വെള്ളാപ്പള്ളി സന്ദർശനത്തിൽ മന്ത്രി ബിന്ദു കൃഷ്ണയ്ക്ക് വിമർശനം; ഫേസ്ബുക്ക് പോസ്റ്റുമായി സി.കെ. ശാക്കിർ
കോഴിക്കോട്: എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശനെ സന്ദർശിച്ച സംസ്ഥാന മന്ത്രി ബിന്ദു കൃഷ്ണക്കെതിരെ രൂക്ഷ വിമർശനവുമായി യൂത്ത് ലീഗ് ദേശീയ സെക്രട്ടറി സി.കെ. ശാക്കിർ. യുഡിഎഫ് നേതാക്കളെ നിരന്തരം അധിക്ഷേപിക്കുന്നവരുമായി അടുപ്പം കാണിക്കുന്നത് നിസാരമായി കാണാനാകില്ലെന്ന് അദ്ദേഹം ഫേസ്ബുക്കിൽ കുറിച്ചു.
യുഡിഎഫ് നേതാക്കളെ പരസ്യമായി വിമർശിക്കുകയും അധിക്ഷേപിക്കുകയും ചെയ്ത വ്യക്തിയെ നേരിട്ട് സന്ദർശിച്ചതിനെ ജനാധിപത്യ ബോധമുള്ളവർക്ക് ഉൾക്കൊള്ളാനാകില്ലെന്നാണ് ശാക്കിറിന്റെ വിമർശനം. നിലവിലെ സർക്കാർ അധികാരം നേടിയതിനു പിന്നിൽ നിരവധി പ്രവർത്തകരുടെ ത്യാഗവും പോരാട്ടവുമുണ്ടെന്ന കാര്യം മന്ത്രി ഓർക്കണമെന്നും അദ്ദേഹം പറഞ്ഞു.
യുഡിഎഫ് ഇന്ന് അധികാരത്തിലിരിക്കുന്നത് ദീർഘകാല രാഷ്ട്രീയ പോരാട്ടങ്ങളുടെയും പ്രവർത്തകരുടെ സമർപ്പണത്തിന്റെയും ഫലമായാണെന്നും അത് മറക്കരുതെന്നും ശാക്കിർ തന്റെ കുറിപ്പിൽ ചൂണ്ടിക്കാട്ടി.
വെള്ളാപ്പള്ളി നടേശനുമായുള്ള കൂടിക്കാഴ്ചയെ ചുറ്റിപ്പറ്റിയ വിവാദങ്ങളിൽ നിന്ന് ലോക ക്ഷീരദിനാശംസകൾ നേർന്ന് ശ്രദ്ധ തിരിക്കാമെന്ന് കരുതേണ്ടെന്നും അദ്ദേഹം പരിഹാസരൂപേണ കുറിച്ചു.
സംസ്ഥാനത്ത് യുഡിഎഫ് സർക്കാർ അധികാരത്തിലെത്തിയതിന് ശേഷം വിവിധ സമുദായ സംഘടനാ നേതാക്കളെ മന്ത്രിമാർ സന്ദർശിക്കുന്നത് പതിവായിരുന്നുവെങ്കിലും, യുഡിഎഫ് നേതാക്കളെതിരെ കടുത്ത വിമർശനങ്ങൾ ഉന്നയിച്ചിട്ടുള്ള വെള്ളാപ്പള്ളി നടേശനുമായുള്ള മന്ത്രി ബിന്ദു കൃഷ്ണയുടെ കൂടിക്കാഴ്ചയാണ് ഇപ്പോൾ രാഷ്ട്രീയ ചർച്ചകൾക്ക് വഴിവെച്ചിരിക്കുന്നത്.
