വയനാട് ദുരന്തത്തിൽ കുടുംബത്തെ നഷ്ടമായി, ജീവിതത്തിൽ വീണ്ടും സന്തോഷം; ശ്രുതി വിവാഹിതയായി, കൈപിടിച്ച് സന്ദീപ്

വയനാട് ഉരുൾപൊട്ടൽ ദുരന്തത്തിൽ കുടുംബത്തിലെ ഒമ്പത് പേരെയും നഷ്ടപ്പെട്ട ശ്രുതി വിവാഹിതയായി. ഇന്ന് രാവിലെ ഗുരുവായൂർ ക്ഷേത്രത്തിൽ വച്ചായിരുന്നു ശ്രുതിയുടെയും സന്ദീപിന്റെയും വിവാഹം. വയനാട് കളക്ടറേറ്റിലെ ജീവനക്കാരനും മാനന്തവാടി സ്വദേശിയുമായ സന്ദീപാണ് വരൻ.

മുൻ മന്ത്രി കെ. രാജൻ ശ്രുതിയുടെ രക്ഷിതാവിന്റെ സ്ഥാനത്ത് നിന്നാണ് വിവാഹച്ചടങ്ങിൽ പങ്കെടുത്തത്. 2026 ജൂലൈയിലായിരുന്നു ശ്രുതിയുടെയും സന്ദീപിന്റെയും വിവാഹനിശ്ചയം നടന്നത്. ശ്രുതിയുടെ ജീവിതത്തിലെ ദുരന്തങ്ങളും പ്രതിസന്ധികളും അറിഞ്ഞുതന്നെ അവളെ ചേർത്തുപിടിച്ച വ്യക്തിയാണ് സന്ദീപ്.

വിവാഹശേഷം സന്തോഷത്തോടെ ജീവിക്കാൻ കഴിയണമെന്നാണ് തന്റെ പ്രാർത്ഥനയെന്ന് ശ്രുതി പ്രതികരിച്ചു. സന്തോഷത്തോടെയാണ് പുതിയ ജീവിതത്തിലേക്ക് കടക്കുന്നതെന്നും എല്ലാവർക്കും നന്ദിയുണ്ടെന്നും സന്ദീപും പറഞ്ഞു.

വയനാട് ഉരുൾപൊട്ടലിൽ കുടുംബത്തിലെ ഒമ്പത് അംഗങ്ങളെയാണ് ശ്രുതിക്ക് നഷ്ടമായത്. ദുരന്തത്തിന് പിന്നാലെ പ്രതിശ്രുത വരനും വാഹനാപകടത്തിൽ മരിച്ചിരുന്നു. അപകടത്തിൽ ശ്രുതിക്കും ഗുരുതരമായി പരിക്കേറ്റിരുന്നു. തുടർന്നാണ് ശ്രുതിക്ക് സർക്കാർ ജോലി ലഭിച്ചത്.

ജീവിതത്തിൽ നേരിട്ട വലിയ ദുരന്തങ്ങൾക്കും നഷ്ടങ്ങൾക്കും ശേഷം പുതിയൊരു ജീവിതത്തിലേക്ക് കടക്കുന്ന ശ്രുതിക്കും സന്ദീപിനും ആശംസകളുമായി നിരവധി പേരാണ് രംഗത്തെത്തുന്നത്.