സംസ്ഥാനതല ഓണാഘോഷ പരിപാടികൾക്ക് സെപ്റ്റംബർ മൂന്നു മുതൽ

തിരുവനന്തപുരം: സംസ്ഥാനതല ഓണാഘോഷ പരിപാടികൾക്ക് സെപ്റ്റംബർ മൂന്നിന് തുടക്കമാകും. ഒമ്പതിന് തിരുവനന്തപുരത്ത് ഘോഷയാത്രയോടെയാണ് സമാപനം.

ഹരിത ചട്ടം പാലിച്ച് ‘ഹരിത ഓണം’ എന്ന നിലയിലാവും പരിപാടികൾ. ഓണാഘോഷവുമായി ബന്ധപ്പെട്ട് മുഖ്യമന്ത്രി പിണറായി വിജയന്‍റെ അധ്യക്ഷതയിൽ ചേർന്ന യോഗത്തിലാണ് തീരുമാനം.

ജില്ല തലത്തിൽ ഡി.ടി.പി.സിയുടെ നേതൃത്വത്തിൽ ഓണാഘോഷ പരിപാടികൾ നടത്തും. തിരുവനന്തപുരം കവടിയാർ മുതൽ മണക്കാട് വരെ ഉത്സവ മേഖലയായി പ്രഖ്യാപിക്കും. കുടുംബശ്രീയുടെ നേതൃത്വത്തിൽ ജില്ല, സി.ഡി.എസ്, എ.ഡി.എസ് തലങ്ങളിൽ ഓണം മേളകൾ സംഘടിപ്പിക്കും. സപ്ലൈകോ ഓണച്ചന്തകൾ ജില്ല, താലൂക്ക്, മണ്ഡലം കേന്ദ്രങ്ങളിലും തുടങ്ങും.