വന്യജീവി ആക്രമണത്തിൽ മരണം സംഭവിച്ചാൽ ധാർമിക ഉത്തരവാദിത്വം വനംവകുപ്പിനെന്ന് മന്ത്രി ഷിബു ബേബി ജോൺ

തിരുവനന്തപുരം: വന്യജീവി ആക്രമണത്തിൽ വ്യക്തികൾ മരിക്കുകയാണെങ്കിൽ അതിന്റെ ധാർമിക ഉത്തരവാദിത്വം വനംവകുപ്പ് ഏറ്റെടുക്കുമെന്ന് വനംമന്ത്രി ഷിബു ബേബി ജോൺ വ്യക്തമാക്കി. ഇത്തരം സംഭവങ്ങളിൽ ഇരകളുടെ കുടുംബങ്ങൾക്ക് നഷ്ടപരിഹാരം വേഗത്തിൽ ലഭ്യമാക്കുന്നതിനുള്ള നടപടികൾ സ്വീകരിക്കുമെന്നും മന്ത്രി പറഞ്ഞു.

കാട്ടുപന്നി ശല്യം നിയന്ത്രിക്കുന്നതിന്റെ ഭാഗമായി ജൂൺ 15-ന് സംസ്ഥാനതലത്തിൽ പ്രത്യേക സ്‌പെഷ്യൽ ഡ്രൈവ് സംഘടിപ്പിക്കുമെന്നും അദ്ദേഹം അറിയിച്ചു. വന്യജീവി ആക്രമണങ്ങൾ കുറയ്ക്കുന്നതിനും ജനങ്ങളുടെ സുരക്ഷ ഉറപ്പാക്കുന്നതിനുമുള്ള വിവിധ പദ്ധതികൾ സർക്കാർ നടപ്പാക്കിവരികയാണെന്നും മന്ത്രി വ്യക്തമാക്കി.

സോളാർ വേലികളുടെ വ്യാപ്തി വർധിപ്പിക്കുന്നതിനും വനംവകുപ്പ് തീരുമാനിച്ചിട്ടുണ്ട്. നിലവിൽ സംസ്ഥാനത്ത് ഏകദേശം 2000 കിലോമീറ്റർ സോളാർ വേലിയുള്ളത് അടുത്ത 100 ദിവസത്തിനുള്ളിൽ 2500 കിലോമീറ്ററായും ഈ വർഷം അവസാനിക്കുന്നതിന് മുമ്പ് 3000 കിലോമീറ്ററായും ഉയർത്തുമെന്ന് മന്ത്രി പറഞ്ഞു.

സോളാർ വേലികളുടെ പ്രവർത്തനക്ഷമത ഉറപ്പാക്കുന്നതിനായി വോൾട്ടേജ് നില പൊതുജനങ്ങൾക്കും നിരീക്ഷിക്കാനാകുന്ന ഒരു കേന്ദ്രീകൃത ഡിജിറ്റൽ പ്ലാറ്റ്‌ഫോം രൂപീകരിക്കുമെന്നും അദ്ദേഹം അറിയിച്ചു.

വയനാട്ടിലെ വന്യജീവി ശല്യത്തെക്കുറിച്ചും മന്ത്രി പ്രതികരിച്ചു. സാധാരണയായി 20 ചതുരശ്ര കിലോമീറ്റർ വിസ്തൃതിയുള്ള ആവാസവ്യവസ്ഥ ആവശ്യമായ ഒരു കടുവയ്ക്ക് വയനാട്ടിൽ ലഭിക്കുന്നത് നാല് ചതുരശ്ര കിലോമീറ്റർ മാത്രം ആണെന്ന് അദ്ദേഹം ചൂണ്ടിക്കാട്ടി. ആവാസവ്യവസ്ഥയുടെ ഈ പരിമിതിയാണ് വന്യജീവികൾ ജനവാസ മേഖലകളിലേക്ക് എത്തുന്നതിനുള്ള പ്രധാന കാരണങ്ങളിലൊന്നെന്നും മന്ത്രി ഷിബു ബേബി ജോൺ വ്യക്തമാക്കി.