കെപിസിസി പുനഃസംഘടനയ്ക്ക് വേഗം; അധ്യക്ഷ സ്ഥാനത്തേക്ക് പ്രമുഖരുടെ പേരുകൾ ചർച്ചയിൽ
തിരുവനന്തപുരം: കേരളത്തിലെ കോൺഗ്രസ് സംഘടനയിൽ സമഗ്ര അഴിച്ചുപണിക്ക് വഴിയൊരുക്കുന്ന കെപിസിസി പുനഃസംഘടനാ നടപടികൾ സജീവമാകുന്നു. വനിതകൾക്ക് കൂടുതൽ പ്രാതിനിധ്യം ഉറപ്പാക്കുന്നതിനൊപ്പം ‘ഒരാൾക്ക് ഒരു പദവി’ എന്ന നയം കർശനമായി നടപ്പാക്കണമെന്ന ആവശ്യവും പാർട്ടിക്കുള്ളിൽ ശക്തമായിട്ടുണ്ട്.
ജനപ്രതിനിധികളായ എംഎൽഎമാരെയും മറ്റ് തെരഞ്ഞെടുക്കപ്പെട്ട പ്രതിനിധികളെയും കെപിസിസിയിലെ പ്രധാന സംഘടനാ ചുമതലകളിൽ നിന്ന് ഒഴിവാക്കണമെന്നും, നിയമസഭാ തിരഞ്ഞെടുപ്പിൽ സ്ഥാനാർത്ഥിത്വം ലഭിക്കാത്ത നേതാക്കളെ സംഘടനാ സ്ഥാനങ്ങളിലേക്ക് പരിഗണിക്കണമെന്നുമാണ് ഉയരുന്ന പ്രധാന നിർദേശങ്ങൾ.
കോൺഗ്രസ് ഹൈക്കമാൻഡിന്റെ നിർദേശപ്രകാരം കെപിസിസിയെ പൂർണമായും പുനഃസംഘടിപ്പിക്കാനാണ് തീരുമാനം. ഇതിന്റെ ഭാഗമായി സംസ്ഥാനത്തെ ഭൂരിഭാഗം ഡിസിസികളിലും നേതൃമാറ്റം ഉണ്ടാകുമെന്നാണ് സൂചന. കെപിസിസി അധ്യക്ഷ സ്ഥാനത്തേക്ക് നിരവധി മുതിർന്ന നേതാക്കളുടെ പേരുകൾ സജീവ ചർച്ചയിലുണ്ട്.
ബെന്നി ബഹനാൻ, കൊടിക്കുന്നിൽ സുരേഷ്, ജോസഫ് വാഴക്കൻ, ആന്റോ ആന്റണി, വി.എസ്. ശിവകുമാർ, എം.കെ. രാഘവൻ, മാത്യു കുഴൽനാടൻ എന്നിവരുടെ പേരുകളാണ് പ്രധാനമായും പരിഗണനയിലുള്ളത്.
കെപിസിസി പ്രസിഡന്റ് സ്ഥാനത്തിനായി താൻ പ്രത്യേക അവകാശവാദമൊന്നും ഉന്നയിച്ചിട്ടില്ലെന്ന് കൊടിക്കുന്നിൽ സുരേഷ് വ്യക്തമാക്കി. കെപിസിസിയിലും ഡിസിസികളിലും അനിവാര്യമായ മാറ്റങ്ങൾ ഉണ്ടാകുമെന്നും അന്തിമ തീരുമാനം ഹൈക്കമാൻഡ് കൈക്കൊള്ളുമെന്നും അദ്ദേഹം പറഞ്ഞു.
മറ്റ് സംസ്ഥാനങ്ങളിലെ കോൺഗ്രസ് സംഘടനാ പുനഃസംഘടന പൂർത്തിയായ സാഹചര്യത്തിൽ കേരളത്തിലെ നടപടികൾ അതിവേഗം പൂർത്തിയാക്കാനാണ് തീരുമാനം. കെപിസിസി യോഗത്തിൽ കെ.സി. വേണുഗോപാൽ ഇക്കാര്യം നേതാക്കളെ അറിയിച്ചതായാണ് വിവരം. തിരഞ്ഞെടുപ്പുകൾ മൂലമാണ് കേരളത്തിലെ പുനഃസംഘടന വൈകിയതെന്നും ഇനി കാലതാമസം അനുവദിക്കില്ലെന്നും അദ്ദേഹം വ്യക്തമാക്കിയതായി പാർട്ടി വൃത്തങ്ങൾ സൂചിപ്പിക്കുന്നു.
വരാനിരിക്കുന്ന നിയമസഭാ തിരഞ്ഞെടുപ്പിന് മുന്നോടിയായി സംഘടനയെ കൂടുതൽ ശക്തിപ്പെടുത്തുകയെന്ന ലക്ഷ്യത്തോടെയാണ് കോൺഗ്രസ് നേതൃത്വം പുനഃസംഘടനാ നടപടികൾ വേഗത്തിലാക്കുന്നത്.
