മന്ത്രിമാരുടെ പേഴ്സണൽ സ്റ്റാഫ് പെൻഷൻ; നാല് വർഷം സർവീസ് നിർബന്ധമാക്കാൻ നീക്കം
തിരുവനന്തപുരം: മന്ത്രിമാരുടെ പേഴ്സണൽ സ്റ്റാഫിന് പെൻഷൻ ലഭിക്കാൻ കുറഞ്ഞത് നാല് വർഷത്തെ സർവീസ് നിർബന്ധമാക്കാൻ സർക്കാർ നീക്കം. നിലവിൽ രണ്ടുവർഷം സർവീസുള്ളവർക്കും പെൻഷന് അർഹതയുണ്ടായിരുന്നു. രണ്ടുവർഷത്തിൽ കൂടുതലുള്ള സർവീസ് മൂന്ന് വർഷമായി കണക്കാക്കി പെൻഷൻ അനുവദിച്ചിരുന്ന രീതിയിലും മാറ്റം വരുത്താനാണ് തീരുമാനം.
ഇതുസംബന്ധിച്ച നിർദേശം മുഖ്യമന്ത്രി വി.ഡി. സതീശൻ മന്ത്രിമാർക്ക് നൽകിയതായാണ് റിപ്പോർട്ട്. പുതിയ നിബന്ധനയ്ക്ക് മുൻകാല പ്രാബല്യം ഉണ്ടാകില്ല. അതിനാൽ നിലവിൽ നാലുവർഷത്തിൽ താഴെ സർവീസ് അടിസ്ഥാനത്തിൽ പെൻഷൻ ലഭിക്കുന്നവർക്കുള്ള ആനുകൂല്യം തുടരുമെന്നും സൂചനയുണ്ട്. പുതിയ സർക്കാരിലെ മന്ത്രിമാരുടെ പേഴ്സണൽ സ്റ്റാഫുകൾക്കു മാത്രമായിരിക്കും ഭേദഗതി ബാധകമാകുക.
രണ്ടുവർഷം കഴിയുമ്പോൾ നിലവിലെ ജീവനക്കാരെ ഒഴിവാക്കി പുതിയവരെ നിയമിച്ച് ഇരുവർക്കും പെൻഷൻ ലഭ്യമാക്കുന്ന രീതിയാണ് ഇതുവരെ തുടർന്നിരുന്നത്. മുഖ്യമന്ത്രി, മന്ത്രിമാർ, ചീഫ് വിപ്പ് എന്നിവരുടെ പേഴ്സണൽ സ്റ്റാഫിന് പെൻഷൻ അനുവദിക്കുന്ന രീതി കേരളത്തിൽ മാത്രമാണെന്ന വിമർശനവും ഉയർന്നിരുന്നു.
സുപ്രീംകോടതി ഉൾപ്പെടെ വിവിധ കേന്ദ്രങ്ങളിൽ നിന്ന് ആക്ഷേപങ്ങൾ ഉയർന്നിട്ടും മുൻ സർക്കാരുകൾ ഈ രീതി അവസാനിപ്പിക്കാൻ തയ്യാറായിരുന്നില്ല. വിഷയത്തിൽ മുൻ ഗവർണർ Arif Mohammad Khan ശക്തമായി പ്രതികരിക്കുകയും ഇത് പൊതുപണത്തിന്റെ ദുരുപയോഗമാണെന്ന് വിമർശിക്കുകയും ചെയ്തിരുന്നു.
“പാർട്ടി പ്രവർത്തകർക്കാണ് ജീവിതകാലം മുഴുവൻ പെൻഷൻ ലഭിക്കുന്നത്. സാധാരണക്കാർക്ക് പെൻഷൻ നേടാൻ ദീർഘകാലം ജോലി ചെയ്യേണ്ടിവരുമ്പോഴാണ് ഇത്തരം ആനുകൂല്യങ്ങൾ നൽകുന്നത്” എന്നായിരുന്നു അദ്ദേഹത്തിന്റെ വിമർശനം.
