ഇന്ത്യാ സഖ്യം ശക്തിപ്പെടുത്താൻ കൈകോർക്കാം; മമതയുമായി കൂടിക്കാഴ്ച നടത്തി സോണിയാ ഗാന്ധി

ന്യൂഡൽഹി: ഉൾപാർട്ടി പ്രതിസന്ധികളും നേതാക്കളുടെ കൊഴിഞ്ഞുപോക്കും വിമതനീക്കങ്ങളും നേരിടുന്ന സാഹചര്യത്തിൽ തൃണമൂൽ കോൺഗ്രസുമായി സഹകരണം ശക്തിപ്പെടുത്താൻ കോൺഗ്രസ് നേതൃത്വം ശ്രമം ശക്തമാക്കുന്നു. ഇതിന്റെ ഭാഗമായി കോൺഗ്രസ് നേതാവ് സോണിയാ ഗാന്ധിയും തൃണമൂൽ കോൺഗ്രസ് അധ്യക്ഷ മമതാ ബാനർജിയും ഡൽഹിയിലെ ജൻപഥ് വസതിയിൽ കൂടിക്കാഴ്ച നടത്തി.

ചൊവ്വാഴ്ച നടന്ന കൂടിക്കാഴ്ചയിൽ ബിജെപിക്കെതിരായ ദേശീയതല പോരാട്ടത്തിൽ പ്രതിപക്ഷ ഐക്യം കൂടുതൽ ശക്തിപ്പെടുത്തേണ്ടതിന്റെ ആവശ്യകത സോണിയാ ഗാന്ധി മമതയെ അറിയിച്ചതായാണ് സൂചന. പ്രതിപക്ഷ സഖ്യമായ ‘ഇന്ത്യ’ മുന്നണിയുമായി കൂടുതൽ സഹകരിച്ച് പ്രവർത്തിക്കണമെന്നും സോണിയ അഭ്യർത്ഥിച്ചതായും ദേശീയ മാധ്യമങ്ങൾ റിപ്പോർട്ട് ചെയ്യുന്നു.

ഇന്ത്യ സഖ്യ നേതാക്കളുടെ യോഗത്തിൽ പങ്കെടുക്കാനായി തിങ്കളാഴ്ച ഡൽഹിയിലെത്തിയ മമതാ ബാനർജി, യോഗത്തിന് ശേഷമാണ് സോണിയാ ഗാന്ധിയെ സന്ദർശിച്ചത്. തുടർന്ന് മമതയും ലോക്‌സഭാംഗവും മരുമകനുമായ അഭിഷേക് ബാനർജിയും ലോക്‌സഭ പ്രതിപക്ഷ നേതാവ് രാഹുൽ ഗാന്ധിയുമായി കൂടിക്കാഴ്ച നടത്തി. ഇന്ത്യ സഖ്യത്തെ കൂടുതൽ ശക്തിപ്പെടുത്തുന്നതും 2029 ലോക്‌സഭാ തിരഞ്ഞെടുപ്പിനുള്ള തന്ത്രങ്ങൾ രൂപപ്പെടുത്തുന്നതുമാണ് ചർച്ചയിലെ പ്രധാന വിഷയങ്ങളായതെന്നാണ് വിവരം.

ഇതിനിടെ തൃണമൂൽ കോൺഗ്രസ് കോൺഗ്രസിൽ ലയിക്കാനൊരുങ്ങുന്നുവെന്ന തരത്തിൽ സമൂഹമാധ്യമങ്ങളിലും രാഷ്ട്രീയ കേന്ദ്രങ്ങളിലും അഭ്യൂഹങ്ങൾ ഉയർന്നിരുന്നു. എന്നാൽ ഇത്തരമൊരു നീക്കമില്ലെന്ന് കോൺഗ്രസും തൃണമൂൽ നേതൃത്വവും വ്യക്തമാക്കിയിട്ടുണ്ട്.

മുൻകാലങ്ങളിൽ കോൺഗ്രസിനെയും മറ്റ് പ്രതിപക്ഷ പാർട്ടികളെയും പരസ്യമായി വിമർശിച്ചിരുന്ന മമതാ ബാനർജി, ഇപ്പോൾ പ്രതിപക്ഷ കക്ഷികൾ തമ്മിലുള്ള പരസ്യ ഏറ്റുമുട്ടലുകൾ ഒഴിവാക്കി ബിജെപിക്കെതിരായ ഐക്യം ശക്തിപ്പെടുത്തണമെന്ന നിലപാടാണ് സ്വീകരിക്കുന്നത്. പശ്ചിമ ബംഗാളിൽ പാർട്ടിക്കുള്ളിലെ ആഭ്യന്തര പ്രതിസന്ധികളും നേതാക്കളുടെ കൊഴിഞ്ഞുപോക്കും ശക്തമായ സാഹചര്യത്തിലാണ് മമതയുടെ ഡൽഹി കൂടിക്കാഴ്ചകൾ രാഷ്ട്രീയ ശ്രദ്ധ നേടുന്നത്.