കെപിസിസി പ്രസിഡന്റ് ആര്?തീരുമാനം സെപ്തംബറിലേക്ക് നീളും!
കെപിസിസി പ്രസിഡന്റിനെ സംബന്ധിച്ച തീരുമാനം വൈകുമെന്ന് സൂചന. ഡൽഹിയിലും കേരളത്തിലുമായി കഴിഞ്ഞ ദിവസങ്ങളിൽ മുഖ്യമന്ത്രി വി.ഡി. സതീശനും ആഭ്യന്തരമന്ത്രി രമേശ് ചെന്നിത്തലയും ഉൾപ്പെടെയുള്ള നേതാക്കൾ കേന്ദ്ര നേതൃത്വവുമായി കൂടിക്കാഴ്ച നടത്തിയിരുന്നു. എന്നിട്ടും അധ്യക്ഷ സ്ഥാനത്തേക്ക് ഒറ്റപ്പേരിലേക്ക് എത്താൻ നേതൃത്വത്തിന് കഴിഞ്ഞിട്ടില്ല.
ഓണത്തിന് മുമ്പ് കേരളത്തിലെ കോൺഗ്രസിനെ നയിക്കാൻ പുതിയ പ്രസിഡന്റ് എത്തുമെന്നായിരുന്നു നേരത്തെ നേതൃത്വം അറിയിച്ചിരുന്നത്. എന്നാൽ നിലവിലെ സൂചനകൾ പ്രകാരം സെപ്തംബർ ആദ്യവാരത്തിലായിരിക്കും പ്രഖ്യാപനം. ഒറ്റപ്പേര് നിർദേശിക്കാൻ മുതിർന്ന നേതാക്കൾക്കും ഹൈക്കമാൻഡിനും കഴിയാത്തതാണ് തീരുമാനം നീളാൻ പ്രധാന കാരണം.
സംസ്ഥാന സർക്കാരുമായി പൂർണ സഹകരണം ഉറപ്പാക്കാൻ കഴിയുന്ന തരത്തിലുള്ള ഒരാളെ കെപിസിസി അധ്യക്ഷനാക്കണമെന്നാണ് നേതൃത്വത്തിന്റെ നിലപാട്. നിലവിൽ മുതിർന്ന നേതാവായ രമേശ് ചെന്നിത്തല മാത്രമാണ് ഒരു പേര് മുന്നോട്ടുവച്ചിട്ടുള്ളതെന്നാണ് വിവരം.
കെപിസിസി അധ്യക്ഷനെ തീരുമാനിക്കുന്നതിൽ കെ.സി. വേണുഗോപാലിന്റെ നിലപാട് നിർണായകമാകുമെന്നാണ് സൂചന. മുഖ്യമന്ത്രി സ്ഥാനത്തേക്ക് പരിഗണിക്കാതിരുന്നതിന് പിന്നാലെ കെപിസിസി അധ്യക്ഷ സ്ഥാനവുമായി ബന്ധപ്പെട്ട് കെ.സി. വേണുഗോപാലിന് ഹൈക്കമാൻഡ് ചില ഉറപ്പുകൾ നൽകിയിരുന്നുവെന്നും റിപ്പോർട്ടുകളുണ്ട്.
ഓണത്തിന് ശേഷം മുൻ കെപിസിസി അധ്യക്ഷന്മാരെ ഉൾപ്പെടെ ഡൽഹിയിലേക്ക് വിളിച്ചുവരുത്തി നിർണായക ചർച്ചകൾ നടത്താനും ഹൈക്കമാൻഡ് ആലോചിക്കുന്നതായാണ് വിവരം. ഇതോടെ കേരള കോൺഗ്രസിന്റെ പുതിയ അധ്യക്ഷനെ പ്രഖ്യാപിക്കാൻ ഇനിയും കാത്തിരിക്കേണ്ടി വരുമെന്നാണ് സൂചന.
