തമിഴ്നാട് നിയമസഭയിൽ വിജയ് Vs ഉദയനിധി സ്റ്റാലിൻ അരങ്ങേറ്റം; എംഎൽഎമാരുടെ സത്യപ്രതിജ്ഞ പൂർത്തിയായി
ചെന്നൈ: തമിഴ്നാട് നിയമസഭാംഗമായി വിജയ് സത്യപ്രതിജ്ഞ ചെയ്തു. പ്രോട്ടേം സ്പീക്കർ എം വി കറുപ്പയ്യ സത്യവാചകം ചൊല്ലിക്കൊടുത്തു. വിജയ് ഉൾപ്പെടെ ടിവികെയിൽ നിന്ന് 99 എംഎൽഎമാരാണ് ആദ്യമായി നിയമസഭാംഗങ്ങളായി ഇന്ന് സത്യപ്രതിജ്ഞ ചെയ്തത്.
ഡിഎംകെ നേതാവായ ഉദയനിധി സ്റ്റാലിൻയും സത്യപ്രതിജ്ഞ ചെയ്തു. തിരഞ്ഞെടുപ്പിന് പിന്നാലെ ഡിഎംകെ നിയമസഭാ കക്ഷി നേതാവായി ഉദയനിധി സ്റ്റാലിനെ തെരഞ്ഞെടുത്തതും ശ്രദ്ധേയമായി.
നിയമസഭയിലെ സ്പീക്കർ, ഡെപ്യൂട്ടി സ്പീക്കർ തെരഞ്ഞെടുപ്പ് നാളെ നടക്കും. ബുധനാഴ്ചയ്ക്കകം വിശ്വാസവോട്ടെടുപ്പ് നടത്തണമെന്നാണ് ഗവർണറുടെ നിർദേശം. പുതിയ സർക്കാരിന്റെ പ്രവർത്തനം സംബന്ധിച്ച തുടർനടപടികളിലേക്ക് തമിഴ്നാട് രാഷ്ട്രീയം കടക്കുന്നതിനിടെ സഭാ നടപടികൾ നിർണായക ഘട്ടത്തിലേക്ക് കടക്കുകയാണ്.
മുതിർന്ന നേതാക്കൾ ഉൾപ്പെടെ പലരും ഇത്തവണത്തെ തിരഞ്ഞെടുപ്പിൽ പരാജയപ്പെട്ട സാഹചര്യത്തിൽ, മുൻ മുഖ്യമന്ത്രി എം കെ സ്റ്റാലിൻ ഉൾപ്പെടെയുള്ളവരുടെ അഭാവം ഡിഎംകെ നേതൃത്വത്തിൽ പുതിയ മാറ്റങ്ങൾക്ക് വഴിയൊരുക്കുന്നുവെന്ന വിലയിരുത്തലും രാഷ്ട്രീയ കേന്ദ്രങ്ങളിൽ ഉയരുന്നു.
