അനുമോളുടെ കുടുംബസ്നേഹവും ഉത്തരവാദിത്തവും; മല്ലിക സുകുമാരന്റെ ഹൃദയസ്പർശിയായ വാക്കുകൾ
ബിഗ് ബോസ് മലയാളം സീസൺ 7 വിജയിയും നടിയുമായ അനുമോളെ പ്രശംസിച്ച് നടി മല്ലിക സുകുമാരൻ. രണ്ടര വർഷത്തോളം ടെലിവിഷൻ പരമ്പരയിൽ ഒരുമിച്ച് അഭിനയിച്ച അനുഭവത്തിന്റെ അടിസ്ഥാനത്തിലാണ് മല്ലികയുടെ പ്രതികരണം.
കഷ്ടപ്പെട്ട് കുടുംബം നോക്കുന്ന ഉത്തരവാദിത്തമുള്ള ആളാണ് അനുമോളെന്ന് മല്ലിക സുകുമാരൻ പറഞ്ഞു. ബിഗ് ബോസിനിടയിലും അനുമോൾ ഇമോഷണലായ സ്വഭാവം കാണിച്ചിരുന്നുവെന്നും പലപ്പോഴും കരച്ചിലിലേക്ക് പോകുന്ന സ്വഭാവം ഉണ്ടായിരുന്നുവെന്നും അവർ ഓർമ്മിപ്പിച്ചു.
“എന്തിനാണ് ഇങ്ങനെ ദേഷ്യപ്പെടുന്നത് എന്ന് ഞാൻ അവളോട് ചോദിച്ചിട്ടുണ്ട്. കണ്ടന്റ് പറയുമ്പോ അറിയാതെ അങ്ങനെ വരുന്നതാണെന്ന് അവൾ പറയും,” എന്ന് മല്ലിക സുകുമാരൻ വ്യക്തമാക്കി. ഷൂട്ടിംഗ് സമയങ്ങളിലും അനുമോൾ പലപ്പോഴും വികാരാധീനയായിരുന്നതായും അവർ പറഞ്ഞു.
കുടുംബത്തിനായി വലിയ ഉത്തരവാദിത്തങ്ങൾ അനുമോൾ വഹിക്കുന്നുവെന്നും അച്ഛൻ, അമ്മ, സഹോദരി ഉൾപ്പെടെയുള്ളവരുടെ കാര്യങ്ങൾ ശ്രദ്ധയോടെ നോക്കുന്നുണ്ടെന്നും മല്ലിക സുകുമാരൻ ചൂണ്ടിക്കാട്ടി. “അത് കണ്ടപ്പോൾ ദൈവം അവൾക്ക് അത്രയും നേട്ടങ്ങൾ നൽകിയതാണെന്ന് തോന്നിയിട്ടുണ്ട്,” എന്നും അവർ കൂട്ടിച്ചേർത്തു.
മുൻ അഭിമുഖങ്ങളിലും അനുമോളുടെ കുടുംബസ്നേഹവും ഉത്തരവാദിത്തബോധവും മല്ലിക സുകുമാരൻ പരാമർശിച്ചിട്ടുണ്ട്.
