ഇറാന്റെ ആണവ ശേഖരം അമേരിക്ക കൊണ്ടുപോകും; പണം നൽകില്ലെന്ന് ട്രംപ്
ഇറാന്റെ പക്കലുള്ള സമ്പുഷ്ടീകരിച്ച യുറേനിയം ഉൾപ്പെടെയുള്ള ആണവ വസ്തുക്കൾ അമേരിക്ക പിടിച്ചെടുക്കുമെന്ന് പ്രസിഡന്റ് ഡോണൾഡ് ട്രംപ്. ‘ആണവ അവശിഷ്ടങ്ങൾ’ എന്ന് ട്രംപ് വിശേഷിപ്പിച്ച ഈ ശേഖരം കൈമാറുന്നതിന് പകരമായി യാതൊരുവിധ പണമിടപാടും നടത്തില്ലെന്ന് അദ്ദേഹം വ്യക്തമാക്കി. തന്റെ സോഷ്യൽ മീഡിയ പ്ലാറ്റ്ഫോമായ ട്രൂത്ത് സോഷ്യലിലൂടെയാണ് ട്രംപ് ഈ വിവാദ പ്രഖ്യാപനം നടത്തിയത്.
അമേരിക്കയുടെ ബി-2 ബോംബർ വിമാനങ്ങൾ നടത്തിയ സൈനിക നീക്കങ്ങളെത്തുടർന്നാണ് ഈ സാഹചര്യം ഉണ്ടായതെന്ന് അദ്ദേഹം അവകാശപ്പെട്ടു. ഇതോടൊപ്പം മേഖലയിലെ മറ്റ് സുപ്രധാന മാറ്റങ്ങളും ട്രംപ് പങ്കുവെച്ചു. ഇസ്രയേൽ ഇനി ലെബനനിൽ ബോംബാക്രമണം നടത്തില്ലെന്നും, കൂടുതൽ ആക്രമണങ്ങളിൽ നിന്ന് ഇസ്രയേലിനെ വിലക്കിയിട്ടുണ്ടെന്നും അദ്ദേഹം പറഞ്ഞു. ലെബനനിലെ ഹിസ്ബുള്ളയുമായി ബന്ധപ്പെട്ട തർക്കങ്ങൾ അമേരിക്ക നേരിട്ട് കൈകാര്യം ചെയ്യും. ഹോർമുസ് കടലിടുക്ക് തുറന്നുകൊടുക്കാനുള്ള ഇറാന്റെ തീരുമാനത്തെ സ്വാഗതം ചെയ്ത ട്രംപ്, എന്നാൽ ഇറാനുമായുള്ള ചർച്ചകൾ പൂർണ്ണമായി അവസാനിക്കുന്നത് വരെ നാവിക ഉപരോധം തുടരുമെന്ന് ആവർത്തിച്ചു. ഇറാനുമായുള്ള ചർച്ചകൾ പുരോഗമിക്കുകയാണെന്നും നടപടിക്രമങ്ങൾ വേഗത്തിലാക്കുമെന്നും അദ്ദേഹം കൂട്ടിച്ചേർത്തു.
