അന്ന് ശശിയോട് മൃദുസമീപനം; ഇന്ന് സുരേഷ് ബാബുവിനോട് ഒരു ദയയുമില്ലാതെ പിണറായി
തിരുവനന്തപുരം: പാലക്കാട് ജില്ലാ സെക്രട്ടറിയായിരുന്ന ഇ.എന്‍. സുരേഷ് ബാബുവിനെതിരെ ലഭിച്ച ഗുരുതരമായ പെരുമാറ്റദൂഷ്യ പരാതിയില്‍ സി.പി.എം കടുത്ത നടപടിയിലേക്ക് കടക്കുമ്പോള്‍, പാര്‍ട്ടിയുടെ നിലപാടുകളില്‍ പ്രകടമാകുന്നത് അപൂര്‍വ്വമായ കണിശത. മുന്‍പ് പി.കെ. ശശിക്കെതിരെ ലൈംഗികാതിക്രമ പരാതി ഉയര്‍ന്നപ്പോള്‍ ഏറെ മടിച്ചുമടിച്ച് സസ്പെന്‍ഷനില്‍ നടപടി ഒതുക്കിയ പ്രതിപക്ഷ നേതാവ് പിണറായി വിജയന്, ഇന്ന് ഇ.എന്‍. സുരേഷ് ബാബുവിന്റെ കാര്യത്തില്‍ ഒട്ടും വിട്ടുവീഴ്ചയ്ക്ക് തയ്യാറാകുന്നില്ല. സുരേഷ് ബാബുവിനെ ജില്ലാ സെക്രട്ടറി സ്ഥാനത്തുനിന്ന് മാറ്റിയതിന് പിന്നാലെ പാര്‍ട്ടിയില്‍നിന്ന് പുറത്താക്കാനാണ് സംസ്ഥാന നേതൃത്വത്തിന്റെ ആലോചന.
സംസ്ഥാനത്ത് കോണ്‍ഗ്രസ് ഭരണത്തിലാവുകയും സി.പി.എം പ്രതിപക്ഷത്ത് എത്തുകയും ചെയ്ത പുതിയ രാഷ്ട്രീയ സാഹചര്യത്തില്‍ പാര്‍ട്ടിയുടെ പ്രതിച്ഛായ വീണ്ടെടുക്കുക എന്നത് പിണറായി വിജയന് ജീവന്മരണ പോരാട്ടമാണ്. മുന്‍പ് ഭരണസ്വാധീനത്തിന്റെ തണലില്‍ നേതാക്കളുടെ തെറ്റുകുറ്റങ്ങള്‍ മൂടിവെക്കാന്‍ സാധിച്ചിരുന്നെങ്കില്‍, ഇന്നത്തെ രാഷ്ട്രീയ അന്തരീക്ഷത്തില്‍ അത്തരം ഇളവുകള്‍ നല്‍കുന്നത് പാര്‍ട്ടിയുടെ നിലനില്‍പ്പിനെത്തന്നെ ബാധിക്കുമെന്ന് പിണറായി കൃത്യമായി മനസ്സിലാക്കുന്നു. അതുകൊണ്ടുതന്നെയാണ് സുരേഷ് ബാബുവിനെതിരെ ഉയര്‍ന്ന പരാതിയില്‍ അദ്ദേഹം വിട്ടുവീഴ്ചയില്ലാത്ത നിലപാടെടുത്തത്.
പാര്‍ട്ടി കോഴിക്കോട് വിശാല സംസ്ഥാന സമ്മേളനത്തിന് ശേഷം സംസ്ഥാന സെക്രട്ടറിയേറ്റിലേക്ക് പ്രവേശിച്ച എം.ബി. രാജേഷിന്റെ കടുത്ത പിന്തുണയും പിണറായി വിജയന്റെ നീക്കങ്ങള്‍ക്ക് ഊര്‍ജ്ജമേകി. കേവലം സ്ഥാനചലനത്തില്‍ കേസ് അവസാനിപ്പിക്കാതെ, ഡിജിറ്റല്‍ തെളിവുകള്‍ അടക്കം നിരത്തി പരാതി നല്‍കിയ വനിതാ അഭിഭാഷകയ്ക്ക് നീതി ഉറപ്പാക്കണമെന്നും സുരേഷ് ബാബുവിനെ പാര്‍ട്ടിയില്‍നിന്ന് പുറത്താക്കണമെന്നുമാണ് രാജേഷും പിണറായിയും ഒരുപോലെ ആവശ്യപ്പെടുന്നത്.
വിഷയം പാര്‍ട്ടി അന്വേഷണത്തില്‍ മാത്രം ഒതുക്കാതെ, കേസ് ഔദ്യോഗികമായി പോലീസിന് കൈമാറുന്ന കാര്യവും സി.പി.എം സംസ്ഥാന നേതൃത്വത്തിന്റെ സജീവ പരിഗണനയിലാണ്. കോണ്‍ഗ്രസ് സര്‍ക്കാരാണ് ഇപ്പോള്‍ ഭരിക്കുന്നത് എന്നതിനാല്‍, പോലീസിന് പരാതി കൈമാറുന്നത് പാര്‍ട്ടിക്ക് തിരിച്ചടിയാകുമോ എന്ന ചോദ്യം ഉയരുന്നുണ്ടെങ്കിലും, തനിയെ മുന്‍കൈയെടുത്ത് പരാതി പോലീസിന് മുന്നിലെത്തിച്ചാല്‍ സി.പി.എമ്മിന്റെ ‘സ്ത്രീപക്ഷ പാര്‍ട്ടി’ എന്ന പകിട്ട് തിരിച്ചുപിടിക്കാന്‍ കഴിയുമെന്നാണ് കണക്കുകൂട്ടല്‍. പ്രതിപക്ഷത്തിരുന്നുകൊണ്ട് ഇത്തരം ധീരമായ തീരുമാനമെടുക്കുന്നത് പൊതുസമൂഹത്തില്‍ പാര്‍ട്ടിയുടെ ഇമേജ് ഉയര്‍ത്തുമെന്നും പിണറായി വിജയന് വിലയിരുത്തുന്നു.
അതിനിടെ, പാലക്കാട് ജില്ലാ സി.പി.എമ്മിലെ എക്കാലത്തെയും വലിയ എതിരാളിയായ ഇ.എന്‍. സുരേഷ് ബാബുവിന്റെ തകര്‍ച്ചയില്‍ അത്യാഹ്ലാദത്തിലാണ് മുന്‍ എം.എല്‍.എ പി.കെ. ശശി. മുന്‍പ് തനിക്കെതിരെ ഉയര്‍ന്നു വന്ന പീഡന പരാതിക്ക് പിന്നിലും പാര്‍ട്ടിയില്‍ താന്‍ ഒറ്റപ്പെട്ടതിനും പിന്നില്‍ സുരേഷ് ബാബുവിന്റെ കുതന്ത്രങ്ങളായിരുന്നുവെന്നാണ് ശശി കരുതുന്നത്. ശത്രു രാഷ്ട്രീയമായി വീഴുമ്പോള്‍ പകരം വീട്ടിയതിന്റെ ആശ്വാസത്തിലാണ് ശശിയും അനുയായികളും.
വര്‍ഷങ്ങള്‍ക്ക് മുന്‍പ് പി.കെ. ശശിക്കെതിരെ ഡി.വൈ.എഫ്.ഐ വനിതാ നേതാവ് പരാതി നല്‍കിയപ്പോള്‍ അന്നത്തെ ഭരണത്തണലില്‍ സി.പി.എം സ്വീകരിച്ചത് മൃദുസമീപനമായിരുന്നു. കേന്ദ്ര ജനറല്‍ സെക്രട്ടറിയായിരുന്ന സീതാറാം യെച്ചൂരിയുടെ ഇടപെടലും പരാതിക്കാരി പിണറായിയെ നേരില്‍ കണ്ടതുമൊക്കെയാണ് അന്ന് ശശിക്കെതിരെയുള്ള സസ്പെന്‍ഷനില്‍ കലാശിച്ചത്. മാസങ്ങള്‍ക്കുള്ളില്‍ അദ്ദേഹത്തെ പാര്‍ട്ടി പദവികളില്‍ തിരിച്ചെടുക്കുകയും ചെയ്തു. എന്നാല്‍ ഇന്ന് പ്രതിപക്ഷത്തിരിക്കുന്ന സി.പി.എമ്മിന് അത്തരം മൃദുസമീപനം തിരിച്ചടിയാകുമെന്ന തിരിച്ചറിവിലാണ് സുരേഷ് ബാബുവിനോട് ഒരു ദയയും കാണിക്കാത്തത്.
രണ്ടു മാസം മുന്‍പ് ലഭിച്ച വനിതാ അഭിഭാഷകയുടെ പരാതിയില്‍ സി.പി.എം പൊളിറ്റ്ബ്യൂറോ അംഗം എ. വിജയരാഘവനും കേന്ദ്രകമ്മിറ്റിയംഗം കെ.എസ്. സലീഖയും അടങ്ങുന്ന സംഘമാണ് പ്രാഥമിക അന്വേഷണം നടത്തിയത്. സുരേഷ് ബാബുവിനെ പൂര്‍ണ്ണമായും കുടുക്കുന്ന ശബ്ദരേഖകളും ഡിജിറ്റല്‍ തെളിവുകളും കൈക്കലാക്കിയതോടെ പാര്‍ട്ടിയില്‍ പ്രതിരോധം തീര്‍ക്കാനുള്ള സുരേഷ് ബാബുവിന്റെ ശ്രമങ്ങളെല്ലാം പാളിപ്പോവുകയായിരുന്നു.
മലപ്പുറത്തും പാലക്കാട്ടും ഒരേസമയം നടന്ന തെറ്റുതിരുത്തല്‍ ചര്‍ച്ചകള്‍ക്കിടയില്‍ പാലക്കാട്ടെ സംസ്ഥാന കമ്മിറ്റിയംഗങ്ങളെ മലപ്പുറത്തേക്ക് വിളിച്ചുവരുത്തിയാണ് പിണറായി വിജയന് കടുത്ത നിര്‍ദ്ദേശം നല്‍കിയത്. സുരേഷ് ബാബുവിനെ കുടുക്കുന്ന ഡിജിറ്റല്‍ തെളിവുകള്‍ യോഗത്തില്‍ നേരിട്ട് വെളിപ്പെടുത്തിയ പ്രതിപക്ഷ നേതാവ്, സുരേഷ് ബാബു ഉടനടി സ്ഥാനമൊഴിയണമെന്ന് കര്‍ശനമായി ആവശ്യപ്പെടുകയായിരുന്നു. ഇതോടെ മറ്റൊന്നു ചിന്തിക്കാന്‍പോലും കഴിയാതെ സുരേഷ് ബാബുവിന് വശത്തേക്ക് മാറേണ്ടി വന്നു.
ലൈംഗികാതിക്രമ പരാതി പുറത്തറിഞ്ഞാല്‍ പാര്‍ട്ടിക്ക് ഉണ്ടായേക്കാവുന്ന വലിയ അപമാനം ഒഴിവാക്കാന്‍, സംഘടനയ്ക്കുള്ളിലെ വിഭാഗീയത ചൂണ്ടിക്കാട്ടിയാണ് സുരേഷ് ബാബുവിനെ മാറ്റിയതെന്ന വിശദീകരണം സംസ്ഥാന സെക്രട്ടറി എം.വി. ഗോവിന്ദന്‍ നല്‍കിയതെങ്കിലും അണികള്‍ക്കിടയില്‍ യഥാര്‍ത്ഥ കാരണം പരസ്യമായിക്കഴിഞ്ഞു. വിഭാഗീയതയുടെ പേരില്‍ മാത്രം കേസ് ഒതുക്കാനാവില്ലെന്നതും, പുറത്താക്കല്‍ ഉള്‍പ്പെടെയുള്ള കടുത്ത നടപടികള്‍ ഉടന്‍ ഉണ്ടാകുമെന്നതും ഉറപ്പാണ്.
സുരേഷ് ബാബുവിന്റെ പുറത്താക്കലോടെ പാലക്കാട് സി.പി.എമ്മിലെ മറ്റു ചില നേതാക്കളുടെയും ഉറക്കം കെടുകയാണ്. സമാനമായ രീതിയില്‍ പീഡന പരാതി നേരിടുകയും സുരേഷ് ബാബുവിന്റെ തണലില്‍ പാര്‍ട്ടി പദവികളില്‍ തുടരുകയും ചെയ്യുന്ന ഒരു മുന്‍നിര നേതാവിനു കൂടി വൈകാതെ സ്ഥാനം തെറിക്കുമെന്നാണ് വിവരം. തണല്‍ മരം കടപുഴകിയതോടെ ഈ നേതാവും പ്രതിരോധത്തിലായിക്കഴിഞ്ഞു.
വര്‍ഷങ്ങളായി പാലക്കാട് സി.പി.എമ്മിനെ തങ്ങളുടെ കസ്റ്റഡിയില്‍ വെച്ചിരുന്ന ഇ.എന്‍. സുരേഷ് ബാബു – സി.കെ. രാജേന്ദ്രന്‍ അച്ചുതണ്ടാണ് ഈ സംഭവത്തോടെ പൂര്‍ണ്ണമായും തകര്‍ന്നടിയുന്നത്. ആദ്യകാലത്ത് ഇവര്‍ക്കൊപ്പമുണ്ടായിരുന്ന എന്‍.എന്‍. കൃഷ്ണദാസ് മാറിയതും വി. ചെന്താമരാക്ഷന്‍ പുതിയ ജില്ലാ സെക്രട്ടറിയായി എത്തിയതും ജില്ലയിലെ പ്രാദേശിക നേതൃത്വത്തില്‍ വലിയ ഭരണമാറ്റത്തിനാണ് വഴിതുറന്നിരിക്കുന്നത്.
എം.ബി. രാജേഷ് സംസ്ഥാന സെക്രട്ടേറിയറ്റില്‍ ശക്തനായതോടെ പാലക്കാട്ടെ പഴയ യുവനേതൃത്വം പാര്‍ട്ടിയില്‍ ആധിപത്യം സ്ഥാപിക്കുകയാണ്. അധികാരമില്ലാത്ത പ്രതിപക്ഷ അന്തരീക്ഷത്തിലും പാര്‍ട്ടിയുടെ തെറ്റുകള്‍ തിരുത്തി സംഘടനയെ ശക്തിപ്പെടുത്താന്‍ പിണറായി വിജയനും എം.ബി. രാജേഷും ചേര്‍ന്ന് നടത്തുന്ന ഈ പോരാട്ടം, പാലക്കാട് സി.പി.എമ്മില്‍ പുതിയൊരു അധ്യായത്തിനാണ് തുടക്കമിടുന്നത്. പരാതി പോലീസിന് കൈമാറുന്നതോടെ ‘സ്ത്രീപക്ഷ’ ഇമേജ് വീണ്ടെടുത്ത് പുതിയ രാഷ്ട്രീയ പോരാട്ടത്തിന് തുടക്കമിടാമെന്നാണ് സി.പി.എം പ്രതീക്ഷിക്കുന്നത്.
