രാഷ്ട്രീയത്തിനപ്പുറം സൗഹൃദം; വിജയ്‌യുടെ നീലങ്കരൈയിലെ വസതിയിലെത്തി രാഹുൽ ഗാന്ധി
ചെന്നൈ: തമിഴ്നാട്ടിലെ രാഷ്ട്രീയ ചർച്ചകളിൽ പുതിയ വഴിമാറ്റങ്ങൾ സൃഷ്ടിച്ച് ലോക്സഭ പ്രതിപക്ഷ നേതാവ് രാഹുൽ ഗാന്ധിയും തമിഴ്നാട് മുഖ്യമന്ത്രി സി. ജോസഫ് വിജയ്‌യും തമ്മിൽ കൂടിക്കാഴ്ച നടത്തി. ചെന്നൈ നീലങ്കരൈയിലെ വിജയ്‌യുടെ വസതിയിലായിരുന്നു ഇരുവരുടെയും സൗഹൃദ സന്ദർശനം. രാഷ്ട്രീയ ചർച്ചകൾക്കപ്പുറം ഇരുവരുടെയും കാപ്പി കുടിയും കഫേ സന്ദർശനവും സമൂഹമാധ്യമങ്ങളിൽ വലിയ രീതിയിൽ തരംഗമായിരിക്കുകയാണ്.
നീലങ്കരൈയിലെ വസതിയിലെത്തിച്ചേർന്ന രാഹുൽ ഗാന്ധിയെ വിജയ് ഊഷ്മളമായി സ്വീകരിച്ചു. ഏകദേശം ഒരു മണിക്കൂറോളം നീണ്ടുനിന്ന ഔദ്യോഗിക ചർച്ചകൾക്ക് ശേഷം ഇരുവരും സമീപമുള്ള ഒരു കഫേയിലേക്ക് പോകുകയായിരുന്നു. കപ്പുച്ചിനോയും ടിറാമിസുവും കുക്കികളും ആസ്വദിച്ചുകൊണ്ട് ഇരുവരും കുറച്ചു സമയം ചിലവഴിച്ചു. സാധാരണ രാഷ്ട്രീയ കൂടിക്കാഴ്ചകളിൽ നിന്ന് വ്യത്യസ്തമായി, ജനക്കൂട്ടത്തിനിടയിലൂടെ നടന്ന ഇരുവരും ആരാധകർക്കൊപ്പം സെൽഫിയെടുക്കാനും സമയം കണ്ടെത്തി. കഫേ സന്ദർശനത്തിന് ശേഷം രാഹുൽ ഗാന്ധി നഗരത്തിലെ ഒരു സ്വകാര്യ ഹോട്ടലിലേക്ക് മടങ്ങി.
ചെന്നൈ ഐലൻഡ് ഗ്രൗണ്ടിൽ ഇന്ന് (ഒക്‌ടോബർ 10) വൈകുന്നേരം നടക്കുന്ന ‘ഛത്രോണ്‍ കി ഗൂഞ്ച്’ എന്ന യുവജന സമ്പർക്ക പരിപാടിയിൽ പങ്കെടുക്കാനാണ് രാഹുൽ ഗാന്ധി ചെന്നൈയിൽ എത്തിയിട്ടുള്ളത്. തമിഴ്‌നാട്ടിലുടനീളം ഓൺലൈൻ വഴിയും ക്യു.ആർ കോഡ് വഴിയും ഒരു ലക്ഷത്തിലധികം വിദ്യാർത്ഥികളാണ് ഈ പരിപാടിക്കായി രജിസ്റ്റർ ചെയ്തിരിക്കുന്നത്. നിയമസഭാ തിരഞ്ഞെടുപ്പ് ഫലത്തിന് പിന്നാലെ തമിഴ്‌നാട്ടിൽ കോൺഗ്രസും ടി.വി.കെയും പുതിയ രാഷ്ട്രീയ സമവായത്തിലേക്ക് നീങ്ങിയിരുന്നു. രാഷ്ട്രീയത്തിനപ്പുറം രണ്ട് പ്രമുഖ യുവ നേതാക്കൾ ഒന്നിച്ചുള്ള ഈ കൂടിക്കാഴ്ച തമിഴ്നാട് രാഷ്ട്രീയത്തിൽ വലിയ ചർച്ചകൾക്കാണ് വഴിതുറന്നിരിക്കുന്നത്.
