ഇന്ത്യൻ സിനിമയിലെ വമ്പൻ ദൃശ്യവിസ്മയം നാളെ മുതൽ! രൺബീറും സായ് പല്ലവിയും യഷും ഒന്നിക്കുന്ന ‘രാമായണ’ തിയേറ്ററുകളിലേക്ക്

നമിത് മൽഹോത്ര നിർമ്മിച്ച് നിതീഷ് തിവാരി സംവിധാനം ചെയ്യുന്ന ബ്രഹ്മാണ്ഡ ചലച്ചിത്ര സംരംഭം ‘രാമായണ’ നാളെ (നവംബർ 4) മുതൽ പ്രേക്ഷകരിലേക്ക്. ശ്രീരാമന്റെയും സീതാദേവിയുടെയും ദിവ്യപ്രണയവും അവരുടെ ജീവിതയാത്രയും ആവിഷ്‌കരിക്കുന്ന ചിത്രം ഹിന്ദി, തമിഴ്, തെലുങ്ക്, കന്നഡ, മലയാളം എന്നീ 5 ഭാഷകളിലാണ് ഒരേസമയം ബിഗ് സ്‌ക്രീനുകളിലെത്തുന്നത്. ഐമാക്‌സ് ഉൾപ്പെടെയുള്ള പ്രീമിയം ഫോർമാറ്റുകളിൽ റിലീസ് ചെയ്യുന്ന ചിത്രം സാങ്കേതിക തികവുകളാൽ സമ്പന്നമായ ഒരു ദൃശ്യവിരുന്നായിരിക്കുമെന്ന സൂചനയാണ് ട്രെയിലർ നൽകുന്നത്.

നമിത് മൽഹോത്രയുടെ പ്രൈം ഫോക്കസ് സ്റ്റുഡിയോസും എട്ട് തവണ ഓസ്‌കാർ പുരസ്കാരം നേടിയ പ്രമുഖ വിഷ്വൽ ഇഫക്ട്സ് സ്റ്റുഡിയോയായ ‘ഡിഎൻഇജി’യും കന്നഡ താരം യഷിന്റെ ‘മോൺസ്റ്റർ മൈൻഡ് ക്രിയേഷൻസും’ സംയുക്തമായാണ് ചിത്രം നിർമ്മിച്ചിരിക്കുന്നത്. സോണി പിക്‌ചേഴ്‌സ് അന്താരാഷ്ട്ര വിതരണം ഏറ്റെടുത്തിരിക്കുന്ന ചിത്രത്തിന്റെ ഉത്തരേന്ത്യൻ വിതരണം ധർമ്മ പ്രൊഡക്ഷൻസാണ് നിർവഹിക്കുന്നത്.

ഇന്ത്യൻ സിനിമ കണ്ട ഏറ്റവും വലിയ താരനിരയാണ് ഈ ഇതിഹാസ ചിത്രത്തിൽ അണിനിരക്കുന്നത്. ശ്രീരാമനായി രൺബീർ കപൂറും സീതാദേവിയായി സായ് പല്ലവിയും എത്തുമ്പോൾ രാവണനായി ‘റോക്കിംഗ് സ്റ്റാർ’ യഷ് മാസ് പ്രകടനം പുറത്തെടുക്കുന്നു. മലയാളികൾക്ക് വൻ പ്രതീക്ഷ നൽകിക്കൊണ്ട് കൈകേയിയുടെ വേഷത്തിൽ നടി ശോഭനയും ചിത്രത്തിൽ പ്രധാന കഥാപാത്രത്തെ അവതരിപ്പിക്കുന്നുണ്ട്. പണ്ട് ദൂരദർശൻ രാമായണം പരമ്പരയിൽ ശ്രീരാമനായി എത്തി ജനഹൃദയങ്ങൾ കീഴടക്കിയ അരുൺ ഗോവിൽ ദശരഥ മഹാരാജാവായി വീണ്ടും സ്ക്രീനിലെത്തുന്നു എന്നതും പ്രത്യേകതയാണ്.