ധവളപത്രത്തിനെതിരെ തോമസ് ഐസക്; എഐ ഉപയോഗവും രേഖ ചോർച്ചയും സംബന്ധിച്ച് ഗുരുതര ആരോപണം
തിരുവനന്തപുരം: സംസ്ഥാന സർക്കാരിന്റെ ധവളപത്രം സംബന്ധിച്ച് ഗുരുതര ആരോപണങ്ങളുമായി മുൻ ധനമന്ത്രി ഡോ. തോമസ് ഐസക്. ധവളപത്രത്തിലെ വിവരങ്ങൾ വിശകലനം ചെയ്യുന്നതിനും തയ്യാറാക്കുന്നതിനും ആർട്ടിഫിഷ്യൽ ഇന്റലിജൻസ് (എഐ) പ്ലാറ്റ്ഫോമുകൾ ഉപയോഗിച്ചിട്ടുണ്ടെന്ന് അദ്ദേഹം ആരോപിച്ചു. രേഖയുടെ ഗണ്യമായ ഭാഗം എഐയുടെ സഹായത്തോടെയാണ് തയ്യാറാക്കിയതെന്നും അദ്ദേഹം പറഞ്ഞു.
ധനകാര്യ വകുപ്പിന്റെ സീക്രട്ട് സെക്ഷനിലുള്ള രേഖകൾ പൊതുഇടങ്ങളിലെത്തിയ സാഹചര്യത്തിൽ പ്രതിപക്ഷ നേതാവ് വി.ഡി. സതീശൻ വിശദീകരണം നൽകണമെന്നും തോമസ് ഐസക് ആവശ്യപ്പെട്ടു. സീക്രട്ട് സെഷനുമായി ബന്ധപ്പെട്ട രേഖകൾ പുറത്തുപോയ സംഭവത്തിൽ സ്പീക്കറുടെ നിലപാടിനായി കാത്തിരിക്കുകയാണെന്നും അദ്ദേഹം വ്യക്തമാക്കി.
രാഷ്ട്രീയ ലക്ഷ്യത്തോടെയാണ് ധവളപത്രത്തിൽ വസ്തുതാവിരുദ്ധമായ വിവരങ്ങൾ ഉൾപ്പെടുത്തിയതെന്നും തോമസ് ഐസക് ആരോപിച്ചു. പ്രത്യേകിച്ച് എസ്.സി–എസ്.ടി പ്ലാൻ ഫണ്ടുമായി ബന്ധപ്പെട്ട വിഷയങ്ങളിൽ ജനങ്ങളെ തെറ്റിദ്ധരിപ്പിക്കുന്ന തരത്തിലുള്ള പരാമർശങ്ങളാണ് രേഖയിലുള്ളതെന്നും അദ്ദേഹം പറഞ്ഞു.
ധവളപത്രത്തിലെ ആരോപണങ്ങളും വിവരങ്ങളും സംബന്ധിച്ച് കൂടുതൽ പരിശോധനയും വ്യക്തതയും ആവശ്യമാണെന്നും മുൻ ധനമന്ത്രി കൂട്ടിച്ചേർത്തു.
