വീണാ ജോർജിനെതിരായ പ്രതിഷേധക്കേസ്: ഗൺമാൻ കള്ളമൊഴി നൽകിയെന്ന് ആരോപണം; നടപടിക്ക് ശുപാർശയുമായി എസ്‌ഐടി
തിരുവനന്തപുരം: മുൻമന്ത്രി വീണാ ജോർജിനെതിരായ കരിങ്കൊടി പ്രതിഷേധക്കേസിൽ തെറ്റായ മൊഴി നൽകിയെന്ന ആരോപണത്തിൽ ഗൺമാൻ അഭിലാഷിനെതിരെ നടപടിയുണ്ടാകുമെന്ന് മന്ത്രി കെ. മുരളീധരൻ. അഭിലാഷിനെതിരായ നടപടിക്ക് ശുപാർശ ചെയ്യുന്ന റിപ്പോർട്ട് ഉടൻ ഡി.ജി.പിക്ക് കൈമാറുമെന്ന് അദ്ദേഹം വ്യക്തമാക്കി.
കണ്ണൂർ റെയിൽവേ സ്റ്റേഷനിൽ നടന്ന കരിങ്കൊടി പ്രതിഷേധത്തിനിടെ കെ.എസ്.യു പ്രവർത്തകർ വീണാ ജോർജിനെ വധിക്കാൻ ശ്രമിച്ചെന്നായിരുന്നു ഗൺമാൻ നേരത്തേ നൽകിയ മൊഴി. എന്നാൽ, പ്രത്യേക അന്വേഷണസംഘത്തിന് നൽകിയ പുതിയ മൊഴിയിൽ വീണാ ജോർജിന്റെ നിർദേശപ്രകാരമാണ് താൻ തെറ്റായ മൊഴി നൽകിയതെന്ന് അഭിലാഷ് സമ്മതിച്ചതായാണ് കെ. മുരളീധരന്റെ വെളിപ്പെടുത്തൽ. ഈ സാഹചര്യത്തിലാണ് ഗൺമാനെതിരെ നടപടി ആവശ്യപ്പെട്ട് റിപ്പോർട്ട് നൽകുന്നതെന്ന് അദ്ദേഹം പറഞ്ഞു.
വധശ്രമം ഉൾപ്പെടെയുള്ള ഗുരുതര വകുപ്പുകൾ ചുമത്താൻ ഇടയായ സാഹചര്യം സംബന്ധിച്ചും എസ്‌ഐടി പരിശോധന നടത്തും. കേസിൽ പ്രതികളായിരുന്ന അഞ്ച് കെ.എസ്.യു പ്രവർത്തകരോട് മൊഴി നൽകാൻ ഇന്ന് ഹാജരാകാനും അന്വേഷണസംഘം നിർദേശിച്ചിട്ടുണ്ട്. കഴിഞ്ഞദിവസം വീണാ ജോർജിന്റെ മൊഴിയും എസ്‌ഐടി രേഖപ്പെടുത്തിയിരുന്നു.
കരിങ്കൊടി പ്രതിഷേധത്തിന്റെ പേരിൽ വധശ്രമക്കേസ് രജിസ്റ്റർ ചെയ്തതിനെ കെ. മുരളീധരൻ വിമർശിച്ചു. രാഷ്ട്രീയവുമായി ബന്ധമില്ലാത്തവർ രാഷ്ട്രീയത്തിലേക്ക് കടന്നുവരുമ്പോൾ ഇത്തരം സംഭവങ്ങൾ ഉണ്ടാകുന്നുവെന്നും ഗൺമാനെതിരെ തീർച്ചയായും നടപടിയുണ്ടാകുമെന്നും അദ്ദേഹം പറഞ്ഞു.
കഴിഞ്ഞ ഫെബ്രുവരി 25നാണ് കണ്ണൂർ റെയിൽവേ സ്റ്റേഷനിൽ അന്നത്തെ ആരോഗ്യമന്ത്രിയായിരുന്ന വീണാ ജോർജിനെതിരെ കെ.എസ്.യു പ്രവർത്തകർ കരിങ്കൊടി പ്രതിഷേധം നടത്തിയത്. മാരകായുധങ്ങളുമായെത്തി മന്ത്രിയെ വധിക്കാൻ ശ്രമിച്ചെന്ന ഗൺമാന്റെ പരാതിയുടെ അടിസ്ഥാനത്തിൽ കെ.എസ്.യു ജില്ലാ പ്രസിഡന്റ് എം.സി. അതുൽ ഉൾപ്പെടെ അഞ്ച് പേർക്കെതിരെ വധശ്രമം അടക്കമുള്ള വകുപ്പുകൾ ചുമത്തി കേസെടുത്തിരുന്നു. ഇവർ രണ്ടാഴ്ചയോളം റിമാൻഡിലായിരുന്നു.
പുതിയ സർക്കാർ അധികാരത്തിലെത്തിയതിന് പിന്നാലെ കെ.എസ്.യു പ്രവർത്തകരുടെ പരാതിയിലാണ് സംഭവത്തിൽ പ്രത്യേക അന്വേഷണസംഘത്തെ നിയോഗിച്ച് അന്വേഷണം നടത്താൻ തീരുമാനിച്ചത്. ഗൺമാന്റെ മൊഴിയുമായി ബന്ധപ്പെട്ട പുതിയ വെളിപ്പെടുത്തലുകൾ കേസിൽ നിർണായകമായേക്കും.
