ബോർഡ്–കോർപ്പറേഷൻ വിഭജനത്തിൽ കോൺഗ്രസിൽ അതൃപ്തി പുകയുന്നു; മുഖ്യമന്ത്രിക്കും കെപിസിസി പ്രസിഡന്റിനും എ ഗ്രൂപ്പിന്റെ പരാതി!
തിരുവനന്തപുരം: ബോർഡ്, കോർപ്പറേഷൻ സ്ഥാനങ്ങളുടെ വിഭജനത്തിൽ മുഖ്യമന്ത്രി വി.ഡി.സതീശനെയും കെ.പി.സി.സി പ്രസിഡന്റ് സണ്ണി ജോസഫിനെയും അതൃപ്തി അറിയിച്ച് കോൺഗ്രസ് എ ഗ്രൂപ്പ്. കോൺഗ്രസ് അദ്ധ്യക്ഷനെയും സംഘടനാ ചുമതലയുള്ള ജനറൽ സെക്രട്ടറി കെ.സി. വേണുഗോപാലിനെയും കേരളത്തിന്റെ ചുമതലയുള്ള ജനറൽ സെക്രട്ടറി ദീപാദാസ് മുൻഷിയെയും പരാതി അറിയിച്ചേക്കുമെന്നാണ് വിവരം.
ബോർഡ് കോർപ്പറേഷൻ വിഭജനത്തിൽ വി.ഡി. സതീശൻ, രമേശ് ചെന്നിത്തല, സണ്ണി ജോസഫ് എന്നിവരാണ് ക്ലിഫ് ഹൗസിൽ നടന്ന ചർച്ചയിൽ പങ്കെടുത്തത്. എ ഗ്രൂപ്പിൽ നിന്ന് ആരെയും ചർച്ചയ്ക്ക് വിളിച്ചില്ലെന്നാണ് പരാതി. 105 അദ്ധ്യക്ഷ സ്ഥാനങ്ങളിൽ കോൺഗ്രസിന് എത്രത്തോളം സ്ഥാനമാനങ്ങൾ കിട്ടുമെന്ന് അറിയിക്കുന്നില്ലെന്നും ആരെയൊക്കെ നിയമിക്കുമെന്ന് അറിയില്ലെന്നും മാനദണ്ഡങ്ങൾ അറിയിക്കുന്നില്ലെന്നും പരാതിയുണ്ട്.
തുടർച്ചയായി അവഗണിക്കപ്പെടുന്നു എന്നാണ് എ ഗ്രൂപ്പ് നേതാക്കളുടെ വിലയിരുത്തൽ. എം.എം. ഹസൻ, കെ.സി.ജോസഫ്, ബെന്നി ബഹ്‌നാൻ, ഷാഫ് പറമ്പിൽ, പി.സി. വിഷ്ണുനാഥ് തുടങ്ങിയ നേതാക്കൾ കൂടിയാലോചനകൾക്ക് ശേഷമാണ് തുടർനടപടികളിലേക്ക് കടക്കുന്നത്. ബുധനാഴ്ചയാണ് മുഖ്യമന്ത്രിയെയും കെ.പി.സി.സി അദ്ധ്യക്ഷനെയും കണ്ട് നേതാക്കൾ അതൃപ്തി അറിയിച്ചത്.
