പിക്സൽ 11 സീരീസ് വരുന്നു: പുതിയ ടെൻസർ G6 ചിപ്സെറ്റോടെ ഗൂഗിളിന്റെ കരുത്ത് കൂടി
ടെക് ലോകത്ത് വീണ്ടും ചർച്ചയായി Googleന്റെ പിക്സൽ സ്മാർട്ട്ഫോൺ പരമ്പര. പിക്സൽ 10 സീരീസിന്റെ വിജയത്തിന് പിന്നാലെ, അടുത്ത തലമുറയായ പിക്സൽ 11 സീരീസിനായുള്ള കാത്തിരിപ്പിലാണ് സാങ്കേതിക ലോകം.
പുതിയ സീരീസിൽ ഗൂഗിൾ സ്വന്തമായി വികസിപ്പിച്ച കൂടുതൽ കരുത്തുറ്റ ടെൻസർ G6 ചിപ്സെറ്റ് അവതരിപ്പിക്കുമെന്നാണ് റിപ്പോർട്ടുകൾ. മുൻതലമുറയിലെ ടെൻസർ G5-നേക്കാൾ മികച്ച പ്രകടനവും കാര്യക്ഷമതയും ഉറപ്പാക്കുന്ന രീതിയിലാണ് ഈ പുതിയ ചിപ്പ് രൂപകൽപ്പന ചെയ്യുന്നതെന്നാണ് സൂചന.
ടെൻസർ G6 ചിപ്സെറ്റിൽ ഏഴ് കോർ സിപിയുവും 4.11GHz വരെ ക്ലോക്ക് സ്പീഡ് നൽകുന്ന പ്രൈം കോറും ഉൾപ്പെടും. ഇതിലൂടെ ഫോണിന്റെ വേഗതയും മൾട്ടി-ടാസ്കിംഗ് കഴിവും ഗണ്യമായി വർധിക്കുമെന്നാണ് വിലയിരുത്തൽ. കൂടാതെ, പവർവിആർ സി-സീരീസ് ജിപിയു ഉൾപ്പെടുത്തുന്നതോടെ ഗെയിമിംഗിലും ഗ്രാഫിക്സ് ജോലികളിലും മെച്ചപ്പെട്ട അനുഭവം ലഭിക്കുമെന്നാണ് പ്രതീക്ഷ.
പിക്സൽ 11, പിക്സൽ 11 പ്രോ, പിക്സൽ 11 പ്രോ എക്സ്എൽ എന്നീ മോഡലുകളിലായിരിക്കും ഈ പുതിയ ചിപ്സെറ്റ് ഉപയോഗിക്കുക. 6.3 ഇഞ്ച് എൽടിപിഒ അമോലെഡ് ഡിസ്പ്ലേ, 12GB റാം, 5,000mAh ബാറ്ററി തുടങ്ങിയ സവിശേഷതകളും അടിസ്ഥാന മോഡലിൽ തന്നെ ലഭിക്കുമെന്ന് റിപ്പോർട്ടുകൾ സൂചിപ്പിക്കുന്നു.
ക്യൂബ്സ്, ഗ്രിസ്ലി, കൊഡിയാക്ക് എന്നീ രഹസ്യനാമങ്ങളിലാണ് ഈ ഫോണുകൾ വികസിപ്പിക്കുന്നത്. പുതിയ സീരീസ് സ്മാർട്ട്ഫോൺ വിപണിയിൽ ഗൂഗിളിന്റെ സാന്നിധ്യം കൂടുതൽ ശക്തിപ്പെടുത്തുമെന്നാണ് വിലയിരുത്തൽ.
