പി.എം. ശ്രീ പദ്ധതിയെ ചൊല്ലി പിണറായി;അധികാരത്തിലെത്തിയതോടെ യുഡിഎഫ് നിലപാട് മാറ്റി’
തിരുവനന്തപുരം: പി.എം. ശ്രീ പദ്ധതി വിഷയത്തിൽ അധികാരത്തിലെത്തിയതിന് ശേഷം യുഡിഎഫ് നിലപാട് പൂർണമായും മാറ്റിയെന്ന് ആരോപിച്ച് പ്രതിപക്ഷ നേതാവ് Pinarayi Vijayan. എ.കെ.ജി. സെന്ററിൽ നടത്തിയ വാർത്താസമ്മേളനത്തിലാണ് അദ്ദേഹം യുഡിഎഫ് സർക്കാരിനെതിരെ രൂക്ഷ വിമർശനം ഉന്നയിച്ചത്.
പി.എം. ശ്രീ പദ്ധതിയിലൂടെ വിദ്യാഭ്യാസ രംഗത്ത് ബിജെപിയുടെ കാവിവത്കരണ അജണ്ടയാണ് ലക്ഷ്യമിടുന്നതെന്നും, അതുകൊണ്ടാണ് എൽഡിഎഫ് സർക്കാർ പദ്ധതി നടപ്പാക്കാൻ തയ്യാറാകാതിരുന്നതെന്നും പിണറായി വിജയൻ പറഞ്ഞു. മുൻ സർക്കാർ ഒപ്പുവെച്ച ധാരണാപത്രം (MoU) പദ്ധതി നടപ്പാക്കാനായിരുന്നില്ലെന്നും, കേന്ദ്രം തടഞ്ഞുവെച്ച മറ്റ് ഫണ്ടുകൾ ലഭ്യമാക്കുന്നതിനായിരുന്നുവെന്നും തുടർന്ന് അത് മരവിപ്പിച്ചുവെന്നും അദ്ദേഹം അവകാശപ്പെട്ടു.
പ്രതിപക്ഷത്തായിരിക്കുമ്പോൾ പി.എം. ശ്രീ പദ്ധതിയെ ശക്തമായി എതിർത്ത യുഡിഎഫ്, അധികാരത്തിലെത്തിയ ശേഷം അതേ പദ്ധതി അംഗീകരിച്ച് നയപരമായ തീരുമാനമാക്കിയെന്നും പിണറായി വിജയൻ ആരോപിച്ചു. ഇതിലൂടെ ജനങ്ങളെയും സ്വന്തം പ്രവർത്തകരെയും യുഡിഎഫ് വഞ്ചിക്കുകയാണെന്നും അദ്ദേഹം പറഞ്ഞു.
പി.എം. ശ്രീ പദ്ധതിയുടെ തുക സംസ്ഥാനം കൈപ്പറ്റിയെന്ന പ്രചാരണം തെറ്റാണെന്ന് വിദ്യാഭ്യാസ മന്ത്രിക്ക് തന്നെ സമ്മതിക്കേണ്ടി വന്നുവെന്നും, പദ്ധതിയിൽ നിന്ന് പിന്മാറുന്നതിന് തടസ്സമില്ലെന്ന് കേന്ദ്ര സർക്കാർ രാജ്യസഭയിൽ വ്യക്തമാക്കിയിട്ടുണ്ടെന്നും അദ്ദേഹം കൂട്ടിച്ചേർത്തു.
കോൺഗ്രസ് നേതൃത്വം നൽകുന്ന സർക്കാർ വളരെ ചുരുങ്ങിയ കാലം കൊണ്ട് സംഘപരിവാർ അജണ്ടകൾക്ക് കീഴടങ്ങിയിരിക്കുകയാണെന്നും, വഖഫ് വിഷയത്തിലും അതേ സമീപനമാണ് സ്വീകരിക്കുന്നതെന്നും പിണറായി വിജയൻ ആരോപിച്ചു. മുസ്ലിം ലീഗ് ഈ നിലപാടിനെ ന്യായീകരിക്കാൻ ശ്രമിക്കുകയാണെന്നും അദ്ദേഹം വിമർശിച്ചു.
പി.എം. ശ്രീ പദ്ധതിയുമായി ബന്ധപ്പെട്ട നിലപാട് മാറ്റത്തെക്കുറിച്ച് ജനങ്ങളോട് തുറന്ന് പറയുകയും മാപ്പ് പറയുകയും ചെയ്യണമെന്ന് യുഡിഎഫിനോട് പിണറായി വിജയൻ ആവശ്യപ്പെട്ടു.
