പുതിയ കെപിസിസി അധ്യക്ഷൻ ആരാകും? എ.പി. അനില്‍കുമാറിന്റെ സാധ്യതയേറി; ഉണ്ണിത്താന്റെ പരസ്യ നിലപാടിൽ കടുത്ത അമർഷം
ന്യൂഡല്‍ഹി: കേരളത്തിലെ കോണ്‍ഗ്രസ് സംഘടനാ നേതൃത്വത്തിലേക്ക് പുതിയ അധ്യക്ഷനെ കണ്ടെത്താനുള്ള ചർച്ചകൾ നിർണായക ഘട്ടത്തിലേക്ക് കടക്കവെ, മുൻ മന്ത്രിയും എം.എൽ.എയുമായ എ.പി. അനില്‍കുമാറിന്റെ പേരിന് മുൻതൂക്കം. എഐസിസി സംഘടനാ ജനറല്‍ സെക്രട്ടറി കെ.സി. വേണുഗോപാലിന്റെ ശക്തമായ പിന്തുണയാണ് അനില്‍കുമാറിന് തുണയാകുന്നത്. വരുംദിവസങ്ങളിൽ ഹൈക്കമാൻഡ് ഔദ്യോഗിക ചർച്ചകൾ ആരംഭിച്ച് അന്തിമ തീരുമാനത്തിലേക്ക് എത്തും.
എന്നാൽ, അധ്യക്ഷ പദവിയിലേക്ക് ദളിത് വിഭാഗത്തിൽ നിന്നുള്ള മുഖമെന്ന നിലയിൽ അനില്‍കുമാറിന്റെ പേര് ഉയര്‍ന്നുവരുന്നത് പാര്‍ട്ടിയിൽ പുതിയ വിവാദങ്ങൾക്കും ഗ്രൂപ്പ് പോരിനും വഴിവെച്ചിട്ടുണ്ട്. തനിക്ക് അധ്യക്ഷ പദവി നിഷേധിക്കുന്നത് നായർ സമുദായാംഗമായതുകൊണ്ടു മാത്രമാണെന്ന നിലപാടിൽ മുതിർന്ന നേതാവും എം.പിയുമായ രാജ്മോഹൻ ഉണ്ണിത്താൻ ഉറച്ചുനിൽക്കുന്നത് ഹൈക്കമാൻഡിന് തലവേദനയായിരിക്കുകയാണ്. വിവാദങ്ങൾക്കിടയിലും താൻ ഉന്നയിച്ചത് വസ്തുതകളാണെന്നും മാറ്റിപ്പറയേണ്ട സാഹചര്യമില്ലെന്നും അദ്ദേഹം ഡൽഹിയിൽ വ്യക്തമാക്കുകയുണ്ടായി.
സംസ്ഥാനത്ത് പ്രമുഖ പദവികൾ വഹിക്കുന്നവരെല്ലാം ഒരേ സമുദായത്തിൽ നിന്നുള്ളവരാണെന്നും, സമുദായ സമവാക്യങ്ങൾ മാത്രം നോക്കി സ്ഥാനങ്ങൾ വീതം വെച്ചിട്ട് കോൺഗ്രസിന് യാതൊരു നേട്ടവുമുണ്ടായിട്ടില്ലെന്നും ഉണ്ണിത്താൻ നേരത്തെ തുറന്നടിച്ചിരുന്നു. താൻ എല്ലാവിധത്തിലും അധ്യക്ഷ സ്ഥാനത്തിന് അർഹനാണെന്ന അദ്ദേഹത്തിന്റെ പരസ്യമായ അവകാശവാദം സംസ്ഥാന നേതൃത്വത്തെ പ്രതിരോധത്തിലാക്കിയിട്ടുണ്ട്.
വരാനിരിക്കുന്ന തിരഞ്ഞെടുപ്പുകളും രാഷ്ട്രീയ സാഹചര്യങ്ങളും മുൻകൂട്ടി കണ്ട്, ഗ്രൂപ്പ് സമവാക്യങ്ങൾക്കതീതമായി ദളിത് പ്രതിനിധ്യം സംഘടനയുടെ തലപ്പത്ത് വേണമെന്ന നിലപാടിലാണ് കെ.സി. വേണുഗോപാലുള്ളത്. ഇത് അനില്‍കുമാറിന്റെ സാധ്യതകൾ വർദ്ധിപ്പിക്കുന്നുണ്ട്.
അധ്യക്ഷ പദവിയെച്ചൊല്ലി പാർട്ടിയിൽ ഭിന്നത രൂക്ഷമായതോടെ വിഷയം നേരിട്ട് പരിഹരിക്കാൻ ഹൈക്കമാൻഡ് രംഗത്തിറങ്ങിയിട്ടുണ്ട്. കേരളത്തിന്റെ ചുമതലയുള്ള എഐസിസി ജനറല്‍ സെക്രട്ടറിയുടെ നേതൃത്വത്തിൽ സംസ്ഥാനത്തെ മുതിർന്ന നേതാക്കളുമായി ഡൽഹിയിൽ പ്രത്യേക ചർച്ചകൾ നടക്കും. എതിർപ്പുകളെയും സാമുദായിക സമവാക്യങ്ങളെയും എങ്ങനെ മറികടക്കുമെന്ന ആശങ്കയിലാണ് അണികൾ. ഉണ്ണിത്താനെപ്പോലെയുള്ള മുതിർന്ന നേതാക്കളുടെ പരസ്യമായ അതൃപ്തി ഹൈക്കമാൻഡിന് മുന്നിലെ വലിയ വെല്ലുവിളിയാണ്. അന്തിമ പ്രഖ്യാപനം വരുംദിവസങ്ങളിൽ ഉണ്ടാകുമെന്നാണ് സൂചന.
