ആരാധകർ കാത്തിരുന്ന കൂട്ടുകെട്ട്; നയൻതാര-കവിൻ ചിത്രം ‘ഹായ്’ അഡ്വാൻസ് ബുക്കിംഗ് തുടങ്ങി

ലേഡി സൂപ്പർസ്റ്റാർ നയൻതാരയും യുവതാരം കവിനും പ്രധാന വേഷങ്ങളിൽ എത്തുന്ന ഏറ്റവും പുതിയ ചിത്രമായ ‘ഹായ്’ തിയേറ്ററുകളിൽ എത്താൻ തയ്യാറെടുക്കുന്നു. വിഷ്ണു ഇടവൻ സംവിധാനം ചെയ്യുന്ന ഈ ചിത്രം ഒരു കംപ്ലീറ്റ് ഫീൽ-ഗുഡ് ഫാമിലി റൊമാന്റിക് എന്റർടൈനർ ആയിരിക്കുമെന്നാണ് ഔദ്യോഗിക ട്രെയിലർ നൽകുന്ന സൂചന. ഈ വരുന്ന ഓഗസ്റ്റ് 28-ന് സിനിമയുടെ ആഗോള റിലീസ് പ്രഖ്യാപിച്ചിരിക്കുന്ന സാഹചര്യത്തിൽ, ചിത്രത്തിന്റെ അഡ്വാൻസ് ബുക്കിംഗ് ഇതിനോടകം തന്നെ ആരംഭിച്ചുകഴിഞ്ഞു.

ജെൻ മാർട്ടിൻ സംഗീതസംവിധാനം നിർവഹിക്കുന്ന ഈ ചിത്രത്തിന്റെ ക്യാമറ കൈകാര്യം ചെയ്യുന്നത് രാജേഷ് ശുക്ലയാണ്. ഫിലോമിൻ രാജ് എഡിറ്റിംഗും, ദിനേഷ് കാശി സ്റ്റണ്ട് കൊറിയോഗ്രാഫിയും നിർവഹിക്കുന്നു. അതേസമയം, നയൻതാരയുടെതായി മറ്റൊരു പ്രധാന ചിത്രമായ ‘മണ്ണാങ്കട്ടി സിൻസ് 1960’-ന്റെ ചിത്രീകരണം പൂർത്തിയായിട്ടുണ്ട്. ഡ്യൂഡ് വിക്കി സംവിധാനം ചെയ്യുന്ന ഈ ചിത്രത്തിൽ ഗൗരി കിഷൻ, ദേവദർശനി, നരേന്ദ്ര തുടങ്ങിയവരും പ്രധാന വേഷങ്ങളിൽ അണിനിരക്കുന്നുണ്ട്.

ഇതിനുപുറമെ, യഷ് നായകനായി ഗീതു മോഹൻദാസ് സംവിധാനം ചെയ്യുന്ന ബിഗ് ബജറ്റ് ചിത്രം ‘ടോക്സിക്’ ഉം നയൻതാരയുടേതായി റിലീസിനൊരുങ്ങുന്നുണ്ട്. ചിത്രത്തിൽ ‘ഗംഗ’ എന്ന കഥാപാത്രമായാണ് നയൻതാര എത്തുന്നത്. കന്നഡ, ഇംഗ്ലീഷ് ഭാഷകളിൽ ഒരേസമയം ചിത്രീകരിച്ച ഈ പാൻ-ഇന്ത്യൻ ചിത്രം ഹിന്ദി, തെലുങ്ക്, തമിഴ്, മലയാളം ഉൾപ്പെടെയുള്ള വിവിധ ഭാഷകളിൽ തിയേറ്ററുകളിൽ എത്തും.