്ന ആശങ്ക ഉയരുന്നുണ്ട്.
ഒക്ടോബർ മുതൽ ഡിസംബർ വരെയുള്ള ഉത്സവകാലത്ത് രാജ്യത്തെ ഡിജിറ്റൽ പേയ്മെന്റ് ഇടപാടുകൾ സാധാരണയായി വർധിക്കാറുണ്ട്. ഈ സമയത്ത് പുതിയ സംവിധാനം നടപ്പാക്കുന്നത് വ്യാപാരികൾക്ക് അധിക സാമ്പത്തിക ബാധ്യത സൃഷ്ടിക്കുമെന്നാണ് ആശങ്ക. അതിനാൽ പേയ്മെന്റ് കമ്പനികൾക്കും വ്യാപാരികൾക്കും കൂടുതൽ സമയം അനുവദിച്ച് അടുത്ത വർഷം ആദ്യം നിരക്ക് നടപ്പാക്കുന്നതാണ് പരിഗണനയിലുള്ളത്.
എംഡിആർ നടപ്പാക്കുന്നത് സംബന്ധിച്ച് എൻപിസിഐയും കേന്ദ്ര ധനമന്ത്രാലയവും തമ്മിലുള്ള ചർച്ചകൾ തുടരുകയാണ്. പുതിയ നിരക്ക് സംബന്ധിച്ച അന്തിമ തീരുമാനം പുറത്തുവന്നിട്ടില്ല.
