അടൂർ പ്രകാശിനെ തള്ളി കെ.സി. വേണുഗോപാൽ; ‘പാർട്ടി കാര്യങ്ങൾ പാർട്ടി വേദികളിൽ മാത്രം ചർച്ച ചെയ്യണം’
തിരുവനന്തപുരം: മുഖ്യമന്ത്രി വി.ഡി. സതീശനെതിരെ യുഡിഎഫ് കൺവീനർ അടൂർ പ്രകാശ് നടത്തിയ പരസ്യ വിമർശനത്തിൽ പ്രതികരണവുമായി എഐസിസി ജനറൽ സെക്രട്ടറി കെ.സി. വേണുഗോപാൽ. പാർട്ടിക്കുള്ളിലെ അഭിപ്രായ വ്യത്യാസങ്ങൾ പരസ്യമായി പറയുന്നതിനോട് യോജിപ്പില്ലെന്ന് കെ.സി. വേണുഗോപാൽ വ്യക്തമാക്കി.
പാർട്ടി കാര്യങ്ങൾ പാർട്ടി വേദികളിൽ തന്നെ ചർച്ച ചെയ്യണമെന്നും അഭിപ്രായ വ്യത്യാസങ്ങളുണ്ടെങ്കിൽ അത് നേതാക്കളുടെ ശ്രദ്ധയിൽപ്പെടുത്താൻ പാർട്ടിക്കുള്ളിലെ സംവിധാനങ്ങൾ ഉപയോഗിക്കണമെന്നും അദ്ദേഹം പറഞ്ഞു. കോൺഗ്രസ് ജനാധിപത്യ പാർട്ടിയാണെന്നും അഭിപ്രായ വ്യത്യാസങ്ങൾ ഉന്നയിക്കാൻ പാർട്ടിയിൽ ആവശ്യമായ വേദികളുണ്ടെന്നും കെ.സി. വേണുഗോപാൽ വ്യക്തമാക്കി.
തന്റെ പേരിനൊപ്പം ചിലരുടെ വ്യക്തിപരമായ അഭിപ്രായങ്ങൾ കൂട്ടിക്കെട്ടാനുള്ള ശ്രമങ്ങൾ വേണ്ടെന്നും അദ്ദേഹം പറഞ്ഞു. കഴിഞ്ഞ നാലുമാസമായി സർക്കാരിനെതിരായ കാര്യങ്ങൾ പ്രോത്സാഹിപ്പിക്കുന്ന നിലപാട് താൻ സ്വീകരിച്ചിട്ടില്ലെന്നും കെ.സി. വേണുഗോപാൽ വ്യക്തമാക്കി.
പാർട്ടിക്കുള്ളിലെ ചെറിയ അഭിപ്രായ വ്യത്യാസങ്ങൾ നേതാക്കൾ ഒരുമിച്ചിരുന്ന് ചർച്ച ചെയ്ത് പരിഹരിക്കുമെന്നും അദ്ദേഹം പറഞ്ഞു. വിഷയത്തിൽ ആരും ആശങ്കപ്പെടേണ്ടതില്ലെന്നും ജനങ്ങൾ ഏറെ പ്രതീക്ഷയോടെ നോക്കുന്ന സർക്കാരാണിതെന്നും ആ പ്രതീക്ഷകൾ നിറവേറ്റാൻ ഒറ്റക്കെട്ടായി മുന്നോട്ടുപോകുമെന്നും കെ.സി. വേണുഗോപാൽ വ്യക്തമാക്കി.
അതിനിടെ, മുഖ്യമന്ത്രി വി.ഡി. സതീശനെതിരെ അടൂർ പ്രകാശ് ഉന്നയിച്ച വിമർശനങ്ങൾ കോൺഗ്രസിനുള്ളിൽ ചർച്ചയായിരിക്കുകയാണ്. യുഡിഎഫിൽ കൂടിയാലോചനകൾ നടക്കുന്നില്ലെന്നും ചില തീരുമാനങ്ങൾ മാധ്യമങ്ങളിലൂടെയാണ് അറിയുന്നതെന്നുമായിരുന്നു അടൂർ പ്രകാശിന്റെ പ്രധാന ആരോപണങ്ങൾ.
