‘പ്ലാൻ 63’ വീണ്ടും ചർച്ചയിൽ; പഴയ കോൺഗ്രസ് വാർത്ത സോഷ്യൽ മീഡിയയിൽ വൈറൽ

തിരുവനന്തപുരം: കേരളത്തിലെ മുഖ്യമന്ത്രി സ്ഥാനത്തെ ചൊല്ലിയുള്ള കോൺഗ്രസ് ഉൾപ്പാർട്ടി ചർച്ചകൾ തുടരുന്നതിനിടെ, 2025 ജനുവരി 23ന് പുറത്തുവന്ന ഒരു പഴയ വാർത്ത വീണ്ടും സോഷ്യൽ മീഡിയയിൽ വൈറലാകുന്നു.

‘സതീശന്റെ ‘പ്ലാൻ 63’ന് ഹൈക്കമാൻഡ് പിന്തുണ, നിലപാടറിയിച്ച് സതീശൻ’ എന്ന തലക്കെട്ടിൽ പുറത്തുവന്ന വാർത്തയാണ് ഇപ്പോൾ വീണ്ടും ശ്രദ്ധ നേടുന്നത്.

2026 നിയമസഭാ തെരഞ്ഞെടുപ്പിൽ കോൺഗ്രസിന് 63 സീറ്റ് എന്ന ലക്ഷ്യം മുൻനിർത്തി പ്രതിപക്ഷ നേതാവ് വി.ഡി. സതീശൻ തയ്യാറാക്കിയ തന്ത്രമാണ് ‘പ്ലാൻ 63’ എന്നാണ് വാർത്തയിൽ പറയുന്നത്. 2001ലെ കോൺഗ്രസ് പ്രകടനം ആവർത്തിക്കുകയെന്ന ലക്ഷ്യത്തോടെ ശക്തമായ സീറ്റുകളിൽ കേന്ദ്രീകരിച്ച് പ്രവർത്തിക്കണമെന്ന നിലപാടാണ് സതീശൻ ഹൈക്കമാൻഡിനെ അറിയിച്ചതെന്നും റിപ്പോർട്ടിലുണ്ട്.

ഈ പദ്ധതിക്കെതിരെ അന്നത്തെ രാഷ്ട്രീയകാര്യ സമിതിയിൽ തന്നെ വിമർശനങ്ങൾ ഉയർന്നിരുന്നുവെന്നും വിവരങ്ങളുണ്ട്. ഒറ്റയ്ക്ക് തീരുമാനമെടുക്കുന്ന ശൈലിയാണെന്നായിരുന്നു ചില നേതാക്കളുടെ ആരോപണം.

എന്നാൽ ഇപ്പോൾ കോൺഗ്രസിലെ നേതൃത്വ ചർച്ചകൾ വീണ്ടും ചൂടുപിടിച്ചതോടെ, ‘പ്ലാൻ 63’ സംബന്ധിച്ച പഴയ വാർത്ത സോഷ്യൽ മീഡിയയിൽ വീണ്ടും വൈറലായി. സതീശന്റെ ദീർഘവീക്ഷണത്തിന് പിന്തുണ അറിയിച്ച് അനുകൂലികൾ രംഗത്തെത്തുന്നുമുണ്ട്.