വീര്യം കുറഞ്ഞ മദ്യത്തിന് നികുതിയിളവ്; സംസ്ഥാനത്താകെ ഡിവൈഎഫ്ഐ പ്രതിഷേധം, പല ജില്ലകളിൽ സംഘർഷം
തിരുവനന്തപുരം: വീര്യം കുറഞ്ഞ മദ്യത്തിന് നികുതിയിളവ് പ്രഖ്യാപിച്ച യുഡിഎഫ് സർക്കാരിന്റെ തീരുമാനത്തിനെതിരെ സംസ്ഥാനത്താകെ ഡിവൈഎഫ്ഐ പ്രതിഷേധം ശക്തമായി. വിവിധ ജില്ലകളിൽ കളക്ടറേറ്റുകളിലേക്ക് നടത്തിയ മാർച്ചിനിടെ സംഘർഷാവസ്ഥ രൂപപ്പെട്ടു.
മലപ്പുറം, തൃശൂർ, പത്തനംതിട്ട, കൊച്ചി, ഇടുക്കി, ആലപ്പുഴ, കോട്ടയം എന്നിവിടങ്ങളിലായിരുന്നു ഡിവൈഎഫ്ഐയുടെ പ്രതിഷേധ മാർച്ചുകൾ നടന്നത്. പ്രതിഷേധക്കാരെ പിരിച്ചുവിടാൻ ചിലയിടങ്ങളിൽ പൊലീസ് ജലപീരങ്കി പ്രയോഗിച്ചു. പല സ്ഥലങ്ങളിലും പ്രവർത്തകരും പൊലീസും തമ്മിൽ വാക്കേറ്റവും തള്ളിക്കയറ്റവും ഉണ്ടായി.
ആലപ്പുഴ, കോഴിക്കോട്, തൃശൂർ എന്നിവിടങ്ങളിൽ പ്രതിഷേധം കൂടുതൽ സംഘർഷഭരിതമായി. അതേസമയം, കൊച്ചിയിലെ പ്രതിഷേധം പിന്നീട് ഡിവൈഎഫ്ഐ അവസാനിപ്പിച്ചു. ഇത് സൂചനാസമരമാത്രമാണെന്നും, കൂടുതൽ ശക്തമായ പ്രതിഷേധ പരിപാടികളുമായി ഉടൻ രംഗത്തെത്തുമെന്നും സംഘടന വ്യക്തമാക്കി.
കോഴിക്കോട് നടന്ന മാർച്ച് ഉദ്ഘാടനം ചെയ്ത് സംസാരിച്ച ഡിവൈഎഫ്ഐ സംസ്ഥാന സെക്രട്ടേറിയറ്റ് അംഗം സച്ചിൻ ദേവ് സർക്കാരിനെതിരെ ഗുരുതര ആരോപണങ്ങൾ ഉന്നയിച്ചു. ഭരണത്തിലെത്തുന്നതിന് മുമ്പേ തന്നെ അഴിമതിയിൽ ഏർപ്പെട്ട വ്യക്തിയാണ് വി.ഡി. സതീശനെന്ന് അദ്ദേഹം ആരോപിച്ചു.
മദ്യലോബിയുമായി രഹസ്യ കരാറുകൾ ഉണ്ടാക്കിയെന്നും, ചില കമ്പനികൾക്ക് കേരളത്തിൽ അനുകൂല സാഹചര്യം ഒരുക്കാമെന്ന് വാഗ്ദാനം ചെയ്തതായും സച്ചിൻ ദേവ് ആരോപിച്ചു. സർക്കാരിന്റെ മദ്യനയത്തിനെതിരെ ശക്തമായ പ്രതിഷേധം തുടരുമെന്നും അദ്ദേഹം വ്യക്തമാക്കി.
“ഇപ്പോൾ ഞങ്ങൾ ബാരിക്കേഡ് ഒന്ന് ഇളക്കുക മാത്രമാണ് ചെയ്തത്. വീര്യം കുറഞ്ഞ മദ്യമായതുകൊണ്ട് വീര്യം കുറഞ്ഞ സമരമാക്കിയതല്ല. ജില്ലാ കേന്ദ്രങ്ങളിൽ പ്രതിഷേധം നടത്തി നിലപാട് വ്യക്തമാക്കുകയാണ്. എന്നാൽ സർക്കാരിനെ തിരുത്തേണ്ട സാഹചര്യം ഉണ്ടെങ്കിൽ അതിനുള്ള ശക്തിയും ശേഷിയും ഞങ്ങൾക്കുണ്ട്,” എന്നും സച്ചിൻ ദേവ് പറഞ്ഞു.
വീര്യം കുറഞ്ഞ മദ്യവുമായി ബന്ധപ്പെട്ട സർക്കാരിന്റെ പുതിയ നീക്കങ്ങൾ രാഷ്ട്രീയ വിവാദം കൂടുതൽ രൂക്ഷമാക്കുന്ന സാഹചര്യത്തിൽ, സംസ്ഥാനത്ത് പ്രതിഷേധം കൂടുതൽ ശക്തമാകുമെന്ന സൂചനകളാണ് പുറത്തുവരുന്നത്.
