അസമിൽ ഇന്ത്യൻ വ്യോമസേനയുടെ എഎൻ-32 വിമാനത്തിന് തീപിടിച്ചു; ലാൻഡിംഗിന് പിന്നാലെ അപകടം

അസമിലെ ജോർഹട്ടിൽ ഇന്ത്യൻ വ്യോമസേനയുടെ എഎൻ-32 ട്രാൻസ്പോർട്ട് വിമാനത്തിന് ലാൻഡിംഗിന് പിന്നാലെ തീപിടിച്ച് അപകടം. ലാൻഡ് ചെയ്തതിന് ശേഷം നിയന്ത്രണം നഷ്ടപ്പെട്ട വിമാനം റൺവേയ്ക്ക് സമീപത്തെ തുറസായ സ്ഥലത്തേക്ക് തെന്നിമാറി തകർന്നുവീഴുകയായിരുന്നുവെന്നാണ് പ്രാഥമിക വിവരം. തുടർന്ന് വിമാനത്തിൽ തീപിടിക്കുകയും ചെയ്തു.

ജോർഹട്ട് വ്യോമസേനാ താവളത്തിൽ ലാൻഡിംഗിന് ശ്രമിക്കുന്നതിനിടെയാണ് അപകടമുണ്ടായത്. വടക്കുകിഴക്കൻ ഇന്ത്യയിലെ പ്രധാന വ്യോമസേനാ കേന്ദ്രങ്ങളിലൊന്നിന് സമീപം നടന്ന അപകടത്തിന്റെ കൃത്യമായ കാരണം ഇതുവരെ വ്യക്തമല്ല. സംഭവത്തെക്കുറിച്ച് വ്യോമസേനാ അധികൃതർ വിശദമായ അന്വേഷണം ആരംഭിച്ചിട്ടുണ്ട്.

അപകടത്തിൽ പൈലറ്റിന്റെ ആരോഗ്യനില സംബന്ധിച്ച ഔദ്യോഗിക വിവരങ്ങൾ ഇതുവരെ പുറത്തുവന്നിട്ടില്ല. അതേസമയം, പൈലറ്റ് അപകടത്തിൽ കൊല്ലപ്പെട്ടിരിക്കാമെന്ന തരത്തിലുള്ള റിപ്പോർട്ടുകൾ ചില ദേശീയ മാധ്യമങ്ങൾ പുറത്തുവിടുന്നുണ്ടെങ്കിലും ഇത് സംബന്ധിച്ച് ഔദ്യോഗിക സ്ഥിരീകരണമില്ല.

ഇന്ത്യൻ വ്യോമസേന വ്യാപകമായി ഉപയോഗിക്കുന്ന പ്രധാന ട്രാൻസ്പോർട്ട് വിമാനങ്ങളിലൊന്നാണ് എഎൻ-32. സൈനിക നീക്കങ്ങൾ, ലോജിസ്റ്റിക്സ് ദൗത്യങ്ങൾ, അടിയന്തര സഹായ പ്രവർത്തനങ്ങൾ എന്നിവയിൽ നിർണായക പങ്കുവഹിക്കുന്ന ഈ വിമാനത്തിന് 1986ന് ശേഷം ഇന്ത്യയിൽ നിരവധി അപകടങ്ങൾ റിപ്പോർട്ട് ചെയ്തിട്ടുണ്ട്. ലഭ്യമായ കണക്കുകൾ പ്രകാരം ഇതുവരെ 22ഓളം എഎൻ-32 അപകടങ്ങളാണ് രേഖപ്പെടുത്തിയിട്ടുള്ളത്.

കഴിഞ്ഞ കുറച്ച് മാസങ്ങൾക്ക് മുൻപ് അസമിൽ തന്നെ ഇന്ത്യൻ വ്യോമസേനയുടെ സുഖോയ്-30 എംകെഐ യുദ്ധവിമാനം പരിശീലന പറക്കലിനിടെ തകർന്നുവീണിരുന്നു. ജോർഹട്ട് എയർബേസിൽ നിന്ന് ഏകദേശം 60 കിലോമീറ്റർ അകലെയുള്ള കർബി ആംഗ്ലോങ് ജില്ലയിലെ ഇംഗ്ലോങ് എകോപി കുന്നിൻപ്രദേശത്തായിരുന്നു ആ അപകടം. ആ സംഭവത്തിന് പിന്നാലെയാണ് വീണ്ടും അസമിൽ വ്യോമസേനാ വിമാനാപകടം റിപ്പോർട്ട് ചെയ്യപ്പെടുന്നത്.