പാലാ നഗരസഭയിൽ യുഡിഎഫിന് തിരിച്ചടി; ദിയ ബിനുവിനെതിരായ അവിശ്വാസ പ്രമേയം പാസായി
കോട്ടയം: പാലാ നഗരസഭയിൽ യുഡിഎഫ് ഭരണത്തിന് തിരിച്ചടിയായി നഗരസഭാ അധ്യക്ഷ ദിയ ബിനുവിനെതിരായ എൽഡിഎഫിന്റെ അവിശ്വാസ പ്രമേയം പാസായി. അവിശ്വാസ പ്രമേയത്തെ 17 അംഗങ്ങൾ പിന്തുണച്ചതോടെ യുഡിഎഫിന് നഗരസഭയിലെ ഭരണം നഷ്ടമായി.
കോൺഗ്രസ് നൽകിയ വിപ്പ് ലംഘിച്ച് യോഗത്തിൽ പങ്കെടുത്ത കോൺഗ്രസ് കൗൺസിലർമാരും വിമതയായി വിജയിച്ച സ്വതന്ത്ര അംഗം മായാ രാഹുലും എൽഡിഎഫ് കൊണ്ടുവന്ന അവിശ്വാസ പ്രമേയത്തെ പിന്തുണച്ചു. ലിസി കുട്ടി മാത്യു, ബിജു മാത്യൂസ്, ടോണി തൈപ്പറമ്പിൽ, രജിത പ്രകാശ് എന്നിവരാണ് വിപ്പ് ലംഘിച്ച് യോഗത്തിൽ പങ്കെടുത്ത കോൺഗ്രസ് കൗൺസിലർമാർ.
നഗരസഭാ അധ്യക്ഷ ദിയ ബിനു ഉൾപ്പെടുന്ന സ്വതന്ത്ര കൂട്ടായ്മയുമായി കോൺഗ്രസ് കൗൺസിലർമാരും ഉപാധ്യക്ഷ കൂടിയായ സ്വതന്ത്ര അംഗം മായാ രാഹുലും അകന്നതോടെയാണ് ഭരണപക്ഷത്തിനുള്ളിൽ പ്രതിസന്ധി രൂക്ഷമായത്. ഈ സാഹചര്യം മുതലെടുത്താണ് പ്രതിപക്ഷമായ എൽഡിഎഫ് അവിശ്വാസ പ്രമേയം അവതരിപ്പിച്ചത്.
അവിശ്വാസ പ്രമേയം പാസായതോടെ ദിയ ബിനു അധ്യക്ഷ സ്ഥാനം നഷ്ടമായി. 26 അംഗ നഗരസഭയിൽ 14 അംഗങ്ങളുടെ പിന്തുണയോടെയാണ് യുഡിഎഫ് ഇതുവരെ ഭരണം നടത്തിയിരുന്നത്. എന്നാൽ ഭരണപക്ഷത്തിനുള്ളിലെ ഭിന്നത നിർണായകമായതോടെ യുഡിഎഫിന് നഗരസഭയുടെ നിയന്ത്രണം നഷ്ടമാവുകയായിരുന്നു.
