നിമിഷപ്രിയയെ രണ്ടുദിവസത്തിനകം തൂക്കിലേറ്റിയേക്കും; സുപ്രീം കോടതിയെ സമീപിച്ച് കെ.എ പോൾ, മാധ്യമങ്ങൾക്ക് വിലക്കേർപ്പെടുത്തണമെന്ന് ആവശ്യം

ന്യൂഡൽഹി: യെമൻ പൗരനെ കൊലപ്പെടുത്തിയ കേസിൽ വധശിക്ഷയ്ക്ക് വിധിക്കപ്പെട്ട് സനായിലെ ജയിലിൽ കഴിയുന്ന മലയാളി നഴ്സ് നിമിഷപ്രിയയുടെ ശിക്ഷ ഓഗസ്റ്റ് 24-നോ 25-നോ നടപ്പിലാക്കാൻ സാധ്യതയുണ്ടെന്ന് ഗ്ലോബൽ പീസ് ഇനിഷ്യേറ്റീവ് സ്ഥാപകൻ കെ.എ പോൾ. നിമിഷയുടെ മോചനവുമായി ബന്ധപ്പെട്ട നിർണായക ചർച്ചകൾ യെമനിൽ നടക്കുന്നതിനാൽ കേസിൽ മാധ്യമങ്ങളെ വിലക്കണമെന്ന് ആവശ്യപ്പെട്ട് സുപ്രീം കോടതിയിൽ സമർപ്പിച്ച ഹർജിയിലാണ് പോൾ ഈ ഞെട്ടിക്കുന്ന വെളിപ്പെടുത്തൽ നടത്തിയത്.

നിമിഷപ്രിയയുടെ ആവശ്യപ്രകാരമാണ് താൻ കോടതിയെ സമീപിച്ചതെന്ന് വ്യക്തമാക്കിയ കെ.എ പോൾ, ജസ്റ്റിസുമാരായ വിക്രം നാഥ്, സന്ദീപ് മേത്ത എന്നിവരടങ്ങിയ ബെഞ്ചിന് മുന്നാകെ നേരിട്ട് ഹാജരായി കാര്യങ്ങൾ വിശദീകരിച്ചു. “യെമനിൽ നിർണായകമായ ചർച്ചകൾ നടക്കുകയാണ്. ഈ സാഹചര്യത്തിൽ മാധ്യമങ്ങൾ വാർത്തകൾ റിപ്പോർട്ട് ചെയ്യുന്നത് ചർച്ചകളെ പ്രതികൂലമായി ബാധിക്കും. അതിനാൽ അടുത്ത മൂന്ന് ദിവസത്തേക്ക് കേസുമായി ബന്ധപ്പെട്ട വാർത്തകൾക്ക് സമ്പൂർണ്ണ വിലക്ക് ഏർപ്പെടുത്തണം,” പോൾ കോടതിയോട് അഭ്യർത്ഥിച്ചു.

‘സേവ് നിമിഷപ്രിയ’ ആക്ഷൻ കൗൺസിലിന്റെ അഭിഭാഷകനായ സുഭാഷ് ചന്ദ്രൻ, കാന്തപുരം എ.പി അബൂബക്കർ മുസ്ലിയാർ എന്നിവർ വിഷയത്തിൽ പ്രതികരിക്കുന്നത് വിലക്കണമെന്നും പോൾ ആവശ്യപ്പെട്ടു. “സുഭാഷ് ചന്ദ്രനും അദ്ദേഹത്തിന്റെ കൂട്ടാളികളും, കാന്തപുരം പോലുള്ള വ്യക്തികളും ഞങ്ങൾ പണം നൽകിയെന്നും ചർച്ച നടത്തിയെന്നും പറയുന്നു. എന്നാൽ ഞാനവരെ ജീവിതത്തിൽ കണ്ടിട്ടുപോലുമില്ല. അവരുമായി എനിക്ക് ഒരു ബന്ധവുമില്ല, അവരിൽ നിന്ന് ഒരു ഡോളർ പോലും ഞാൻ വാങ്ങിയിട്ടില്ല,” പോൾ കോടതിയിൽ വ്യക്തമാക്കി.

പോളിന്റെ വാദങ്ങൾ കേട്ട സുപ്രീം കോടതി, ഹർജിയിൽ കേന്ദ്ര സർക്കാരിന്റെ നിലപാട് തേടി അറ്റോർണി ജനറലിന് നോട്ടീസ് അയച്ചു. കേസ് ഓഗസ്റ്റ് 25-ന് വീണ്ടും പരിഗണിക്കാമെന്നും അന്ന് തന്നെ വിഷയത്തിൽ ഉത്തരവിറക്കാമെന്നും കോടതി അറിയിച്ചു. നിമിഷപ്രിയയുടെ വധശിക്ഷ നടപ്പാക്കാൻ സാധ്യതയുണ്ടെന്ന് പോൾ പറയുന്ന അതേ ദിവസം തന്നെയായിരിക്കും കോടതി കേസ് പരിഗണിക്കുക എന്നത് നിർണായകമാണ്.

നേരത്തെ, നിമിഷപ്രിയയുടെ മോചനദ്രവ്യത്തിനെന്ന പേരിൽ കെ.എ പോൾ വ്യാജ പണപ്പിരിവ് നടത്തുന്നുവെന്ന് ആരോപണമുയർന്നിരുന്നു. നിമിഷയുടെ മോചനത്തിനായി ഇന്ത്യൻ വിദേശകാര്യ മന്ത്രാലയത്തിന്റെ അക്കൗണ്ടിലേക്ക് പണം സംഭാവന ചെയ്യണമെന്ന് ആവശ്യപ്പെട്ട് പോളിന്റെ എക്സ് അക്കൗണ്ടിൽ വന്ന പോസ്റ്റ് വ്യാജമാണെന്ന് വിദേശകാര്യ മന്ത്രാലയം തന്നെ ഔദ്യോഗികമായി സ്ഥിരീകരിച്ചിരുന്നു. മന്ത്രാലയത്തിന്റെ ഫാക്ട് ചെക്ക് വിഭാഗം പോളിന്റെ പോസ്റ്റിന്റെ സ്ക്രീൻഷോട്ട് സഹിതമാണ് ഇത് വ്യാജമാണെന്ന് അറിയിച്ചത്. ഈ പശ്ചാത്തലത്തിലാണ് പോൾ ഇപ്പോൾ നിർണായക വെളിപ്പെടുത്തലുകളുമായി സുപ്രീം കോടതിയെ സമീപിച്ചിരിക്കുന്നത്.