‘അമ്മ’ വിവാദത്തിൽ ഇടപെടൽ; എത്രയും പെട്ടെന്ന് പരിഹാരം വേണമെന്ന് പിഷാരടി
പാലക്കാട്: താരസംഘടനയായ അമ്മയിലെ ആഭ്യന്തര തർക്കത്തിൽ പ്രതികരണവുമായി നടനും പാലക്കാട് എംഎൽഎയുമായ രമേഷ് പിഷാരടി. വാർത്താസമ്മേളനത്തിലാണ് അദ്ദേഹം സംഘടനയിലെ വിവാദങ്ങളെ കുറിച്ച് നിലപാട് വ്യക്തമാക്കിയത്.
പരാതിക്കാരിയായ അൻസിബ ഹസൻ, ആരോപണവിധേയനായ ടിനി ടോം, സംഘടനയുടെ പ്രസിഡന്റ് ശ്വേതാ മേനോൻ എന്നിവരുമായി താൻ സംസാരിച്ചിട്ടുണ്ടെന്ന് പിഷാരടി പറഞ്ഞു.
ആളുകൾ പരിഹാസത്തോടെ ചർച്ച ചെയ്യുന്ന നിലയിലേക്ക് പ്രശ്നം എത്തിക്കാതെ എത്രയും പെട്ടെന്ന് സംഘടനയ്ക്കുള്ളിൽ തന്നെ പരിഹാരം കാണണമെന്ന് അദ്ദേഹം ആവശ്യപ്പെട്ടു. ചെറിയ അംഗസംഖ്യയുള്ള സംഘടനയായിട്ടും വലിയ മാധ്യമശ്രദ്ധ ലഭിക്കുന്നതിനാൽ വിഷയങ്ങൾ കൂടുതൽ സൂക്ഷ്മമായി കൈകാര്യം ചെയ്യണമെന്നും അദ്ദേഹം അഭിപ്രായപ്പെട്ടു.
സിനിമാ മേഖലയ്ക്ക് പുറത്തുള്ള മുതിർന്ന കലാകാരന്മാരുടെ ജീവിതോപാധിയും പെൻഷനും ബാധിക്കപ്പെടുന്ന തരത്തിലേക്ക് പ്രശ്നങ്ങൾ നീളരുതെന്നും അദ്ദേഹം ഓർമ്മിപ്പിച്ചു. മുൻ തിരഞ്ഞെടുപ്പിൽ വനിതാ പ്രതിനിധിത്വം ഉറപ്പാക്കുന്നതിനായി താൻ സീറ്റ് മാറിക്കൊടുത്തതായും അദ്ദേഹം പറഞ്ഞു.
സംഘടനയുടെ ആഭ്യന്തര കാര്യങ്ങൾ പൊതുചർച്ചയാകാതെ അടിയന്തരമായി പരിഹരിക്കണമെന്നും, ഡിജിറ്റൽ കണ്ടന്റുകളായി പരിഹാസ്യാവസ്ഥയിലേക്ക് വിഷയം മാറരുതെന്നും പിഷാരടി അഭിപ്രായപ്പെട്ടു.
