മൂന്നാം മോദി സർക്കാരിലെ ആദ്യ രാജി; പ്രതിഷേധം ശക്തമായതോടെ കേന്ദ്രത്തിന്റെ നിർണായക നീക്കം
ഡൽഹി: നീറ്റ് പരീക്ഷാ ക്രമക്കേടിലും ചോദ്യപേപ്പർ ചോർച്ചയിലും പ്രതിഷേധിച്ച് ഡൽഹി ജന്തർമന്തറിൽ രാജ്യത്തെ വിദ്യാർത്ഥികൾ നടത്തിവന്ന ശക്തമായ പ്രക്ഷോഭത്തിന് ഒടുവിൽ വഴങ്ങി കേന്ദ്ര സർക്കാർ. കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ പദവി രാജിവെച്ചു. മൂന്നാം മോദി സർക്കാരിന്റെ കാലത്ത് രാജിവെക്കുന്ന ആദ്യ കേന്ദ്രമന്ത്രിയാണ് ധർമേന്ദ്ര പ്രധാൻ. നരേന്ദ്ര മോദി സർക്കാരിന്റെ ഭരണചരിത്രത്തിൽ കേന്ദ്രമന്ത്രിമാർ രാജിവെക്കുന്നത് അപൂർവ്വമാണെന്നിരിക്കെ, ശക്തമായ ജനകീയ പ്രതിഷേധത്തെ തുടർന്ന് ഒരു മന്ത്രിക്ക് പടിയിറങ്ങേണ്ടി വന്നത് ഇന്ത്യൻ രാഷ്ട്രീയ ചരിത്രത്തിലെ തന്നെ അപൂർവ്വ സംഭവമായി മാറി.
പരീക്ഷാ തട്ടിപ്പുകൾ തടയുന്നതിൽ പരാജയപ്പെട്ടുവെന്ന ആരോപണം ശക്തമായ സാഹചര്യത്തിൽ, സി.ജെ.പി പ്രവർത്തകരുടെ നേതൃത്വത്തിൽ ജന്തർമന്തറിൽ ആരംഭിച്ച പ്രതിഷേധം രാജ്യവ്യാപകമാകാൻ തുടങ്ങിയതോടെയാണ് സർക്കാർ പ്രതിരോധത്തിലായത്. സി.ജെ.പി ഉന്നയിച്ച മൂന്ന് പ്രധാന ആവശ്യങ്ങളിൽ ഒന്നായിരുന്നു വിദ്യാഭ്യാസമന്ത്രിയുടെ രാജി.
തുടക്കത്തിൽ മന്ത്രിയെ മാറ്റാൻ കേന്ദ്രം തയാറായിരുന്നില്ലെങ്കിലും സി.ജെ.പിയുമായുള്ള ചർച്ചയ്ക്ക് തൊട്ടുമുമ്പ് ധർമേന്ദ്ര പ്രധാൻ രാജി സമർപ്പിക്കുകയായിരുന്നു. സാധാരണയായി മന്ത്രിസഭാ പുനഃസംഘടനകളുടെ ഭാഗമായി മാറ്റങ്ങൾ വരുത്താറുണ്ടെങ്കിലും, അപാകതകളുടെ ഉത്തരവാദിത്തം ഏറ്റെടുത്തുള്ള രാജികൾ മോദി സർക്കാരിൽ വളരെ കുറവാണ്. മുൻകാലങ്ങളിലെ മാറ്റങ്ങൾ അധികവും രാഷ്ട്രീയ തന്ത്രങ്ങളുടെ ഭാഗമായിരുന്നെങ്കിൽ, ധർമേന്ദ്ര പ്രധാന്റെ രാജി പൂർണ്ണമായും വിദ്യാർത്ഥികളുടെയും യുവാക്കളുടെയും ജനകീയ സമരത്തിന് ലഭിച്ച വൻ വിജയമായാണ് വിലയിരുത്തപ്പെടുന്നത്.
