220 കോടി ചെലവാക്കി നായയായി മാറിയ കോടീശ്വരൻ? വൈറൽ വീഡിയോയുടെ പിന്നിലെ സത്യമിതാണ്

ടോക്കിയോ: ഒരു യുവാവ് നായയായി മാറി വീഡിയോ അടുത്തിടെ സോഷ്യൽ മീഡിയയിൽ വലിയ ചർച്ചകൾക്ക് ഇടയാക്കിയിരുന്നു. ജപ്പാനിലെ ജാസോ (26)​ എന്ന കോടീശ്വരനാണ് ഇത്തരത്തിൽ രൂപമാറ്റം നടത്തിയതെന്നാണ് റിപ്പോർട്ടുകൾ പുറത്തുവന്നത്. നായയെ പോലെ മാറാൻ ഏകദേശം 2.2 ബില്യൺ (220 കോടിരൂപ)​ ചെലവിട്ടെന്നും പലരും അവകാശപ്പെടുന്നു. വീഡിയോ പെട്ടെന്ന് തന്നെ സോഷ്യൽ മീഡിയയിൽ വൈറലായി. എന്നാൽ ഇതിന്റെ സത്യമെന്തെന്നാണ് പലരും അന്വേഷിക്കുന്നത്.

യുവാവ് നിരവധി ശസ്ത്രക്രിയകൾക്ക് വിധേയനായിട്ടുണ്ടെന്നും പെരുമാറ്റം പോലും നായയെപ്പോലെയാണെന്നും പുറത്തുവന്ന വീഡിയോയിൽ അവകാശപ്പെടുന്നു. യുവാവ് ജീവിക്കുന്നതും നായയെപ്പോലെയാണെന്നാണ് ചിലർ പറഞ്ഞത്. എന്നാൽ ഈ വിവരങ്ങളൊന്നും ഔദ്യോഗിക സ്രോതസുകൾ സ്ഥിരീകരിച്ചിട്ടില്ല.എന്നാൽ ചിലർ പറയുന്നത് ഈ യുവാവ് 220 കോടി രൂപ ചെലവാക്കിയിട്ടില്ലെന്നും ശസ്ത്രക്രിയയ്ക്ക് വിധേയനായിട്ടില്ലെന്നുമാണ്. ജാപ്പനീസ് കമ്പനിയായ സെപ്പെറ്റ് തയ്യാറാക്കിയ റിയലിസ്റ്റിക് നായയുടെ വേഷമാണ് ഇതെന്നാണ് പറയപ്പെടുന്നത്.

ഏകദേശം 11-14 ലക്ഷം രൂപയാണ് ഇതിന്റെ വിലയെന്നാണ് റിപ്പോർട്ടുണ്ട്. ജാസോ എന്നൊരു കോടീശ്വരൻ ഇല്ലെന്നും വെറും 12-15 ലക്ഷത്തിന്റെ വസ്ത്രമാണിതെന്നുമാണ് ചിലർ അവകാശപ്പെടുന്നത്. ജാസോ എന്ന ഒരു യുവാവുമായി ബന്ധപ്പെട്ട മറ്റ് വിവരങ്ങൾ ഇതുവരെ ആർക്കും ലഭിച്ചിട്ടില്ല. ഇപ്പോൾ പ്രചരിക്കുന്നത് പഴയ വീഡിയോയാണെന്നും ഇത്തരത്തിൽ നായ ആക്കുന്നത് അസാദ്ധ്യമാണെന്നും വിദഗ്ധർ അവകാശപ്പെടുന്നു. ചിലർ ഇത് എഐ വീഡിയോയാണെന്നും ആരോപിക്കുന്നുണ്ട്.