2027 മുതൽ നീറ്റ് പരീക്ഷ ഓൺലൈൻ ആക്കും: പ്രഖ്യാപനവുമായി കേന്ദ്ര വിദ്യാഭ്യാസ മന്ത്രി
ന്യൂഡൽഹി: നീറ്റ് യുജി പുനഃപരീക്ഷ ജൂൺ 21ന് നടത്താൻ തീരുമാനിച്ചതിന് പിന്നാലെ 2027 മുതൽ പരീക്ഷ പൂർണമായും ഓൺലൈൻ രീതിയിലേക്ക് മാറ്റുമെന്ന് കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ അറിയിച്ചു. പേപ്പർ അധിഷ്ഠിത പരീക്ഷയിൽ നിന്ന് കമ്പ്യൂട്ടർ അധിഷ്ഠിത പരീക്ഷ (CBT) രീതിയിലേക്കാണ് മാറ്റം വരുത്തുന്നതെന്ന് അദ്ദേഹം വ്യക്തമാക്കി.
മേയ് 3ന് നടന്ന നീറ്റ് പരീക്ഷയിൽ ചോദ്യപേപ്പർ സംബന്ധിച്ച് ക്രമക്കേടുകൾ സംഭവിച്ചതായി സംശയമുണ്ടെന്നും, അതിന്റെ ഉത്തരവാദിത്തം സർക്കാർ ഏറ്റെടുക്കുന്നതായും മന്ത്രി പറഞ്ഞു. പരീക്ഷാ സംവിധാനത്തിലെ പിഴവുകൾ പരിഹരിച്ച് സുതാര്യത ഉറപ്പാക്കാൻ സർക്കാർ പ്രതിജ്ഞാബദ്ധമാണെന്നും അദ്ദേഹം കൂട്ടിച്ചേർത്തു.
രാജ്യത്തുടനീളം 22 ലക്ഷത്തിലധികം വിദ്യാർത്ഥികളാണ് പുനഃപരീക്ഷയിൽ പങ്കെടുക്കുന്നത്. കർശന സുരക്ഷാ സംവിധാനങ്ങളും സുതാര്യമായ നടപടിക്രമങ്ങളും ഉറപ്പാക്കുമെന്ന് വിദ്യാഭ്യാസ മന്ത്രാലയം അറിയിച്ചു.
പരീക്ഷാ ക്രമക്കേടുകൾ അന്വേഷിക്കാൻ സിബിഐയ്ക്ക് നിർദേശം നൽകിയിട്ടുണ്ടെന്നും, സംഭവത്തിന്റെ മൂലകാരണം കണ്ടെത്താൻ വിശദമായ അന്വേഷണം നടക്കുമെന്നും മന്ത്രി വ്യക്തമാക്കി. പരീക്ഷാ മാഫിയക്കെതിരെ ശക്തമായ നടപടികൾ സ്വീകരിക്കുമെന്നും, പരീക്ഷാ സംവിധാനത്തെ തകർക്കാനുള്ള ഏതൊരു ശ്രമത്തിനും കർശന പ്രത്യാഘാതങ്ങൾ നേരിടേണ്ടി വരുമെന്നും അദ്ദേഹം മുന്നറിയിപ്പ് നൽകി.
