ടി.ജി. മോഹൻദാസിനെ കസ്റ്റഡിയിലെടുത്ത നടപടി വിവേചനപരം; സർക്കാരിനെതിരെ ബിജെപി
തിരുവനന്തപുരം: സംഘപരിവാർ സഹയാത്രികൻ ടി.ജി. മോഹൻദാസിനെ അവധി ദിവസം നോക്കി പോലീസ് കസ്റ്റഡിയിലെടുത്ത നടപടി തികച്ചും വിവേചനപരവും അപലപനീയവുമാണെന്ന് ബിജെപി. ഡൽഹിയിൽ സമരം ചെയ്ത വിദ്യാർത്ഥികൾക്കെതിരായ പരാമർശത്തിന്റെ പേരിലാണ് മോഹൻദാസിനെതിരെ പോലീസ് നടപടി സ്വീകരിച്ചതെന്ന് ബിജെപി ആരോപിച്ചു.
സംസ്ഥാനത്തെ പ്രളയ ദുരിതാശ്വാസ പ്രവർത്തനങ്ങളിലെ വീഴ്ചകളിൽനിന്ന് ശ്രദ്ധ തിരിക്കാനുള്ള സർക്കാരിന്റെ നീക്കമാണ് നടപടിക്ക് പിന്നിലെന്നും ബിജെപി കേരളം ഔദ്യോഗിക ഫെയ്സ്ബുക്ക് പേജിലൂടെ ആരോപിച്ചു. മോഹൻദാസിന്റെ ചില പരാമർശങ്ങൾ സ്വാഗതാർഹമല്ലെങ്കിലും, പ്രധാനമന്ത്രിയെ വധിക്കുമെന്ന് ഭീഷണിപ്പെടുത്തിയവരെ സംരക്ഷിക്കുന്ന സർക്കാരിന്റെ നിലപാട് ഇരട്ടത്താപ്പാണെന്നും ബിജെപി കുറ്റപ്പെടുത്തി.
മുതലപ്പൊഴി, നീണ്ടകര തുടങ്ങിയ തീരദേശ മേഖലകളിൽ മത്സ്യത്തൊഴിലാളികൾ അപകടത്തിൽപ്പെടുമ്പോൾ ആവശ്യമായ ഇടപെടലുകൾ നടത്തുന്നതിൽ സർക്കാർ പരാജയപ്പെടുകയാണെന്നും ബിജെപി വിമർശിച്ചു. മഴക്കെടുതിയിലും മണ്ണിടിച്ചിലിലും ദുരിതമനുഭവിക്കുന്നവരെ ആശ്വസിപ്പിക്കാതെ ജനപ്രതിനിധികൾ മാറിനിൽക്കുന്നത് അപമാനകരമാണെന്നും പാർട്ടി ആരോപിച്ചു.
വന്ദേമാതരം, സവർക്കർ തുടങ്ങിയ വിഷയങ്ങളിൽ അനാവശ്യ വിവാദങ്ങൾ സൃഷ്ടിച്ച് സമൂഹത്തിൽ മതവിഭജനം വളർത്താനുള്ള ശ്രമങ്ങളിൽനിന്ന് സർക്കാർ പിന്തിരിയണമെന്നും ബിജെപി ആവശ്യപ്പെട്ടു.
