മുഖ്യമന്ത്രി കസേരയ്ക്കായി വടംവലി;ഹൈക്കമാൻഡിന് കത്തുമായി ബെന്നി ബെഹ്നാൻ
തിരുവനന്തപുരം: കേരളത്തിൽ വരാനിരിക്കുന്ന നിയമസഭാ തിരഞ്ഞെടുപ്പിൽ യുഡിഎഫ് വലിയ വിജയം നേടുമെന്ന വിലയിരുത്തലുകൾക്കിടെ, കോൺഗ്രസിനുള്ളിൽ മുഖ്യമന്ത്രി സ്ഥാനത്തെച്ചൊല്ലിയുള്ള തർക്കം പരസ്യമാകുന്നു. പാർട്ടിക്കുള്ളിലെ ‘മുഖ്യമന്ത്രി മോഹികൾക്കെതിരെ’ ശക്തമായ നടപടി ആവശ്യപ്പെട്ട് മുതിർന്ന നേതാവും എംപിയുമായ ബെന്നി ബെഹ്നാൻ എഐസിസി അധ്യക്ഷൻ മല്ലികാർജുൻ ഖർഗെയ്ക്ക് കത്തയച്ചു. അധികാരത്തിലെത്തുന്നതിന് മുൻപേ നടത്തുന്ന ഇത്തരം അവകാശവാദങ്ങൾ ജനവിധിക്ക് വിരുദ്ധമാണെന്നും പാർട്ടിക്ക് ദോഷം ചെയ്യുമെന്നും അദ്ദേഹം കത്തിൽ ചൂണ്ടിക്കാട്ടി.
യുഡിഎഫിന് ഭരണസാധ്യതയുണ്ടെന്ന നിഗമനത്തിൽ പല പ്രമുഖ നേതാക്കളും മുഖ്യമന്ത്രി പദം ലക്ഷ്യം വെച്ച് നീക്കങ്ങൾ തുടങ്ങിയിട്ടുണ്ട്. എറണാകുളം ജില്ലയിൽ നിന്ന് മുഖ്യമന്ത്രിയുണ്ടാകണമെന്ന ഡിസിസി അധ്യക്ഷൻ മുഹമ്മദ് ഷിയാസിന്റെ പ്രസ്താവന ചർച്ചകൾക്ക് ആക്കം കൂട്ടിയിരുന്നു. ഇതിന് പിന്നാലെയാണ് ഹൈക്കമാൻഡ് ഇടപെടണമെന്ന ആവശ്യവുമായി യുഡിഎഫ് കൺവീനർ കൂടിയായ ബെന്നി ബെഹ്നാൻ രംഗത്തെത്തിയത്. ഇത്തരം പരസ്യമായ ചർച്ചകൾ കോൺഗ്രസിന് വോട്ട് ചെയ്ത ജനങ്ങളെ അവഹേളിക്കുന്നതാണെന്നും ഇത് ‘നാണംകെട്ട രീതി’യാണെന്നും കത്തിൽ വിമർശിക്കുന്നു
ഇതിനിടെ എഐസിസി ജനറൽ സെക്രട്ടറി കെ.സി. വേണുഗോപാലിനെതിരെ തമിഴ്നാട് മഹിളാ കോൺഗ്രസ് മുൻ അധ്യക്ഷ ഹസീന സയിദ് ഉന്നയിച്ച ആരോപണങ്ങൾ പാർട്ടിയെ കൂടുതൽ പ്രതിരോധത്തിലാക്കി. കേരളത്തിൽ മുഖ്യമന്ത്രിയാകാൻ വേണ്ടി കെ.സി. വേണുഗോപാൽ തമിഴ്നാട്ടിൽ ഡിഎംകെ സഖ്യം വിട്ട് നടൻ വിജയിയുടെ പാർട്ടിയുമായി സഖ്യത്തിന് ശ്രമിച്ചെന്നാണ് ഹസീനയുടെ വെളിപ്പെടുത്തൽ. വിജയ് ആരാധകരുടെ പിന്തുണ കേരളത്തിൽ മുഖ്യമന്ത്രിയാകാൻ സഹായിക്കുമെന്ന് അദ്ദേഹം വിശ്വസിച്ചതായും, ഇതിന്റെ ഭാഗമായി രാഹുൽ ഗാന്ധി അംഗീകരിച്ച സ്ഥാനാർത്ഥി പട്ടിക പോലും അട്ടിമറിച്ചതായും ഹസീന ആരോപിച്ചു.
ചെന്നൈ വിമാനത്താവളത്തിൽ വെച്ച് ഇതുമായി ബന്ധപ്പെട്ട് കോൺഗ്രസ് നേതാക്കൾ തമ്മിൽ വാക്കേറ്റമുണ്ടായതായും ഹസീന സയിദ് വെളിപ്പെടുത്തി. തിരഞ്ഞെടുപ്പ് അടുത്തിരിക്കെ പാർട്ടിക്കുള്ളിലെ ഈ ഗ്രൂപ്പ് പോരും അധികാര വടംവലിയും ഹൈക്കമാൻഡിന് വലിയ തലവേദനയാണ് സൃഷ്ടിക്കുന്നത്. വരും ദിവസങ്ങളിൽ കെ.പി.സി.സി ഈ വിഷയത്തിൽ എന്ത് നിലപാട് സ്വീകരിക്കുമെന്നാണ് രാഷ്ട്രീയ കേരളം ഉറ്റുനോക്കുന്നത്.
