മഴ ശക്തമാകും പല ജില്ലകളിൽ യെല്ലോ അലർട്ട്; യാത്രക്കും കൃഷിക്കും ജാഗ്രത നിർദേശം

തിരുവനന്തപുരം: സംസ്ഥാനത്ത് പ്രീ-മൺസൂൺ മഴ ശക്തമാകുമെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. മഴ ശക്തമാകുന്ന സാഹചര്യത്തിൽ ഇന്ന് കോട്ടയം, ഇടുക്കി, മലപ്പുറം, വയനാട് ജില്ലകളിൽ യെല്ലോ അലർട്ട് പ്രഖ്യാപിച്ചു. ശനിയാഴ്ച ആലപ്പുഴ, കോട്ടയം, എറണാകുളം, ഇടുക്കി, കോഴിക്കോട്, വയനാട്, കണ്ണൂർ ജില്ലകളിലും മുന്നറിയിപ്പ് തുടരാനാണ് സാധ്യത.

24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കാമെന്നാണ് മുന്നറിയിപ്പ്. മഴയ്‌ക്കൊപ്പം ശക്തമായ കാറ്റും വൈകുന്നേരങ്ങളിൽ ഇടിമിന്നലും ഉണ്ടാകാൻ സാധ്യതയുണ്ടെന്നും കാലാവസ്ഥ വകുപ്പ് അറിയിച്ചു. ചില പ്രദേശങ്ങളിൽ മണിക്കൂറുകൾക്കുള്ളിൽ ശക്തമായ മഴ ലഭിക്കാനും സാധ്യതയുണ്ട്.

സംസ്ഥാനത്ത് അടുത്ത അഞ്ച് ദിവസവും മഴ തുടരുമെന്നാണ് വിലയിരുത്തൽ. ശക്തമായ കാറ്റ് മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ വീശാൻ സാധ്യതയുള്ളതിനാൽ മരങ്ങൾക്കടുത്തും വൈദ്യുതി ലൈനുകൾക്കരികിലും ജാഗ്രത പാലിക്കണമെന്ന് അധികൃതർ നിർദേശിച്ചു.

കർഷകരും യാത്രക്കാരും പ്രത്യേക ജാഗ്രത പാലിക്കണമെന്നാണ് മുന്നറിയിപ്പ്. താഴ്ന്ന പ്രദേശങ്ങളിൽ വെള്ളക്കെട്ടിനും, മലനിരകളിൽ മണ്ണിടിച്ചിലിനും സാധ്യതയുള്ളതിനാൽ മുൻകരുതൽ സ്വീകരിക്കണം. വൈകുന്നേര യാത്രകൾ ഒഴിവാക്കുകയും ഇടിമിന്നൽ സമയത്ത് സുരക്ഷിതമായ കെട്ടിടങ്ങളിൽ അഭയം തേടുകയും വേണം.

മത്സ്യബന്ധനത്തിന് നിലവിൽ പ്രത്യേക വിലക്ക് ഇല്ലെങ്കിലും കാലാവസ്ഥാ മാറ്റങ്ങൾ നിരന്തരം നിരീക്ഷിക്കണമെന്ന് മുന്നറിയിപ്പ് നൽകിയിട്ടുണ്ട്. മഴ ശക്തമാകുന്നതിനാൽ പൊതുജനങ്ങൾ അനാവശ്യ യാത്രകൾ പരമാവധി ഒഴിവാക്കുന്നതാണ് ഉചിതമെന്ന് ദുരന്തനിവാരണ വിഭാഗവും അറിയിച്ചു.പ്രീ-മൺസൂൺ മഴ ശക്തമാകുന്ന സാഹചര്യത്തിൽ കേരളം മുഴുവൻ ജാഗ്രതയോടെ തുടരുകയാണ്.