ആർഎസ്എസ് പരിപാടിയിൽ വൈസ് ചാൻസലർമാർ; മാപ്പ് പറയണമെന്ന് ആവശ്യപ്പെട്ട് മുഖ്യമന്ത്രി വി.ഡി. സതീശൻ
തിരുവനന്തപുരം: ആർഎസ്എസ് സംഘടിപ്പിച്ച പരിപാടിയിൽ സംസ്ഥാനത്തെ മൂന്ന് സർവകലാശാല വൈസ് ചാൻസലർമാർ പങ്കെടുത്ത സംഭവത്തിൽ രൂക്ഷ വിമർശനവുമായി മുഖ്യമന്ത്രി വി.ഡി. സതീശൻ. ആർഎസ്എസ് ശതാബ്ദി ആഘോഷങ്ങളുടെ ഭാഗമായി സർസംഘചാലക് മോഹൻ ഭാഗവത് പങ്കെടുത്ത പ്രഭാഷണസമ്മേളനത്തിൽ വൈസ് ചാൻസലർമാർ സാന്നിധ്യം രേഖപ്പെടുത്തിയതിനെ അതീവ ഗൗരവത്തോടെയാണ് കാണുന്നതെന്ന് അദ്ദേഹം ഫേസ്ബുക്ക് കുറിപ്പിലൂടെ വ്യക്തമാക്കി.
കേരളത്തിന്റെ വിദ്യാഭ്യാസ പാരമ്പര്യത്തിനും വൈസ് ചാൻസലർ പദവിയുടെ അന്തസിനും നിരക്കാത്ത നടപടിയാണ് ഇതെന്നും മുഖ്യമന്ത്രി അഭിപ്രായപ്പെട്ടു. കേരളീയ പൊതുസമൂഹം വൈസ് ചാൻസലർ പദവിയോട് പുലർത്തുന്ന ആദരവിനെ തകർക്കുന്ന തരത്തിലാണ് ഇവർ ഒരു രാഷ്ട്രീയ-പ്രത്യയശാസ്ത്ര സംഘടനയുടെ പരിപാടിയിൽ പങ്കെടുത്തതെന്നും അദ്ദേഹം വിമർശിച്ചു.
“വർഗീയതയെ പ്രോത്സാഹിപ്പിക്കുന്ന തരത്തിലുള്ള നടപടികൾ ആരുടെ ഭാഗത്തുനിന്നുണ്ടായാലും അംഗീകരിക്കാനാവില്ല. ആർഎസ്എസ് പരിപാടിയിൽ പങ്കെടുത്ത മൂന്ന് വൈസ് ചാൻസലർമാരും കേരള സമൂഹത്തോട് മാപ്പ് പറയണം,” എന്നാണ് വി.ഡി. സതീശൻ ആവശ്യപ്പെട്ടത്.
കഴിഞ്ഞ ദിവസമാണ് ആർഎസ്എസ് പരിപാടിയിൽ അതിഥികളായി വൈസ് ചാൻസലർമാർ പങ്കെടുത്തത്. സർസംഘചാലക് മോഹൻ ഭാഗവത് പങ്കെടുത്ത ചടങ്ങിൽ കേരള സർവകലാശാല വൈസ് ചാൻസലർ മോഹനൻ കുന്നുമ്മൽ, മലയാള സർവകലാശാല വൈസ് ചാൻസലർ ഡോ. സി.ആർ. പ്രസാദ്, എം.ജി. സർവകലാശാല വൈസ് ചാൻസലർ പ്രൊഫ. ഡി. മാവൂത്ത് എന്നിവർ സന്നിഹിതരായിരുന്നു. ക്ഷണിക്കപ്പെട്ട അതിഥികൾ എന്ന നിലയിലാണ് ഇവർ ചടങ്ങിൽ പങ്കെടുത്തതെന്നാണ് ലഭിക്കുന്ന വിവരം.
വൈസ് ചാൻസലർമാരുടെ പങ്കാളിത്തം വിദ്യാഭ്യാസ മേഖലയിലും രാഷ്ട്രീയ രംഗത്തും പുതിയ വിവാദങ്ങൾക്ക് വഴിവെച്ചിരിക്കുകയാണ്.
