ഗാർഡ് ഓഫ് ഓണർ വേണ്ടെന്ന് മുഖ്യമന്ത്രി വി.ഡി. സതീശൻ; പൊലീസ് മേധാവിയെ നേരിട്ട് അറിയിച്ചു

തിരുവനന്തപുരം: ഔദ്യോഗിക സന്ദർശനങ്ങളിലെയും പരിപാടികളിലെയും പൊലീസ് ഗാർഡ് ഓഫ് ഓണർ തനിക്ക് ആവശ്യമില്ലെന്ന് മുഖ്യമന്ത്രി വി.ഡി. സതീശൻ. ഇക്കാര്യം അദ്ദേഹം സംസ്ഥാന പൊലീസ് മേധാവി റവാഡ എ. ചന്ദ്രശേഖർയെ നേരിട്ട് അറിയിച്ചതായി റിപ്പോർട്ട്.

പൊലീസ് സേനയിൽ ഉദ്യോഗസ്ഥരുടെ കുറവ് നിലനിൽക്കുന്ന സാഹചര്യത്തിൽ ആചാരപരമായ ചടങ്ങുകൾക്കായി സേനാംഗങ്ങളെ നിയോഗിക്കുന്നത് ഒഴിവാക്കണമെന്നാണ് മുഖ്യമന്ത്രിയുടെ നിലപാട്. ഔദ്യോഗിക സന്ദർശനങ്ങളിൽ മുഖ്യമന്ത്രിയെ സ്വീകരിക്കുന്നതിനും ആദരിക്കുന്നതിനുമായി പൊലീസ് ഉദ്യോഗസ്ഥർ അണിനിരക്കുന്ന ചടങ്ങാണ് ഗാർഡ് ഓഫ് ഓണർ.

പ്രധാനമന്ത്രി, രാഷ്ട്രത്തലവൻമാർ, സൈനിക മേധാവികൾ തുടങ്ങിയ വിശിഷ്ട വ്യക്തികൾക്ക് നൽകുന്ന ഔപചാരിക ബഹുമതിയായാണ് ഗാർഡ് ഓഫ് ഓണർ അറിയപ്പെടുന്നത്. എന്നാൽ നിലവിലെ സാഹചര്യത്തിൽ ഇത്തരം ചടങ്ങുകൾ അനിവാര്യമല്ലെന്നാണ് മുഖ്യമന്ത്രിയുടെ വിലയിരുത്തൽ.

ജനങ്ങൾക്ക് ബുദ്ധിമുട്ടുണ്ടാക്കുന്ന തരത്തിലുള്ള വലിയ വാഹനവ്യൂഹങ്ങളും അമിത സുരക്ഷാ ക്രമീകരണങ്ങളും ഒഴിവാക്കാൻ നേരത്തെയും വി.ഡി. സതീശൻ നിർദേശം നൽകിയിരുന്നു. പൈലറ്റ് വാഹനവും എസ്‌കോർട്ട് വാഹനവും ഒഴികെ മറ്റ് വാഹനങ്ങൾ ഒഴിവാക്കണമെന്നായിരുന്നു നിർദേശം. മുഖ്യമന്ത്രിയുടെ യാത്രകൾക്കായി റോഡുകൾ തടയുകയോ പൊതുജനങ്ങൾക്ക് അസൗകര്യം സൃഷ്ടിക്കുകയോ ചെയ്യരുതെന്നും അദ്ദേഹം ഉന്നത പൊലീസ് ഉദ്യോഗസ്ഥരോട് നിർദേശിച്ചിട്ടുണ്ട്.

അതേസമയം, സുരക്ഷാ കാരണങ്ങളാൽ എസ്‌കോർട്ട് വാഹനം പൂർണമായും ഒഴിവാക്കാനാകില്ലെന്ന നിലപാടാണ് പൊലീസ് സ്വീകരിച്ചിരിക്കുന്നത്.