‘അടുത്ത മുഖ്യമന്ത്രി ഡി.കെ ശിവകുമാർ’; പോസ്റ്ററോടെ കർണാടക കോൺഗ്രസിൽ വീണ്ടും ചർച്ച

ബംഗളൂരു: കർണാടകയിൽ വീണ്ടും മുഖ്യമന്ത്രി പദത്തെ ചൊല്ലിയുള്ള ചർച്ചകൾ ശക്തമാകുന്നു. D. K. Shivakumar ഡി.കെ ശിവകുമാറിന്റെ പിറന്നാളിനോടനുബന്ധിച്ച് ബംഗളൂരുവിലെ വിവിധ ഭാഗങ്ങളിൽ ‘അടുത്ത മുഖ്യമന്ത്രി ഡി.കെ ശിവകുമാർ’ എന്നെഴുതിയ പോസ്റ്ററുകൾ പ്രത്യക്ഷപ്പെട്ടു.

ശിവകുമാറിന്റെ അനുയായികളാണ് പോസ്റ്ററുകൾ സ്ഥാപിച്ചതെന്നാണ് വിവരം. ഇതോടെ കോൺഗ്രസിനകത്തെ അധികാരമാറ്റ ചർച്ചകൾ വീണ്ടും സജീവമായി.

Siddaramaiah സിദ്ധരാമയ്യയും ഡി.കെ ശിവകുമാറും തമ്മിൽ 2023-ൽ അധികാരമേൽക്കുമ്പോൾ രണ്ടര വർഷത്തിന് ശേഷം മുഖ്യമന്ത്രിസ്ഥാനം കൈമാറുമെന്ന ധാരണ ഉണ്ടായിരുന്നുവെന്ന റിപ്പോർട്ടുകൾ നേരത്തേ പുറത്തുവന്നിരുന്നു. ഇതിന്റെ പശ്ചാത്തലത്തിലാണ് കഴിഞ്ഞ മാസങ്ങളായി അധികാരമാറ്റ ചർച്ചകൾ ശക്തമായത്.

ഡി.കെ ശിവകുമാറിനെ മുഖ്യമന്ത്രിയാക്കണമെന്ന് നിരവധി എംഎൽഎമാർ പരസ്യമായി പിന്തുണ പ്രഖ്യാപിച്ചിട്ടുണ്ട്. അതേസമയം ഭരണം സ്ഥിരതയോടെ മുന്നോട്ട് പോകാൻ സിദ്ധരാമയ്യ തന്നെ തുടരണമെന്നാണ് അദ്ദേഹത്തെ അനുകൂലിക്കുന്നവരുടെ നിലപാട്.

K. C. Venugopal കെ.സി വേണുഗോപാൽ ഉൾപ്പെടെയുള്ള എഐസിസി നേതാക്കൾ വിഷയത്തിന്റെ സ്ഥിതിഗതികൾ നിരീക്ഷിക്കുന്നതായാണ് വിവരം. മന്ത്രിസഭാ പുനഃസംഘടനയോ അധികാരമാറ്റമോ ഉടൻ ഉണ്ടാകുമോയെന്നതിൽ രാഷ്ട്രീയ വൃത്തങ്ങളിൽ ആകാംക്ഷ തുടരുകയാണ്.