തേവര പാലത്തിൽ വൻ അപകടം; കൈവരി തകർത്ത് കായലിന് മുകളിൽ തൂങ്ങി ലോറി
കൊച്ചി തേവര പാലത്തിൽ ലോറി അപകടത്തിൽപ്പെട്ടു. കുണ്ടന്നൂരിൽ നിന്ന് ഐലൻഡ് ഭാഗത്തേക്ക് പോവുകയായിരുന്ന ലോറിയാണ് നിയന്ത്രണം വിട്ട് പാലത്തിന്റെ കൈവരികൾ തകർത്ത് കായലിലേക്ക് തൂങ്ങിനിൽക്കുന്നത്. ലോറിയുടെ പകുതിയോളം ഭാഗം കായലിലേക്ക് ഉന്തിനിൽക്കുന്ന അവസ്ഥയിലാണ് നിലവിലുള്ളത്. അപകടം നടക്കുന്ന സമയത്ത് ലോറിയിൽ ഡ്രൈവർ മാത്രമാണുണ്ടായിരുന്നത്. വാഹനം താഴേക്ക് പതിക്കുന്നതിന് തൊട്ടുമുൻപ് അദ്ദേഹം അത്ഭുതകരമായി പുറത്തേക്ക് ചാടി രക്ഷപ്പെടുകയായിരുന്നു.
എങ്ങനെയാണ് ലോറിയുടെ നിയന്ത്രണം നഷ്ടപ്പെട്ടതെന്ന കാര്യത്തിൽ ഇതുവരെ കൃത്യമായ വിവരങ്ങൾ ലഭ്യമായിട്ടില്ല. അപകടത്തെ തുടർന്ന് തേവര പാലത്തിലും പരിസര പ്രദേശങ്ങളിലും കടുത്ത ഗതാഗതക്കുരുക്കാണ് അനുഭവപ്പെടുന്നത്. നിലവിൽ ഇവിടെ കർശനമായ ഗതാഗത നിയന്ത്രണം ഏർപ്പെടുത്തിയിട്ടുണ്ട്. കായലിലേക്ക് തൂങ്ങിനിൽക്കുന്ന ലോറി ക്രെയിൻ ഉപയോഗിച്ച് സുരക്ഷിതമായി പുറത്തെടുക്കാനുള്ള ശ്രമങ്ങൾ ദ്രുതഗതിയിൽ പുരോഗമിക്കുകയാണ്. ട്രാഫിക് പോലീസും ഫയർഫോഴ്സും സംഭവസ്ഥലത്ത് ക്യാമ്പ് ചെയ്താണ് രക്ഷാപ്രവർത്തനങ്ങൾ ഏകോപിപ്പിക്കുന്നത്.
