തിമിംഗലങ്ങളുടെ രഹസ്യം മനുഷ്യായുസ്സ് മാറ്റുമോ? 200 വർഷം ജീവിക്കാൻ സാധ്യത

ലണ്ടൻ: മനുഷ്യരുടെ ആയുസ്സ് 200 വർഷം വരെ നീളാൻ സാധ്യതയുണ്ടെന്ന സൂചന നൽകുന്ന പുതിയ പഠനം ശാസ്ത്രലോകത്ത് വലിയ ചര്‍ച്ചയായി മാറുന്നു. ദീർഘായുസ്സിനുള്ള രഹസ്യം കണ്ടെത്താൻ നടത്തിയ പഠനത്തിലാണ് തിമിംഗലങ്ങളിൽ കാണപ്പെടുന്ന പ്രത്യേക പ്രോട്ടീൻ ഇതിന് പിന്നിലെ പ്രധാന ഘടകമാകാമെന്ന് ഗവേഷകർ വ്യക്തമാക്കുന്നത്.ആർക്ക്ടിക് സമുദ്രങ്ങളിൽ ജീവിക്കുന്ന ബൗഹെഡ് തിമിംഗലങ്ങൾ ലോകത്തിലെ ഏറ്റവും ദീർഘായുസുള്ള സസ്തനികളാണ്. ഇവയ്ക്ക് ഏകദേശം 200 വർഷം വരെ ജീവിക്കാൻ കഴിവുണ്ടെന്ന് ശാസ്ത്രജ്ഞർ പറയുന്നു. ഈ അസാധാരണമായ ആയുസ്സിന് കാരണം ഇവയുടെ ശരീരത്തിൽ കൂടുതലായി കാണപ്പെടുന്ന CIRBP (Cold-Inducible RNA Binding Protein) എന്ന പ്രോട്ടീനാണെന്നാണ് പുതിയ കണ്ടെത്തൽ.ഗവേഷണങ്ങൾ സൂചിപ്പിക്കുന്നത്, ഈ പ്രോട്ടീൻ ശരീരത്തിലെ കോശങ്ങളിൽ ഉണ്ടാകുന്ന DNA കേടുകൾ അതിവേഗം പരിഹരിക്കാൻ സഹായിക്കുന്നുവെന്നാണ്. സാധാരണയായി പ്രായം കൂടുന്തോറും മനുഷ്യരിൽ DNA കേടുകൾ കൂടുകയും അതിലൂടെ കാൻസർ പോലുള്ള ഗുരുതര രോഗങ്ങൾ ഉണ്ടാകുകയും ചെയ്യുന്നു. എന്നാൽ തിമിംഗലങ്ങളിൽ ഈ പ്രോട്ടീൻ പ്രവർത്തനക്ഷമമായി നിലനിൽക്കുന്നതിനാൽ കോശങ്ങൾ കൂടുതൽ കാലം ആരോഗ്യത്തോടെ തുടരുന്നു.പഠനത്തിന്റെ ഭാഗമായി ഈ പ്രോട്ടീൻ മനുഷ്യ കോശങ്ങളിൽ പരീക്ഷിച്ചപ്പോൾ DNA repair പ്രക്രിയയിൽ പുരോഗതി കണ്ടതായി ഗവേഷകർ വ്യക്തമാക്കി. ഇതോടെ മനുഷ്യരിൽ പ്രായാധിക്യം കുറയ്ക്കാനും ആയുസ്സ് ഗണ്യമായി വർധിപ്പിക്കാനും ഭാവിയിൽ പുതിയ ചികിത്സാമാർഗങ്ങൾ വികസിപ്പിക്കാനാകുമെന്ന പ്രതീക്ഷ ഉയരുന്നു.അതേസമയം, ഈ കണ്ടെത്തൽ ഇപ്പോഴും പ്രാഥമിക ഗവേഷണ ഘട്ടത്തിലാണെന്നും, മനുഷ്യരിൽ സുരക്ഷിതമായ രീതിയിൽ പ്രയോഗിക്കാൻ കൂടുതൽ പരീക്ഷണങ്ങളും പഠനങ്ങളും ആവശ്യമാണ് എന്നും ശാസ്ത്രജ്ഞർ മുന്നറിയിപ്പ് നൽകുന്നു.