ആദ്യ നയപ്രഖ്യാപനത്തിൽ വൻ വാഗ്ദാനങ്ങൾ; ഗതാഗത ഏകീകരണവും തെരഞ്ഞെടുപ്പുകളും പ്രഖ്യാപിച്ച് സർക്കാർ
തിരുവനന്തപുരം: യുഡിഎഫ് സർക്കാരിന്റെ ആദ്യ നയപ്രഖ്യാപന പ്രസംഗ ദിനത്തിൽ തന്നെ സർക്കാരും രാജ്ഭവനും തമ്മിൽ അഭിപ്രായ ഭിന്നത തുറന്നുകാട്ടി. ഗവർണറെ നിയമസഭയിലേക്ക് സ്വീകരിക്കുന്ന ചടങ്ങിൽ “വന്ദേ മാതരം” മുഴുവൻ ആലപിക്കണമെന്ന രാജ്ഭവന്റെ നിർദേശം സർക്കാർ തള്ളുകയായിരുന്നു. കേരള പൊലീസിന്റെ ബാൻഡ് പതിവുപോലെ ആദ്യ ഭാഗം മാത്രം അവതരിപ്പിച്ച ശേഷം നിർത്തി.
റിഹേഴ്സൽ സമയത്തുതന്നെ “വന്ദേ മാതരം” പൂർണരൂപത്തിൽ ആലപിക്കണമെന്ന് രാജ്ഭവൻ നിർദേശിച്ചിരുന്നുവെന്നാണ് വിവരം. സർക്കാരിന്റെ നിലപാടിനെ തുടർന്ന് ഗവർണറുടെയും രാജ്ഭവന്റെയും തുടർനടപടികൾ എന്താകുമെന്നതിലാണ് രാഷ്ട്രീയ കേന്ദ്രങ്ങളുടെ ശ്രദ്ധ.
അതേസമയം, ഗവർണർ Rajendra Vishwanath Arlekarയുടെ ആദ്യ നയപ്രഖ്യാപന പ്രസംഗത്തിൽ നിരവധി പ്രധാന പ്രഖ്യാപനങ്ങളാണ് ഉണ്ടായത്. സംസ്ഥാനത്തിന്റെ സാമ്പത്തിക സ്ഥിതി ജനങ്ങൾക്ക് മുന്നിൽ വ്യക്തമാക്കാൻ ധവളപത്രം പുറത്തിറക്കുമെന്ന് പ്രഖ്യാപിച്ചു. പ്ലസ് വൺ സീറ്റുകൾ വർധിപ്പിക്കൽ, എക്സൈസ് നയത്തിൽ മാറ്റം, സംയോജിത ഗതാഗത സംവിധാനം എന്നിവയും പ്രധാന പ്രഖ്യാപനങ്ങളിലുണ്ടായിരുന്നു.
യുവാക്കളിലെ തൊഴിലില്ലായ്മയാണ് പ്രസംഗത്തിന്റെ തുടക്കത്തിൽ തന്നെ ഗവർണർ ചൂണ്ടിക്കാട്ടിയത്. “പുതുയുഗ കേരളം” സൃഷ്ടിക്കാനുള്ള ശ്രമമാണ് സർക്കാരിന്റെ ലക്ഷ്യമെന്നും ഭരണ സംവിധാനത്തിൽ സുതാര്യതയും വേഗവും ഉറപ്പാക്കുമെന്നും അദ്ദേഹം പറഞ്ഞു. അഴിമതി രഹിത ഭരണവും ഉദ്യോഗസ്ഥ തലത്തിലെ കാര്യക്ഷമതയും ഉറപ്പാക്കുമെന്നും മതനിരപേക്ഷതയ്ക്ക് മുൻതൂക്കം നൽകുമെന്നും പ്രസംഗത്തിൽ വ്യക്തമാക്കി.
സംസ്ഥാനത്തിന്റെ സാമ്പത്തിക പ്രതിസന്ധിയെക്കുറിച്ച് വ്യക്തമായ ചിത്രം ജനങ്ങൾക്ക് മുന്നിൽ അവതരിപ്പിക്കാൻ ധവളപത്രം പുറത്തിറക്കുമെന്ന് ഗവർണർ പറഞ്ഞു. സേവന മേഖലയിൽ നിന്ന് സർക്കാർ പിന്മാറില്ലെന്നും കേന്ദ്ര സർക്കാരുമായി പരമാവധി സഹകരിക്കുമെന്നും ന്യായമായ പിന്തുണ കേന്ദ്രത്തിൽ നിന്ന് പ്രതീക്ഷിക്കുന്നതായും പ്രസംഗത്തിൽ വ്യക്തമാക്കി.
യുഡിഎഫിന്റെ “ഇന്ദിരാ ഗ്യാരണ്ടി” പദ്ധതികൾ നടപ്പാക്കുന്നതിൽ സർക്കാർ പ്രതിബദ്ധമാണെന്നും ആദ്യ മന്ത്രിസഭ യോഗത്തിൽ തന്നെ വയോജന വകുപ്പ് സംബന്ധിച്ച തീരുമാനം എടുത്തതായും പ്രസംഗത്തിൽ അറിയിച്ചു. റോഡ്, ജല, വ്യോമ ഗതാഗത സംവിധാനങ്ങളെ ഏകോപിപ്പിച്ചുള്ള ബൃഹത് പദ്ധതി നടപ്പാക്കുമെന്നും മനുഷ്യ-മൃഗ സംഘർഷ മേഖലകളിൽ പ്രത്യേക ഇടപെടലുണ്ടാകുമെന്നും വ്യക്തമാക്കി.
കാർഷിക മേഖലയിലെ സമഗ്ര വികസനത്തിനായി വനിതാ കർഷകരുടെ കൺസോർഷ്യം ഈ വർഷം തന്നെ രൂപീകരിക്കുമെന്നും ശാസ്ത്രീയ മണ്ണ് പരിശോധന സംവിധാനം കൊണ്ടുവരുമെന്നും സുഗന്ധവ്യഞ്ജന പാർക്കുകളും പൊതുസ്വകാര്യ പങ്കാളിത്ത പദ്ധതികളും നടപ്പാക്കുമെന്നും പ്രഖ്യാപിച്ചു.
സാംസ്കാരിക-വിദ്യാഭ്യാസ മേഖലകളിലും സർക്കാർ വലിയ പ്രഖ്യാപനങ്ങൾ നടത്തി. തീയറ്റർ മേഖലയെ പ്രോത്സാഹിപ്പിക്കുമെന്നും രാജ്യാന്തര ചലച്ചിത്രമേള മറ്റ് മേഖലകളിലേക്കും വ്യാപിപ്പിക്കുമെന്നും തീർത്ഥാടന ടൂറിസത്തിന് പ്രാധാന്യം നൽകുമെന്നും അറിയിച്ചു. ഉന്നത വിദ്യാഭ്യാസ മേഖലയെ മികവിന്റെ കേന്ദ്രങ്ങളാക്കുമെന്നും എല്ലാ ജില്ലകളിലും ആവശ്യത്തിന് പ്ലസ് വൺ സീറ്റുകൾ അനുവദിക്കുമെന്നും ഗവർണറുടെ നയപ്രഖ്യാപന പ്രസംഗത്തിൽ വ്യക്തമാക്കി.
