നമ്മള് കാണുന്നപോലെയല്ല കാക്കകള് പരസ്പരം കാണുന്നത്
ലണ്ടന്: ‘കാക്ക കുളിച്ചാല് കൊക്കാകില്ലെന്നു’ പരിഹസിക്കുന്നത് മനുഷ്യരാണ്. എന്നാല്, മനുഷ്യര് കാണുന്നപ്പോലെയല്ല കാക്കകള് പരസ്പരം കാണുന്നതെന്നു ഗവേഷകര്. കണ്ണുകളുടെ പ്രത്യേകതയാണു കാരണം. മനുഷ്യരുടെ കണ്ണുകളില് മൂന്നുതരം കോണ് കോശങ്ങളുണ്ട്, ഇത് നമുക്ക് കാണാന് കഴിയുന്ന വര്ണ്ണരാജി നല്കുന്നു. എന്നാല് പക്ഷികളുടെ കണ്ണുകളില് നാലുതരം കോണ് കോശങ്ങളുണ്ട്. അതാണു വ്യത്യാസത്തിനു കാരണം. കാക്കള്ക്ക് മനുഷ്യരേക്കാള് കൂടുതല് അള്ട്രാവയലറ്റ് (യു.വി) പരിധിയില് കാണാന് കഴിയുമെന്നു ബിങ്ടണ് സര്വകലാശാലയിലെ ബയോളജിക്കല് സയന്സസിലെ അസോസിയേറ്റ് പ്രഫസര് ആന് ബി.ക്ലാര്ക്ക് വ്യക്തമാക്കി. 29 മ്യൂസിയം ശേഖരങ്ങളില്നിന്നുള്ള കാക്കകളുടെ തൂവലുകളാണു ഗവേഷകര് പരിശോധിച്ചത്. കാക്കകള്ക്ക് തിളക്കമാര്ന്ന നിറങ്ങള് ഇല്ല, ഇത് കറുത്ത തൂവലുകളില് നേരിയ പര്പ്പിള് അല്ലെങ്കില് പച്ച നിറങ്ങള് സൃഷ്ടിക്കുന്നു. മനുഷ്യരുടെ കണ്ണുകള്ക്ക് ആ നിറങ്ങള് വേര്തിരിച്ചറിയാന് പ്രയാസമാണ്.
ചില പക്ഷികളുടെ തൂവലുകള് യു.വി. പ്രകാശത്തെ പ്രതിഫലിപ്പിക്കും. അവയുടെ ആരോഗ്യനില അല്ലെങ്കില് ജൈവിക ലിംഗഭേദം സൂചിപ്പിക്കാന് അതു സഹായിക്കും. ആകര്ഷകമായ തൂവലുകള് പക്ഷിയുടെ മികച്ച ജീവിതനിലവാരം, ആരോഗ്യനില, ഇണകളെ ആകര്ഷിക്കാനുള്ള കഴിവ് എന്നിവയെ സൂചിപ്പിക്കാം. കാക്കകളുടെ പ്രായവുമായി ബന്ധപ്പെട്ട ചില വ്യത്യാസങ്ങള് നഗ്നനേത്രങ്ങള്ക്ക് കാണാന് കഴിയും. ഒരു വയസ്സുള്ള കാക്കകള്ക്കു മികച്ച തൂവലുകളില്ല. ആദ്യ തവണ തൂവല് കൊഴിഞ്ഞ് പുതിയതു വരുമ്പോള് നിലവാരം ഉയരും. തൂവലുകള് കൂടുതല് മികച്ചതാകും. പിന്നീട് പ്രായമാകുമ്പോള് അത് കുറയുകയും ചെയ്യും. കാക്കകളുടെ നെറ്റിയിലെ തൂവലുകള് മറ്റ് തൂവലുകളെക്കാള് കറുത്തതാണ്. അവ പ്രകാശത്തെ പ്രതിഫലിപ്പിക്കുന്നില്ല. കാക്കകള് തറയില് ഭക്ഷണം തേടുന്നവരാണ്, കണ്ണുകള്ക്ക് മുകളിലുള്ള ഈ അള്ട്രാകറുത്ത തൂവലുകള് ശക്തമായ സൂര്യപ്രകാശത്തില് തിളക്കം കുറയ്ക്കാന് സഹായിച്ചേക്കാം. ഇത് അവരുടെ കാഴ്ചശക്തി വര്ധിപ്പിക്കാനും തറയില്നിന്നുള്ള അമിതമായ പ്രതിഫലനം കുറയ്ക്കാനും സഹായിച്ചേക്കാം- ഗവേഷകര് പറഞ്ഞു.
