പരസ്യ പ്രതികരണത്തിനില്ലെന്ന് അടൂർ പ്രകാശ്; ഇനി എല്ലാം ഹൈക്കമാൻഡ് തീരുമാനിക്കട്ടെ, നിലപാടിൽ ഉറച്ച് നേതാവ്!
യുഡിഎഫിനുള്ളിലെ ആഭ്യന്തര തർക്കങ്ങളിൽ ഇനി പരസ്യ പ്രതികരണത്തിനില്ലെന്ന് കൺവീനർ അടൂർ പ്രകാശ് വ്യക്തമാക്കി. താൻ ഉന്നയിച്ച വിഷയങ്ങളിൽ ഹൈക്കമാൻഡ് ഉചിതമായ തീരുമാനമെടുക്കട്ടെ എന്ന നിലപാടിലാണ് അദ്ദേഹം. എന്നാൽ, മുൻപ് ഉന്നയിച്ച കാര്യങ്ങളിൽ ഇപ്പോഴും ഉറച്ചുനിൽക്കുകയാണെന്നും അടൂർ പ്രകാശ് വ്യക്തമാക്കിയിട്ടുണ്ട്. അതേസമയം, ബോർഡ്-കോർപ്പറേഷൻ വിഭജനവുമായി ബന്ധപ്പെട്ട് കോൺഗ്രസിനുള്ളിൽ ഉടലെടുത്ത അഭിപ്രായഭിന്നതകൾ പരിഹരിക്കാനാകാതെ തുടരുകയാണ്.
അടൂർ പ്രകാശ് ഉൾപ്പെടെയുള്ളവരുടെ നീക്കങ്ങൾക്ക് പിന്നിൽ കെ.സി. വേണുഗോപാൽ പക്ഷമാണെന്നാണ് മുഖ്യമന്ത്രി വി.ഡി. സതീശനെ അനുകൂലിക്കുന്നവരുടെ ആരോപണം. എന്നാൽ മുഖ്യമന്ത്രിക്കെതിരെ ഉയരുന്ന വിമർശനങ്ങളോട് കെ.സി. വേണുഗോപാൽ ഇതുവരെ പരസ്യമായി പ്രതികരിച്ചിട്ടില്ല. സർക്കാർ അധികാരമേറ്റ് ആറ് മാസം പിന്നിട്ടിട്ടും ബോർഡ്, കോർപ്പറേഷൻ പദവികളുടെ വീതംവെയ്പ് പൂർത്തിയാക്കാൻ കഴിയാത്തതിൽ യുഡിഎഫിലെ ഘടകകക്ഷികൾക്കും കടുത്ത അതൃപ്തിയുണ്ട്.
ഇതിനിടെ, ഓൺലൈനായി ചേർന്ന കെപിസിസി ഭാരവാഹി യോഗത്തിലും നേതൃത്വത്തിനെതിരെ രൂക്ഷവിമർശനമാണ് ഉയർന്നത്. മുന്നണിയെ അധികാരത്തിലെത്തിക്കാൻ പ്രവർത്തിച്ച താഴെത്തട്ടിലുള്ള നേതാക്കൾക്ക് അർഹമായ പരിഗണന ലഭിക്കേണ്ട ബോർഡ്-കോർപ്പറേഷൻ നിയമനങ്ങൾ ഒച്ചിഴയുന്ന വേഗത്തിലാണ് നടക്കുന്നതെന്ന് നേതാക്കൾ കുറ്റപ്പെടുത്തി. ഇക്കാര്യത്തിൽ തീരുമാനം ഇനിയും വൈകുകയാണെങ്കിൽ പരസ്യമായി പ്രതികരിക്കേണ്ടി വരുമെന്ന മുന്നറിയിപ്പും യോഗത്തിൽ നേതാക്കൾ നൽകി.
