സിനിമാലോകം മാത്രമല്ല ആരാധകരും കാത്തിരുന്നൊരു തിരിച്ചുവരവായിരുന്നു അത്. വ്യക്തി ജീവിതത്തിലെ പല കാര്യങ്ങളും രഹസ്യമായി തന്നെയിരിക്കട്ടെ എന്ന നിലപാടാണ് മഞ്ജുവിന്. ഡിവോഴ്‌സിന്റെ കാരണത്തെക്കുറിച്ചും, മകളെക്കുറിച്ചുമൊക്കെയുള്ള ചോദ്യങ്ങളില്‍ മൗനം പാലിക്കാറാണ് പതിവ്. അത് തികച്ചും സ്വകാര്യമായി തന്നെയിരിക്കട്ടെ എന്നാണ് നിലപാട്.
വ്യത്യസ്തമായ കഥാപാത്രങ്ങള്‍ക്കായാണ് എപ്പോഴും കാത്തിരിക്കാറുള്ളത്. സിനിമയിലെത്തിയ കാലം തന്നെ തമിഴില്‍ നിന്നും ബോളിവുഡില്‍ നിന്നും അവസരങ്ങള്‍ ലഭിച്ചിരുന്നുവെങ്കിലും അതൊന്നും മഞ്ജു സ്വീകരിച്ചിരുന്നില്ല. അടുത്തിടെയായിരുന്നു അതില്‍ മാറ്റം വരുത്തിയത്. തമിഴകത്തേക്ക് പ്രവേശിച്ചപ്പോള്‍ തന്നെ കൈനിറയെ അവസരങ്ങളായിരുന്നു ലഭിച്ചത്. അതിന് ശേഷമായിരുന്നു ബോളിവുഡിലേക്കും പ്രവേശിച്ചത്. മികച്ചതാണെങ്കില് എല്ലാം സ്വീകരിക്കുക എന്ന നിലപാടിലാണ് മഞ്ജു.
ധനുഷിനും രജനികാന്തിനും അജിത്തിനും വിജയ് സേതുപതിക്കുമെല്ലാം അഭിനയിക്കാനുള്ള അവസരം ലഭിച്ചിരുന്നു. അജിത്തിനൊപ്പം അഭിനയിക്കുന്നതിനിടയിലായിരുന്നു ബൈക്ക് യാത്രകളില്‍ ആകൃഷ്ടയായത്. അജിത്തായിരുന്നു ഗൈഡ് ചെയ്തത്. ആ വിശേഷങ്ങള്‍ വൈറലായിരുന്നു.
ഇന്‍സ്റ്റഗ്രാമിലൂടെയായി എല്ലാ വിശേഷങ്ങളും മഞ്ജു പങ്കിടാറുണ്ട്. ഏട്ടന്‍ മധു വാര്യറിനും സന്തതസഹചാരിയായ ബിനീഷ് ചന്ദ്രയ്ക്കുമൊപ്പമുള്ള സന്തോഷനിമിഷങ്ങളായിരുന്നു കഴിഞ്ഞ ദിവസം പങ്കുവെച്ചത്. ഗുഡ് ഫുഡ്, ഗുഡ് കമ്പനി എന്നായിരുന്നു ചിത്രത്തിന് നല്‍കിയ ക്യാപ്ഷന്‍. സെല്‍ഫി പകര്‍ത്തുന്ന ഫോട്ടോയും പങ്കുവെച്ചിരുന്നു. ഫാന്‍സ് ഗ്രൂപ്പുകളിലൂടെയായി ഈ ചിത്രവും വൈറലായിക്കൊണ്ടിരിക്കുന്നുണ്ട്.
മഞ്ജു അഭിനയത്തില്‍ ശ്രദ്ധ കേന്ദ്രീകരിച്ചപ്പോള്‍ സംവിധാനമായിരുന്നു മധു വാര്യര്‍ ഫോക്കസ് ചെയ്തത്. അഭിനേതാവായി തുടങ്ങി പിന്നീട് സംവിധാനത്തിലേക്ക് തിരിയുകയായിരുന്നു അദ്ദേഹം. ചേട്ടന്റെ സിനിമയില്‍ സുപ്രധാന കഥാപാത്രമായി മഞ്ജുവും ഉണ്ടായിരുന്നു. സിനിമയുടെ നിര്‍മാണത്തിലും മഞ്ജുവിന് പങ്കാളിത്തമുണ്ടായിരുന്നു. ലളിതം സുന്ദരമെന്ന ചിത്രത്തിന് മികച്ച സ്വീകാര്യതയായിരുന്നു ലഭിച്ചത്.
പേര് സൂചിപ്പിച്ചത് പോലെ തന്നെ ലളിതമായിരുന്നു എല്ലാം. ഫീല്‍ ഗുഡ് മൂവി എന്നായിരുന്നു എല്ലാവരും പറഞ്ഞത്. വര്‍ഷങ്ങളായി ചേട്ടന്‍ മനസില്‍ കൊണ്ട് നടന്നിരുന്ന ആഗ്രഹം സഫലമാവുമ്പോള്‍, അതിന്റെ ഭാഗമാവാന്‍ കഴിഞ്ഞതില്‍ സന്തോഷം എന്നായിരുന്നു മഞ്ജു പറഞ്ഞത്. അവസാനനിമിഷമാണ് എന്നോട് ഈ ചിത്രത്തെക്കുറിച്ച് പറയുന്നത്. ബിജു മേനോനായിരുന്നു ചിത്രത്തിലെ നായകന്‍. വര്‍ഷങ്ങളായുള്ള സൗഹൃദമാണ് ഞങ്ങളുടേത്. അത് ഇപ്പോള്‍ ഒന്നുകൂടി ദൃഢമായി എന്നായിരുന്നു മഞ്ജു പറഞ്ഞത്.